გასულ შაბათს, “ივლიტას ბიბლიოთეკაში”, საპარლამენტო უმრავლესობის ლიდერმა არჩილ თალაკვაძემ თემაზე _ „არა ძალადობას!“ ტრენინგი ჩაატარა.
ღონისძიება, რომელიც სამი საათი გაგრძელდა, ძალიან საინტერესო და, შეხვედრის მონაწილეების თქმით, ნაყოფიერი იყო.
ბიბლიოთეკაში შეკრებილ მოსწავლეებს, პედაგოგებს და სკოლის დირექტორებს არჩილ თალაკვაძემ ძალადობის გამომწვევ მიზეზებზე, მისი აღმოფხვრის გზებზე ვრცლად ესაუბრა და მათთვის საინტერესო ყველა კითხვასაც უპასუხა.
საპარლამენტო უმრავლესობის ლიდერმა იმ ღონისძიებებზეც ისაუბრა, რაც ხელისუფლებამ ძალადობის წინააღმდეგ გაატარა.
არჩილ თალაკვაძის თქმით, ძალადობასთან ბრძოლის წინააღმდეგ, ერთ-ერთი მნიშვნელოვანი პუნქტი საზოგადოებრივი ცნობიერების ამაღლებაა:
„გურია ნიუსი“ ზრუნავს საზოგადოებრივი ცნობიერების ამაღლებაზე და ეს შეხვედრაც ამის დასტურია. მინდა მადლობა გადავუხადო ამ შესაძლებლობისთვის „გურია ნიუსს“ და იმედი გამოვთქვა, რომ ამ ტიპის შეხვედრები მომავალშიც აქტიურად გაგრძელდება“, _ აღნიშნა არჩილ თალაკვაძემ, რომლის ლექციით კმაყოფილება შეხვედრის მონაწილეებს არ დაუმალავთ.
მათი თქმით, იშვიათია, როცა ტრენერი შეხვედრაზე ასეთი მომზადებული მოვიდა და „შეხვედრა შეხვედრისთვის“ არ ყოფილა.
_ „გურია ნიუსი“ და „21-ს ქვევით“ უკვე მესამე შეხვედრას ატარებს და ამისთვის მადლობა გვინდა გადავუხადოთ. როდესაც მოვდივართ, გვგონია, რომ იქნება ჩვეულებრივი შეხვედრა _ ტრენერი ისაუბრებს და დასრულდება, თუმცა, აქ ყველაფერი განსხვავებულია. ამ ერთი თვის განმავლობაში ჩვენ გვაქვს საშუალება შევხვდეთ გადაწყვეტილების მიმღებ პირებს, გავუზიაროთ მათ ჩვენი პრობლემები, მოსაზრებები, გავიზიაროთ მათი გამოცდილება, მოვისმინოთ რჩევები და გავიგოთ სამომავლო გეგმები ამ ძალიან მნიშვნელოვან პრობლემასთან საბრძოლველად. ეს შეხვედრაც ამის კარგი მაგალითი იყო და მადლობა მომხსენებელს ასეთი კარგი სესიისთვის, _ აღნიშნეს სკოლის მოსწავლეებმა.
აღსანიშნავია, რომ შეხვედრის დასასრულს არჩილ თალაკვაძემ მოსწავლეებს საშუალება მისცა, თავად ჩართულიყვნენ პროცესებში და ლექციის შინაარსი გადმოეცათ. ამისთვის, შეხვედრის მონაწილეებმა დარბაზში სამი მოსწავლე აარჩიეს, რომლებმაც არჩილ თალაკვაძის მიერ ჩატარებული ლექციის შინაარსი მოკლედ გადმოსცეს და საპარლამენტო უმრავლესობის ლიდერისგან რჩევებიც მიიღეს, თუ როგორ უნდა გახდე წარმატებული და საინტერესო სპიკერი.
ღონისძიება მედიასახლ “გურია ნიუსის” და გურიის ახალგაზრდული გაზეთის “21-ს ქვევით” მიერ დაწყებული კამპანიის _ „გავერთიანდეთ ძალადობის წინააღმდეგ“ ფარგლებში გაიმართა დევიზით _ „არა ძალადობას!“
