„არჩევნების მოახლოებასთან ერთად, ჭორნიუსებიც გაასმაგდება“: გოგოტიშვილი ჩხუბის და პლაკატების ჩამოხევის შესახებ

ოზურგეთში საარჩევნო პლაკატების ჩამოხევის არაერთი ფაქტი ფიქსირდება. მათ შორის, „ევროპული საქართველოს“ პლაკატები ბევრგანაა ჩამოგლეჯილი.

_ხელისუფლებას, ჩვენი ვარაუდით, ჰყავს ზონდერჯგუფები, რომლებიც დაკავებული არიან სააგიტაციო მასალების განადგურებით, -გვითხრა  „ევროპული საქართველოს“ ოზურგეთის რაიონული ორგანიზაციის ლიდერმა მიხეილ გოგოტიშვილმა.

რაც შეეხება გავრცელებულ ინფორმაციას, თითქოს,  ოზურგეთში „ევროპული საქართველოს“ ოფისში წევრებმა ერთმანეთს სცემეს,  გოგოტიშვილს სასაცილოდ არ ჰყოფნის:

_რა? აგერ ბატონო შემოდით, ნახეთ, ვის აქვს თავ-პირი დამტვრეული, ნაკაწრი თუ ვინმეს აქვს? მეც მითხრეს, თურმე აქ ერთმანეთი დაგვილეწია.  ავეჯი, კედლებიც დაათვალიერეთ… თქვენ აქ არ იყავით გუშინ, დღესაც? დაინახეთ ან გაიგეთ რაიმე? ჭორებზე რას გვეკითხებით? რაც უფრო მოახლოვდება არჩევნები,  მით უფრო,  ყოველდღე გაძლიერდება ჭორები, გაასმაგდება ჭორნიუსები და მიმდევრებს მეტი რა უნდათ?  ისე, ქუჩაში თუ რაიმე მოხდება, ჩვენ ნუ დაგვაბრალებთ. კარგად გაიგეთ.   ამ ქუჩაზე აყალ-მაყალიც ხშირად არის, _ გვითხრა „ევროპული საქართველოს“ ოზურგეთის რაიონული ორგანიზაციის ლიდერმა.