მონიტორინგის ცენტრი “მედიატორი” თბილისის მერს მიმართავს და საქალაქო სამსახურების ხელმძღვანელის თანამდებობაზე მოქალაქეებს შუამდგომლობას უწევს.
,,მედიატორის“ თავმჯდომარის დიმიტრი ბიძინაშვილის თქმით, გადაწყვეტილება კახა კალაძის განცხადების შემდეგ მიიღეს. საქმე ეხება თბილისის მერიის უსაფრთხოების სამსახურის ხელმძღვანელის თანამდებობაზე წარდგენილ ნიკოლოზ ჭონქაძესთან დაკავშირებით გაკეთებულ განცხადებას, რომლის მიხედვით, კალაძემ ჭონქაძე დაახასიათა, როგორც კარგი თამადა და ჩოხოსანი.
თავმჯდომარე განმარტავს, რომ მათ შეარჩიეს რამდენიმე კანდიდატი, რომლებიც კარგი მომღერლები, თამადები და მოცეკვავეები არიან.
„გუშინ კახი კალაძემ გააკეთა განცხადება, რომ იგი ერთ-ერთი უმნიშვნელოვანესი საქალაქო სამსახურის უფროსად ნიშნავდა პირს იმ მოტივით, რომ იგი არის კარგი თამადა. ამ განცხადების შემდეგ, ჩვენ მოგვმართა რამდენიმე მოქალაქემ, რომ რეკომენდაცია გაგვეწია კახი კალაძესთან. ეს ადამიანები არიან ძალიან კარგი თამადები, კარგად მღერიან, კარგად ცეკვავენ, აქვთ facebook-ის ორი ექაუნთი და მესამეს გაკეთებაც არ არის მათთვის პრობლემა. ჩავთვალეთ, რომ ეს ადამიანები ყველა იმ კრიტერიუმს აკმაყოფილებენ, რაც ბატონი კახისთვის მნიშვნელოვანია,“ _ განაცხადა დიმიტრი ბიძინაშვილმა.
შეგახსენებთ, რომ თბილისის ახალმა მერმა კახა კალაძემ თბილისის მერიის უსაფრთხოების სამსახურის ხელმძღვანელთან, ნიკოლოზ ჭონქაძესთან დაკავშირებით ჟურნალისტის მიერ დასმულ კითხვას: ხომ არ აპირებს საკუთარი გადაწყვეტილების გადახედვას იმ ბრალდებების გამო, რაც ჭონქაძისადმი ისმის, კალაძემ უპასუხა:
”რატომ? რა დააშავა ამ ადამიანმა? წლების განმავლობაში მუშაობდა სახელმწიფო უსაფრთხოების სამსახურში, მუშაობდა საფინანსო პოლიციაში, რომელ წარსულზე მელაპარაკებით? არის ჩოხოსანი, არის კარგი თამადა”, _ თქვა კალაძემ.
