„პატრიოტთა ალიანსისა“ და „დემოკრატიული მოძრაობა-თავისუფალი საქართველოს“ წარმომადგენლებმა ლანჩხუთში _ დარეჯან ბურჭულაძემ, ლელა ჩახვაძემ და ნონა მურვანიძემ ერთობლივი პრესკონფერენცია გამართეს და იმ დარღვევებზე ისაუბრეს, რომლის ფონზეც, მათი შეხედულებით, 21 ოქტომბრის თვითმმართველობის არჩევნებმა ჩაიარა ლანჩხუთში.
„პატროტთა ალიანსის“ სიის პირველი ნომრის, ლელა ჩახვაძის თქმით, წინასაარჩევნო პერიოდში მას და მის შვილზე, გვანცა ჩხარტიშვილზე, რომელიც ნინოშვილის მაჟორიტარ დეპუტატად იყრიდა კენჭს, მიმდინარეობდა ფარული თვალთვალი და იყო დაშინების მცდელობები.
„არაერთ რეჟიმს მოვსწრებივარ, მაგრამ მსგავსი არაფერი მინახავს, რაც ამ წინასაარჩევნო პერიოდში ვიხილე. ეს იყო ჩუმი პოლიტიკური დევნა და ანგარიშსწორება ჩემი და გვანცას მიმართ. ყველაფერი ეს კი იმან გამოიწვია, რომ ჩემმა შვილმა საკმაოდ ხმაურიანი განცხადების ფონზე დატოვა „ქართული ოცნება“. ჩვენზე უცხო პირების მიერ, ყოველდღიურად მიმდინარეობდა თვალთვალი, კონტროლდებოდა თითოეული ჩვენი ნაბიჯი, მაქსიმალურად ცდილობდნენ ჩვენს დაშინებას და დისკრედიტაციას“, _ აღნიშნა ლელა ჩახვაძემ, რომლის შეფასებითაც წლევანდელი თვითმმართველობის არჩევნებზე ხელისუფლებამ შედეგი ამომრჩევლის მოსყიდვითა და დაშინებით დადო. მისი თქმით, მმართველმა გუნდმა მის ხელთ არსებული ყველა ბერკეტი გამოიყენა არჩევნებში გამარჯვებისთვის.
„დააშინეს ყველა, ვისი დაშინებაც შეიძლებოდა და იყიდეს ყველა, ვინც გაიყიდა. ხელისუფლებამ ყველა ბერკეტი გამოიყენა, რომ მოსახლეობას საკუთარი ნება არ დაეფიქსირებინა ამ არჩვენებზე. ჩემი და გვანცას დისკრედიტაციით „ოცნებამ“ დაანახა საზოგადოებას, რომ დაისჯებოდა ყველა, ვინც მათ წინააღმდეგ წავიდოდა. საბოლოოდ კი მივიღეთ ის, რაც მივიღეთ და „პატრიოტთა ალიანსმა“ მხოლოდ ერთი მანდატი მოიპოვა ლანჩხუთის საკრებულოში, მაშინ, როცა სხვა რაიონებში ჩვენმა პარტიამ საკმაოდ მაღალი შედეგი აჩვენა“, _ დასძინა ჩახვაძემ.
„პატრიოტთა ალიანსის“ კიდევ ერთი წევრის, საკრებულოს მოქმედი დეპუტატის, დარეჯან ბურჭულაძის შეფასებით, რომელიც ამ ჯერზე სადეპუტატო მანდატის გარეშე დარჩა, ამ არჩევნებზე ხალხის ნება ძალაუფლებასთან დამარცხდა. მისივე თქმით, სამომავლოდ ის პოლიტიკიდან წასვლას არ გეგმავს და კვლავაც აქტიურ მოქალაქედ რჩება.
„პლატონს თუ დავუჯერებთ, „პასიური მოქალაქეები შობენ ნაძირალათა ხელისუფლებას“, ამიტომ მე ვრჩები აქტიურ მოქალაქედ და ხელისუფლებას ვპირდები, რომ ვიქნები მისი ღირსეული ოპონენტი. სამწუხაროდ, ამ არჩევებში ხალხის ნება დამარცხდა, გაიმარჯვა ფულმა და ძალაუფლებამ. ეს ხლისუფლება ავტორიტარიზმის გზით მიდის, ამას კი რაც მოჰყვება საამისო მაგალითები მრავლად გვქონია“, _ თქვა ბურჭულაძემ და ამომრჩეველს მადლობაც გადაუხადა წინასაარჩევნო პერიოდში მის მიმართ გამოხატული სითბოსთვის.
„დემოკრატიული მოძრაობის“ ადგილობრივმა ლიდერმა, ნონა მურვანიძემ კი აქცენტი იმ დარღვევებზე გააკეთა, რასაც მისი შეფასებით, შესაძლებლობას ქმნიდა ხმები გაყალბებულიყო საარჩევნო უბნებზე. ამასთან, ისიც აღნიშნა, რომ წინასაარჩევნო პერიოდში მისი პარტია ფინანსური კუთხით ყველაზე მეტად დაიჩაგრა. მურვანიძეს საეჭვოდ ეჩვენება „ევროპული საქართველოს“ მიერ დადებული შედეგიც.
„გასაკვირია ახალშექმნილი პარტიისგან ასეთი შედეგები. საოცარია, როცა ხედავ, რომ ბაქრაძე-უგულავას პარტია როგორ იღებს 12%-ს. აქ ხომ არ არსებობს ხელისუფლების პოლიტიკური ნება, რომელიმე პოლიტიკური გუნდი დაიყენოს გვერდით?!“ _ კითხვა დასვა მურვანიძემ.
