საქართველოში კორონავირუსის შემოღწევიდან 3 კვირა გავიდა.
ქვეყანაში ამ დროისთვის კორონავირუსის დადასტურებული შემთხვევა – 40-ია, მათ შორის გამოჯანმრთელებული – 1. კარანტინის რეჟიმში – 1592 ადამიანი იმყოფება, სტაციონარში მეთვალყურეობის ქვეშ კი – 262.
დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ეპიდემიის კიდევ უფრო გაფართოვებაა მოსალოდნელი, რაც უფრო მეტი ადამიანის დაინფიცირებას გამოიწვევს.
საქართველოში ვირუსის პირველი შემთხვევის დაფიქსირებისთანავე დაიწყო მისი გავრცელების რისკის შესამცირებელი ღონისძიებები.
კორონავირუსისგან თავდაცვის ძირითადი რეკომენდაციებია: ხელების ხშირი დაბანა; სახეზე/ თვალში / პირზე ხელის შეხებისგან თავი არიდება; ჰიგიენის დაცვა; ხველისა და ცემინების ეტიკეტის დაცვა; ქუჩაში ცხოველებთან ახლო, დაუცველი კონტაქტისგან თავის შეკავება.
დისტანციური სასწავლო და სამუშაო რეჟიმი, ჩაკეტილი საზღვრები_ ეს ის სურათია, რაც დღეისთვის არაერთი ქვეყნის მსგავსად საქართველოშიც დგას.
საგანგებო მდგომარეობა ჯერ არ გამოცხადებულა, თუმცა, ხელისუფლება მოსახლეობას სახლებში დარჩენისკენ მოუწოდებს.
კორონავირუსით დაინფიცირებულ ადამიანებს ქვეყნის მასშტაბით 4 კლინიკაში მკურნალობენ, ტესტირების ჩატარებაც იქ არის შესაძლებელი.
უცხოქვეყნებიდან ჩამოსული ადამიანების კონტროლი საზღვრებზე ხდებოდა და ისინი თვითიზოლაციაში ან კარანტინში იმყოფებიან, თუმცა, არიან ადამიანებიც, რომლებიც ჩვენთან საუბარში ამბობენ, რომ საზღვარზე ვირუსზე შემოწმება არ გაუვლიათ. აღნიშნულ ინფორმაციას ჯანდაცვის სამინისტრო არ ადასტურებს, მაგრამ საზოგადოებაში საფრთხე მაინც დიდია.
„გურია ნიუსი“ დაინტერესდა რამდენად არიან მზად ჩოხატაურში არსებული საავადმყოფოები ჩოხატაურის მუნიციპალიტეტის ტერიტორიაზე ახალი კორონავირუსის საეჭვო შემთხვევის გამოვლენის შემთხვევაში პაციენტების მისაღებად.
როგორც კლინიკის „ჯანმრთელობის სახლი გურიაში“ დირექტორი, სალომე გუდავაძე ამბობს, დაავადებათა კონტროლისა და საზოგადოებრივი ჯანმრთელობის ეროვნული ცენტრის ადმინისტრაციამ მათ უკვე გაუზიარა რეკომენდაციები პოტენციურად covid_19 – ის მქონე პაციენტების ტრიაჟის შესახებ.
„ჩვენ მუდმივად გვაქვს კონტაქტი დაავადებათა კონტროლისა და საზოგადოებრივი ჯანმრთელობის ეროვნულ ცენტრთან. გუშინ მივიღეთ განახლებული დოკუმენტაცია, რომლის მიხედვით COVID 19-ზე ეჭვის შემთხვევაში უნდა ვუზრუნველყოთ კლინიკაში პაციენტების დროებით დაყოვნება და იზოლირება. ჩოხატაურის მუნიციპალიტეტში შპს „ჯანმრთელობის სახლი გურიაში“ და ჰოსპიტალური ქსელი მედალფაც მზად უნდა იყოს, რომ გარკვეული ხნის განმავლობაში COVID 19-ზე საეჭვო პაციენტის დაყოვნება შევძლოთ. ამისთვის ჩვენ, როგორც სამედიცინო დაწესებულება მზად ვართ. გამოყოფილია საიზოლაციო სივრცე, ექიმები, ექთნები, მათი თანაშემწეები უზრუნველყოფილი არიან ინდივიდუალური დაცვის საშუალებებით. ყოველდღიურად მიმდინარეობს ტრენინგები განახლებული ინფორმაციის კვალდაკვალ, ისე რომ დაყოვნების შემთხვევაში დაკვირვება შევძლოთ და საჭიროებისამებრ განცახორციელოთ შეტყობინება შესაბამის საზოგადოებრივი ჯანდაცვის ცენტრში. ჩვენ არ გვაქვს ინფექციური პროფილის მიმართულება, ამ ეტაპზე შეგვიძლია მინიმუმ 2 მაქსიმუმ 6 პაციენტის დაყოვნება. შემდგომში, რა დირექტივასაც მივიღებთ, ვეცდებით რომ განვახორციელოთ“,_ ამბობს სალომე გუდავაძე.
ჩოხატაურის მედალფას სამედიცინო ცენტრის დირექტორი, ანტონ ხუნდაძე, ჩვენთან საუბრისას ამბობს, რომ თუ თვითიზოლაციაში მყოფ ადამიანს გაურთულდება მდგომარეობა მას ეპიდსამსახური აკონტროლებს და ჯერ ვირუსზე შეამოწმებენ და შემდეგ გადაამისამართებენ. მედალფაში თვითიზოლაციაში მყოფი საეჭვო პაციენტი ვერ მოხვდება, მაგრამ თუ პირი არ იმყოფება იზოლაციაში და სიპმტომები გამოუვლინდა, მაშინ კლინიკა მზადაა მის დასაყოვნებლად.
„ვთქვათ არის თვითიზოლაციაში და მეოთხე, მეხუთე დღეს სიცხე მოემატა, ხველა დაეწყო მშრალი_ ასეთი პაციენტი ჩვენთან კლინიკაში ვერ მოხვდება. მას ეპიდსამსაური აკონტროლებს და თუ ასეთი მოვლენები დაეწყო ის გადაყვანილი იქნება შესაბამის ადგილზე, სადაც მას ვირუსზე შეამოწმებენ და შემდეგ გადაამისამართებენ. ჩვენნაირ კლინიკაში საეჭვო პაციენტი ვერ მოხვდება. ჩვენთან არ შეიძლება ასეთი პაციენტის მოყვანა. თუ მოვა პაციენტი და იტყვის, რომ აქვს რაღაც სიმპტომები მაგრამ იზოლაციაში არ იმყოფება, ასეთ საეჭვო პიროვნებას დროებით დავაყოვნებთ, მოხდება იზოლაცია, შევატყობინებთ ეპიდემიოლოგს, გამოძახებული იქნება შესაბამისი რეფერალი და მოხდება მისი გადაყვანა. ანალიზის გაკეთება ჩვენთან არ ხდება. მოსახლეობა ინფორმირებულია, რომ ოჯახის ექიმს მიმართოს დისტანციურად. გაფრთხილებულია ექიმები, რომ სანამ კლინიკაში მოიყვანენ გამოკითხონ სად იყო, ვისთან ჰქონდა კონტაქტი. განსაზღვრულია ტაქტიკა როგორ მოვიქცეთ. ჩვენ არ ვართ ის დაწესებულება, რომ იზოლაციაში ვამყოფოთ პაციენტები. შეგვიძლია მხოლოდ დაყოვნება. გამოყოფილია საკარანტინო და სამკურნალო ადგილები და თუ მოიმატა შემთხვევათა რაოდენობამ სახელმწიფო გამონახავს ცალკე ადგილებს, თუ საჭირო გახდა, გურიაშიც გამოინახება ალბათ“,_ამბობს ხუნდაძე და აღნიშნავს, რომ კორნავირუსთან დაკავშირებული ჭორების გამო ადამიანს შეიძლება რამე ატკივდეს, მაგრამ საავადმყოფოში მისვლის ეშინია.
„შეიძლება პაციენტი გადავიყვანოთ ოზურგეთში გამოსაკვლევად, მაგრამ საავადმყოფოსთან მანქანას რომ ხედავენ, ფიქრობენ, რომ კორონავირუსიანი პაციენტი მიგვყავს და თუ რამე სტიკვდებათ თვითმკურნალობას მიმართავენ, რაც გაცილებით სახიფათოა. მინდა დავამშვიდო საზოგადოება, რომ ჩვენთან კორონავირუსიან პაციენტს ვერ შეხვდებიან“,_ ამბობს ხუნდაძე.
