შეზღუდული შესაძლებლობის მქონე პირმა თამუნა ლურსმანაშვილმა დემოკრატიული ჩართულობის ცენტრში პრესკონფერენცია გამართა. შეხვედრას მედიისა და არასამთავრობო ორგანიზაციების წარმომადგენლები ესწრებოდნენ.
ლურსმანაშვილის თქმით, ქალაქ ოზურგეთის მერიის პრესსამსახურმა სოციალურ ქსელში გაავრცელა მისი და ყოფილი მერის ბეგლარ სიორიძის ფოტო, რაზეც, როგორც შშმ პირი ამბობს, მერიის თანამშრომლებმა აღნიშნულ ფოტოზე მის მიმართ შეურაცხმყოფელი კომენტარები დაწერეს:
_ ყველა ერთად თავს დამესხა და დამადანაშაულეს იმაში, რომ მე ვყოფილვარ უმადური ანგელოზი, კონკრეტულად მარინა ვასაძემ მიწოდა ანგელოზი, რომელიც შემდეგ ეშმაკად გადავიქეცი, იმიტომ, რომ გამოვხატე ჩემი აზრი და ღიად დავუჭირე მხარი დამოუკიდებელ კანდიდატს. მე ჩემს უფლებებს ვიცავდი. მინდა, რომ ჩემი ქალაქი იყოს ადაპტირებული და შემეძლოს გადაადგილება. კი, ნამდვილად კეთდებოდა პანდუსები, მაგრამ ვერ ვსარგებლობთ შეზღუდული შესაძლებლობის მქონე პირები. უბრალოდ. არ მინდა, რომ საზოგადოება ჩემზე ასე ფიქრობდეს. მე არც უმადური ვარ და არც ეშმაკი. ვხედავდი, იმას, რაც კეთდებოდა ყოფილი მერის დროს, კიდევ ერთხელ ვიმეორებ, მინდა ჩემი ქალაქი თანდათან შეიცვალოს და ყველა შეზღუდული შესაძლებლობის მქონე პირს შეეძლოს ყველგან გადაადგილება, _თქვა თამუნა ლურსმანაშვილმა.
_ დავიწყოთ იმით, რომ შეზღუდული შესაძლებლობები არ არსებობს. თამუნა ლურსმანაშვილი კი ამ სიტყვების ნათელი მაგალითია, რომელიც საზოგადოების სრულფასოვანი წევრი ყოველთვის იყო და არის! პირადად მე არაერთხელ მითანამშრომლია თამუნასთან. ვინაიდან თამუნა ლურსმანაშვილთან დაკავშირებული მოვლენები ჩემთან კავშირშიც განიხილება და საზოგადოების მაღალი ინტერესი გამოიწვია, მინდა ყველამ სრული სიმართლე იცოდეს და არა კონტექსტიდან ამოგლეჯილ ფაქტებზე დაყრდნობით იმსჯელოს. მიმდინარე წელს, თვითმართველობის არჩევნებთან დაკავშირებით წინასაარჩევნო კამპანიის ფარგლებში მერობის კანდიდატი ბეგი სიორიძე ოზურგეთში არსებულ არასამთავრობო სექტორის წარმომადგენლებს შეხვდა. შეხვედრაზე ასოციაცია “გურიას“ სახელით, თამუნა ლურსმანაშვილიც იმყოფებოდა. შეხვედრაზე მერობის კანდიდატის ბეგი სიორიძის მერობის პერიოდში გახორციელებული და მერად არჩევის შემთხვევაში გასახორციელებელი პროექტები განიხილეს და შეაფასეს, სადაც თამუნა ლურსმანაშვილმა მერის საქმიანობა დადებითად შეაფასა, თუმცა, აღნიშნა, რომ ქალაქში ჯერ კიდევ არ არის შექმნილი გასაკუთრებული საჭიროების მქონე პირთათვის სათანადო გარემო.
პ.ს. არსებობს ამ შეხვედრის ვიდეო ჩანაწერიც, რომელიც მერობის კანდიდატის ოფიციალურ ფეისბუქგვერდზე გავრცელდა. ვინაიდან თამუნა ყოველთვის აქტიურად გამოხატავდა კეთილგანწყობას ბეგლარ სიორიძის მიმართ და სამი წლის მანძილზე ინტენსიურად თანამშრომლობდა, როგორც მერთან, ასევე, ქალაქ ოზურგეთის მუნიციპალიტეტის მერიასთან, განსაკუთრებული საჭიროების მქონე პირთათვის ადაპტირებული გარემოს შექმნის საკითხებზე. სწორედ მისი პირადი კეთილგანწყობის გამო გადავწყვიტეთ, რომ თამუნა ლურსმანაშვილისთვის შეგვეთავაზებინა, მერობის კანდიდატის მხარადსაჭერ ვიდეო-რგოლში მონაწილეობის მიღება. მან მიიღო შეთავაზება და გვთხოვა, მისთვის მერის საარჩევნო პროგრამა გაგვეცნო. აქ საუბარიც კი ზედმეტია დაძალებაზე. თუმცა, ამის შემდეგ თამუნა ლურსმანაშვილი აღარ შეგვხმიანებია. ჩემთვის გაუგებარია, თუ რისთვის დასჭირდა ლურსმანაშვილს ჩვენი სატელეფონო საუბრის ამდაგვარი ინტერპრეტაცია. რაც შეეხება სოციალურ ქსელში გავრცელებულ ფოტოს, ბრალდებების ადრესატი მე ვერანაირად ვერ ვიქნები, იმ მარტივი მიზეზის გამო, რომ აღნიშნულ ფოტოზე, გარდა ფოტოს სათაურისა, ‘’ჩვენ ერთად გადავლახავთ ბარიერებს’’, სხვა კომენტარი არ დამიწერია. ყველაფერთან დაკავშირებით, რაზეც ვისაუბრე, არსებობს ფაქტები. დასკვნა კი საზოგადოებამ გააკეთოს, _ ამბობს შარაძე.
მერიის თანამშრომელი მარინა ვასაძე “გურია ნიუსთან“ ამბობს _ ეს არის მამა პეტრეს სიტყვები და ეს არ ეკუთვნოდა თამუნა ლურსმანაშვილს:
_ ვგულისხმობდი, ზოგადად, საზოგადოებას. მქონდა მასთან კარგი ურთიერთობა, ეს არ ეკუთვნოდა კონკრეტულად მას. ზოგადად, ადამიანები მადლიერები უნდა იყვნენ ერთმანეთის. ეტყობა ვიღაცები არიან ამ თემით დაინტერსებულნი, რომ ჭიქაში ატყდეს ქარიშხალი, მე ველოდებოდი, რომ პრესკონფერენციაზე დამიძახებდნენ, სადაც ჟურნალისტებთან გავაკეთებდი ახსნა-განმარტებას და თუ საწირო გახდებოდა ბოდიშსაც მოვიხდიდი, სასწრაფო დახმარება დამჭირდა ისე ვინერვიულე და აქეთ ვარ დაზარალებული, _ამბობს ვასაძე.
