საქართველოს მეოთხე პრეზიდენტი გიორგი მარგველაშვილი უარს ამბობს შეასრულოს კონსტიტუციით ნაკისრი ვალდებულება და წარადგინოს უზენაესი სასამართლოს თავმჯდომარეობის კანდიდატი. აღნიშნულს პრეზიდენტის ადმინისტრაციაში შემდეგი არგუმენტებით ხსნიან:
,,ფაქტია, ფართო კონსენსუსის გარეშე, კიდევ ერთხელ, როცა “ქართული ოცნება” უარს აცხადებდა კონსულტაციებზე, კანდიდატის დასახელება იქნებოდა დასახელება დასახელებისთვის, კანდიდატურა კანდიდატურისთვის და არა შედეგზე ორიენტირებული. მინდა შეგახსენოთ, რომ დღესაც საქართველოს პარლამენტში წარდგენილია მოსამართლეობის რამდენიმე კანდიდატი, რომელსაც საქართველოს პარლამენტი არც კი განიხილავს”, _ განაცხადა პრეზიდენტის ადმინისტრაციის უფროსმა, გიორგი აბაშიშვილმა.
არღვევს თუ არა საქართველოს პრეზიდენტი კანონს, ამ საკითხზე ,,გურია ნიუსი“ ახალგაზრდა იურისტთა ასოციაციის თავმჯდომარეს, სულხან სალაძეს ესაუბრა.
_ პრეზიდენტი უარს ამბობს, წარადგინოს უზენაესი სასამართლოს თავმჯდომარეობის კანდიდატი. არის თუ არა აღნიშნული კონსტიტუციის დარღვევა?
_ ეს საკითხი უნდა გავყოთ ორ ნაწილად, პირველი არის სამართლებრივი მხარე და მეორე არის ამ პროცესის პოლიტიკური მნიშვნელობა. ცხადია, კონსტიტუციაში არ წერია, რომ პრეზიდენტის მიერ უზენაესი სასამართლოს თავმჯდომარის წარდგენა არის ვალდებულება. კონსტიტუციაში წერია, რომ პრეზიდენტი წარადგენს, რაც იმას ნიშნავს, რომ მოვლენების ნორმალური პირობების განვითარების შემთხვევაში, პრეზიდენტს უნდა წარედგინა კანდიდატი. პრეზიდენტმა გადაწყვიტა, რომ არ წარადგინოს და ამის გამო, ცხადია, იმპიჩმენტის ან სხვა პროცედურის დაწყება არ არის მოსალოდნელი, თუმცა უნდა ვთქვათ ისიც, რომ იმ რეალობიდან გამომდინარე, რომელშიც მართლმსაჯულება იმყოფება საქართველოში, სწორი გადაწყვეტილება იქნებოდა, რომ პრეზიდენტს წარედგინა კანდიდატი.
_ მოგეხსენებათ, პრეზიდენტმა უზენაესი სასამართლოს თავმჯდომარეობის კანდიდატურის დასახელება არასამთავრობო სექტორს შემოგთავაზათ, რაზეც უარი განაცხადეთ. როგორ ფიქრობთ, რატომ აარიდა თავი მარგველაშვილმა კონსტიტუციური უფლების გამოყენებას?
_ ეს უნდა ჰკითხოთ მთავრობის ადმინისტრაციას და პრეზიდენტს, რაც შეეხება ჩვენზე გადმობარებას, მოქმედი კონსტიტუციის მიხედვით, უზენაესი სასამართლოს კანდიდატის დასახლების უფლება აქვს მხოლოდ საქართველოს პრეზიდენტს, აქ საუბარი იყო შერჩევის პროცესზე, რომელთა მიმართებაში გაჩნდა ურთიერთსაპირისპირო პოზიციები სამოქალაქო სექტორსა და პრეზიდენტს შორის.
_ მას შემდეგ, რაც პრეზიდენტმა საკუთარი კონსტიტუციური უფლება არ გამოიყენა, ოპოზიციისა და მმართველი პარტიის დიდი კრიტიკა დაიმსახურა. როგორ ფიქრობთ, შესაძლებელია თუ არა, რომ გიორგი მარგველაშვილმა შეცვალოს თავისი გადაწყვეტილება და უზენაესი სასამართლოს თავმჯდომარეობის კანდიდატი წარადგინოს?
_ ვფიქრობ, პოზიციის შეცვლა არასწორი იქნება. მმართველი გუნდი ხშირად საუბრობს, რომ ის პირადი შეხედულებით იღებს გადაწყვეტილებებს და ახლა გადაწყვეტილების შეცვლა კიდევ ერთი არგუმენტი იქნება ,,ქართული ოცნებისთვის“, რომ ეს რიტორიკა გააძლიეროს. ალბათ, ამ თემაზე უფრო ადრე უნდა ეფიქრა პრეზიდენტს. არაერთი შეხვედრა იყო პრეზიდენტის ადმინისტრაციის წარმომადგენლებთან და ვფიქრობ, რომ საკმაოდ ბევრი არგუმენტი ითქვა, რატომ იყო მნიშვნელოვანი კანდიდატის დასახელება.
არასამთავრობო სექტორი ამ დრომდე მოუწოდებს პრეზიდენტს, გამოიყენოს საკუთარი უფლებამოსილება და დაასახელოს უზენაესი სასამართლოს თავმჯდომარეობის კანდიდატი. მმართველ პარტიაში კი კონსტიტუციის დარღვევაზე საუბრობენ.
