გურიაში დიდთოვლობამ არაერთი პრობლემა შექმნა. სოფლების უმეტესობა ამ დრომდე გარესამყაროს მოწყვეტილია. გასაწმენდია გზები, არ არის ელექტროენერგია. რეგიონი, სადაც წლებია ამხელა თოვლი არ მოსულა, დიდთოვლიანობას სათანადოდ მომზადებული ვერ შეხვდა. შედეგად სოფლებში ჩარჩენილ ხალხს საჭირო რაოდენობის საკვები და მედიკამენტები არ აქვთ, რითაც ამ რთულ დღეებში თავს გაიტანენ, გზაც სათანადოდ ვერ იწმინდება.
ადამიანები სხვადასხვა სოფლებში ჩარჩენილ ოჯახებამდე მიღწევას მაღალი გამავლობის ტრანსპორტით ცდილობენ.
დიდთოვლობის შედეგად დაზარალებული ოჯახების დასახმარებლად რეგიონში “ოფ როუდის” წევრებიც ჩავიდნენ, თუმცა გზის ზოგიერთ მონაკვეთზე გადაადგილება მათაც უჭირთ.
“ჩემი და ჩემი მეგობრების ოჯახის წევრები, ბებია-ბაბუები, სოფელში არიან ჩარჩენილი. საკვები უმთავრდებათ. გუშინ გვიან ღამემდე, 5-ის ნახევრამდე ვცდილობდით ზემო ხეთში ასვლას ოფ- როუდის ბიჭებთან ერთად. ჩამოწოლილია ხეები. ჯერჯერობით თოვს და ამ დროისთვის ვერცერთი მიმართულებით ვერ მივდივართ. ველოდებით ოფ-როუდის ბიჭებს და კალაგონის მიმართულებით გვინდა ასვლა, თუ შევძელით. ტრაქტორია საჭირო. არცერთ ამ სოფელში, არც კალაგონში, არც ზემოხეთში, ტრაქტორი არ ამოსულა, არც მოხალისეები არ ამოსულან. მარტო ჩვენი ძალებით ვერაფერს ვერ ვიზამთ,”_ ამბობს “გურია ნიუსთან” ვახო ხუნდაძე, რომელიც ამავე სოფლიდან არის და ამჟამად ჯერ კიდევ გზაშია და ოჯახის წევრებთან მისვლას დასახმარებლად, ვერ ახერხებს.
