მმართველი გუნდის წარმომადგენელი, რევაზ არველაძე მინისტრთა კაბინეტიდან იუსტიციის მინისტრის, თეა წულუკიანის შესაძლო წასვლას ეხმაურება. როგორც არველაძე ,,გურია ნიუსს“ ეუბნება, წულუკიანის გადადგომას საკმაოდ ბევრი ადამიანი ითხოვს, თუმცა, მისი თქმით, დატოვებს თუ არა იუსტიციის მინისტრი თანამდებობას, პრემიერის გადასაწყვეტია. ამასთან, არველაძე აცხადებს, რომ თავად წულუკიანის აზრით, იუსტიციის მინისტრის პოსტზე საკუთარი თავი ამ ეტაპზე არ ამოუწურავს.
,,თეა წულუკიანი იქნება თუ არა ახალ მინისტრთა კაბინეტში უნდა გადაწყვიტოს აღმასრულებელი ხელისუფლების ხელმძღვანელმა, ბახტაძემ. თუ ბახტაძეს მიაჩნია, რომ წულუკიანი კარგად მუშაობს, ეს ერთი მხარეა. პარლამენტში, რაც შემოდის სამი ტალღა სასამართლო რეფორმისა, თითქოს ნორმალურია, მაგრამ ძალიან ბევრი ადამიანი თვლის, როგორც პარლამენტში, ისე გარედან არასამთავრობოებისა და საზოგადოების ნაწილი, რომ უნდა წავიდეს. წულუკიანმა იუსტიციის მინისტრის პოსტზე ამოწურა თუ არა თავი, მისი ინიციატივებიდან გამოჩნდება. თვითონ იძახის, რომ არაფერი ამოუწურავს და ბევრი რაღაცის კეთება კიდევ შეუძლია“, _ გვითხრა არველაძემ.
ცნობისთვის, დღეს ცნობილი გახდა, რომ 14 სამინისტროდან ფუნქციონირებას 10 სამინისტრო და ერთი სახელმწიფო მინისტრის აპარატი გააგრძელებს. ამასთან, დატოვებს თუ არა წულუკიანი იუსტიციის მინისტრის პოსტს, უახლოეს მომავალში გახდება ცნობილი.
