ოზურგეთის მუნიციპალიტეტის მერის, კონსტანტინე შარაშენიძის მიერ, მერიის განათლების, კულტურის, სპორტისა და ახალგაზრდულ საქმეთა სამსახურის უფროსად ნატალია ხომერიკი ხომერიკის დანიშვნა და მეორე დღეს გათავისუფლება, რომელიც იურისტებმა კანონდარღვევად შეაფასეს, აქტუალობას არ კარგავს.
ფაქტს საპარლამენტო უმრავლესობის ლიდერი, ოზურგეთის მაჟორიტარი დეპუტატი არჩილ თალაკვაძეც გამოეხმაურა:
“ვინაიდან საკითხმა საზოგადოების ინტერესი გამოიწვია, მქონდა საუბარი მერთან, ბატონ კოტე შარაშენიძესთან შესაძლო საკადრო გადაწყვეტილებასთან დაკავშირებით, რომელიც ქალბატონ ნატალია ხომერიკს უკავშირდება.
მივესალმები, თუ ამ ეტაპზე, ქალაქის მერი სწორედ ნატალია ხომერიკთან შეხვედრისა და შეთანხმების შედეგად მიიღებს საბოლოო გადაწყვეტილებას“, _ აღნიშნა არჩილ თალაკვაძემ “გურია ნიუსთან” საუბრისას.
შეგახსენებთ, რომ ოზურგეთის მუნიციპალიტეტის მერმა განათლების, კულტურის, სპორტისა და ახალგაზრდულ საქმეთა სამსახურის უფროსად ნატალია ხომერიკი 12 დეკემბერს დანიშნა.
თუმცა, როგორც „გურია ნიუსისთვის” ექსკლუზიურად გახდა ცნობილი, დანიშვნიდან მეორე დღეს _ 13 დეკემბერს ახალი ბრძანება დაიწერა და ხომერიკი სამსახურის უფროსობიდან განყოფილების უფროსად გადანიშნეს.
მერიის იურიდიული სამსახურის უფროსის ლაშა თავაძის თქმით, გადანიშვნის ბრძანება საჯარო სამსახურის შესახებ კანონის თანახმად დაიწერა. თავაძე კანონის შესაბამის მუხლს ვერ გვისახელებს და მხოლოდ იმას აღნიშნავს, რომ ეს მობილობის წესით მოხდა.
კითხვაზე _ რა შეიცვალა ერთ დღეში და რის საფუძველზე მოხდა სამსახურის უფროსის გათავისუფლება და დაქვეითება, თავაძეს კონკრეტული პასუხი არ აქვს:
_ როგორც ვიცი ქალბატონ ნატოს და მერს შორის შეთანხმება მოხდა და შესაბამისად, დაიწერა ახალი ბრძანება, _ განმარტავს იურიდიული სამსახურის უფროსი.
ნატალია ხომერიკი ჩვენთან საუბრისას ამბობს, რომ არანაირი შეთანხმება არ მომხდარა. უფრო მეტიც, სამსახურის უფროსობიდან მისი გათავისუფლების შესახებ ინფორმაცია ხომერიკმა ჩვენგან გაიგო.
ხომერიკის ერთდღიანი თანამდებობა ყველასთვის იმდენად მოულოდნელი აღმოჩნდა, რომ ოზურგეთის მუნიციპალიტეტის საკრებულოს დეპუტატებმა განმარტება მერის მრჩეველს იურიდიულ საკითხებში კოკა კიღურაძეს და იურიდიული სამსახურის უფროსს ლაშა თავაძეს საკრებულოს სხდომაზე მოსთხოვეს.
თავაძემ კონსტანტინე შარაშენიძის ეს გადაწყვეტილება საკრებულოზე საკმაოდ უცნაურად ახსნა და აღნიშნა, რომ ხომერიკის დანიშვნის ბრძანება ძალაში შესული არ იყო. არადა, შარაშენიძის ხელმოწერილ ბრძანებაში, რომელიც ექსკლუზიურად გავავრცელეთ, გარკვევით წერია, რომ ძალაშია ხელმოწერისთანავე.
კოკა კიღურაძე უფრო შორს წავიდა და დეპუტატები ჟურნალისტთან გადმოამისამართა:
_ ჟურნალისტს, ვინც ეს ბრძანება გამოაქვეყნა,მოსთხოვეთ ავთენტურობის დადგენა, _ მიმართა კუღურაძემ საკრებულოს დეპუტატებს, სადაც ოზურგეთელთა რჩეულების მხრიდან პროტესტი მოყვა.
შარაშენიძის გადაწყვეტილება შეაფასეს ახალგაზრდა იურისტთა ასოციაციაშიც:
“მობილობის წესთან დაკავშირებით ცვლილებები საჯარო სამსახურის შესახებ კანონში 2017 წლის ივნისში შევიდა, მისი ერთ-ერთი დადებითი მხარე ისაა, რომ საჯარო მოსამსახურეებს გაუჩნდეთ დაცულობის განცდა და მათი სამასახური არ დადგეს ეჭვქვეშ არჩევნების შედეგების მიუხედავად.
საჯარო სამსახურის შესახებ ანონის 52-ე მუხლის შესაბამისად: საჯარო დაწესებულების რეორგანიზაციის, ლიკვიდაციის ან/და მისი სხვა საჯარო დაწესებულებასთან შერწყმის გამო შტატის შემცირებისას შესაბამისი მოხელე შესაძლებელია მისი თანხმობით გადაყვანილ იქნეს იმავე ან სხვა საჯარო დაწესებულებაში მისი თანამდებობის ტოლფას თანამდებობაზე, ხოლო ასეთი თანამდებობის არარსებობისას – დაბალ თანამდებობაზე, მისი კომპეტენციის გათვალისწინებით.
ამდენად, მობილობის წესით საჯარო მოხელის ტოლფას ან დაბალ თანადებობაზე გადაყვანისას აუცილებელ პირობას წამოადგენს მოხელის თანხმობა. შესაბამისად თუ მოხელის თანხმობა არ იყო, დარღვეულია კანონის შესაბამის ნორმა,” _ ამბობს საიას ოზურგეთის ოფისის ხელმძღვანელი თამაზ ტრაპაიძე.
ამავე თემაზე: საია ხომერიკის საქმეზე: “თუ მოხელის თანხმობა არ იყო, დარღვეულია კანონი”
ნატალია ხომერიკის ერთდღიანი თანამდებობა _ რა მოხდა ოზურგეთის მერიაში
მერის მრჩეველი დეპუტატებს: “მოსთხოვეთ ჟურნალისტს ბრძანების ავთენტურობის დადგენა” (ვიდეო)
