ოზურგეთის მაჟორიტარი დეპუტატი და უმრავლესობის ლიდერი არჩილ თალაკვაძე “გურია ნიუსთან“ დღეს არსებულ ნარკოპოლიტიკასთან დაკავშირებით საუბრობს. მისი განმარტებით, მოდელი, რომელსაც მხარს უჭერს მმართველი გუნდი, ეფუძნება ევროპულ ოთხსვეტიან ნარკოპოლიტიკას, სადაც მნიშვნელოვანი კომპონენტებია _ პრევენცია, მკურნალობა, რეაბილიტაცია, ზიანის შემცირება და სამართალდამცავთა ეფექტური მუშაობა ორგანიზებული ნარკოდანაშაულის წინაღმდეგ.
_ ნარკოპოლიტიკა, ეს ძალიან მნიშვნელოვანი საკითხია, ჩვენი გუნდი პარლამენტში მხარს უჭერს ნარკოპოლიტიკის ისეთ მოდელს, რომლის მიზანიც არის პრევენცია, ახალგაზრდების, ჩვენი შვილების დაცვა ნარკოტიკების ზიანისგან. მეორე _ რომლის მიზანი არის ნარკოდამოკიდებული ადამიანების ვისაც სჭირდებათ სამედიცინო თუ სხვა ტიპის დახმარება და ამ სერვისების უზრუნველყოფა, იმ ბარიერების შემცირება და აღმოფხვრა, რომელიც ნარკოდამოკიდებულ პირებს შესაძლოა ჰქონდეთ სერვისების ხელმისაწვდომობასთან დაკავშირებით. ეს არის მკურნალობა, რეაბილიტტაცია, ზიანის შემცირება. მესამე მიზანია _ სამართალდამცავთა ხელშეწყობა და კიდევ უფრო გაძლიერება ორგანიზებულ ნარკოდანაშაულთან ბრძოლაში. ამ მიმართულებით პოლიციას ძალიან ბევრი აქვს გაკეთებული ბატონი გიორგი გახარიას მინისტრობის დროს, სახეზე გვაქვს ის საპოლიციო მოქმედებები, როდესაც იქნა მარშრუტები გაშიფრული და ნარკოდილერები დააკავეს, როდესაც აღიკვეთა ინტერნეტით ვაჭრობის უკანონო ქსელი, რა თქმა უნდა მივესალმებით მინისტრის აქცენტებს და პოლიტიკას, პოლიციამ ძირითადი ძალისხმევა დახარჯოს, ორგანიზებულ ნარკოდანაშაულთან ბრძოლაში, პარლამენტი მხარს ვუჭერთ განათლების და სპორტის სფეროში ძალისხმევას, ცხოვრების ჯანსაღი წესის პრევენცია მოხდეს და ახალგაზრდული თაობა დაცული იქნას ნარკოტიკის ზიანისგან, _ განმარტავს თალაკვაძე და თბილისში განვითარებულ მოვლენებთან დაკავშირებით კომენტარს აკეთებს:
_რაც შეეხება საპოლიციო მოქმედებებს, პოლიციას აქვს სრული მხარდაჭერა იმ ლეგიტიმური მიზნისთვის, რომელსაც ჰქვია ნარკოტიკებით ვაჭრობის წინააღმდეგ ბრძოლა, რომელსაც ჰქვია ნარკოდილერების წინააღმდეგ ბრძოლა. ეს არის ლეგიტიმური მიზანი და ამ მიზანში შსს აქვს საპარლამენტო გუნდის სრული მხარდაჭერა. რაც შეეხება მანიფესტაციას და პროტესტს, რომელიც მოჰყვა ამ საპოლიციო მოქმედებებს, აქ ცალსახად გეუბნებით, რომ ხელისუფლებამ და ჩვენმა სახელისუფლებლო გუნდმა კიდევ ერთხელ დაამტკიცა, რომ ჩვენთვის უმთავრესი არის თითოეული ადამიანის უფლებები და უსაფრთხოება, საზოგადოებრივი ინტერესები და მათი აზრის გათვალისწინება. შესაბამისად, ამ მანიფესტაციებსა და პროტესტის დროს, დაცული იყო მაქსიმალურად თითოეული მათგანის უსაფრთხოება და გამოხატვის თავისუფლება. აქცია ჩატარდა უსაფრთხოდ და დიალოგი ხელსუფლებასა და ორგანიზატორებს შორის დაიწყო და გრძელდება, დაველოდოთ რა შეთანხმებები მოხდება მათ შორის, _გვითხრა არჩილ თალაკვაძემ.
