ადგილობრივთა ინფორმაციით, ლანჩხუთის მუნიციპალიტეტის სოფელ სუფსაში მდებარე მოსასვენებელი პარკის, რომლის მოსაწყობად 2015 წელს 212 777 ლარის ღირებულების სამუშაოები გახორციელდა, სანიაღვრე არხი მოწესრიგებას საჭიროებს. მათივე თქმით, არხის გაუმართაობის გამო, წვიმიან ამინდში, მიმდებარე ტერიტორიაზე მცხოვრებლებს ეზოები ეტბორებათ.
ჯაფარიძეების ოჯახი, რომელიც აღნიშნული სკვერის წინ ცხოვრობს, პრობლემის მოსაგვარებლად დახმარებას ითხოვს.
“არხი, რომელიც ამ პარკთან გადის, მოსაწესრიგებელია, წყალს ვერ ატარებს, წვიმიან ამინდში წყალი ეზოში გვივარდება და საცხოვრებელ სახლსაც გვიზიანებს. პირველ სართულზე დანესტილია ყველაფერი. გასაწმენდიცაა ეს არხი და მაგრამ მთავარი პრობლემა ისაა, რომ თავად არხია გასასწორებელი, წყალი რომ გაატაროს. იყო მერიის ინფრასტრუქტურის სამსახურიდან თანამშრომელი მოსული, ნახა ადგილზე ყველაფერი და მაგრამ ჯერ არაფერი ჩანს. მარტო მე არ მაწუხებს ეს პრობლემა _ ამ არხის გამო, წვიმის დროს სხვებსაც ეტბორებათ ეზო. მაგრამ, როგორც ჩანს, სხვებისთვის ეს ნაკლებად მტკივნეულია, რადგან მხოლოდ მე და ჩემს გვერდით მდებარე ოჯახს ჩამოგვდის წყალი პირდაპირ სახლთან. მოგვაქციოს ვიღაცამ ყურადღება, რომ პრობლემა მოგვარდეს და ეზო წყლით აღარ მევსებოდეს”, _ ამბობს “გურია ნიუსთან” საუბარში ჯაფარიძეების ოჯახის დიასახლისი.
ლანჩხუთის მერიის ინფრასტრუქტურის სამსახურის უფროსი ლევან ჩხაიძე კი ამბობს, რომ ერთადერთი მიზეზი, რის გამოც არხი წყალს სათანადოდ ვერ ატარებს, თავად აქაური მოსახლეობის დაუდევრობაა:
“ის, რაც იქ ხდება, სანიაღვრე არხის გაუმართაობა კი არ არის, უფრო სანიაღვრე არხის გაუწმენდაობაა. ეს არხი სადაც გადის, მოსახლეობას უკანა ეზოდ აქვს მიჩნეული და ნაგავს ყრის. სოფლის ცენტრისკენ არხი მილებში გადის, სწორედ აქ იჭედება ეს მოგროვებული ნაგავი და მერე იტბორება მოსახლეობის ეზოები. ყველაფერი მოსახლეობისვე დაუდევრობით ხდება, არაფერ შუაშია აქ გაუმართაობა.
იყო ადგილზე მისული ჩვენი თანამშრომელი, გასაწმენდია ეს არხი, უბრალოდ, ნიჩბით და მილებში დაგროვილი ნაგავია გასატანი, წყალი რომ გაატაროს. ბეტონის დაზიანებას ტყუილად იჩემებენ, მოსახლეობის ეზოებში გადის ეს არხი, ჩაღობილები აქვთ და ყრიან ყველაფერს შიგ“, _ განმარტავს ლევან ჩხაიძე.
ავტორი
