ლანჩხუთის ცენტრში, პირველი საჯარო სკოლისა და კლინიკა “მედალფას” მიმდებარე ტერიტორია, სადაც ავტობანიდან ამომავალი გზა ცენტრალურ ავტომაგისტრალს უკავშირდება, აქ მომხდარი ხშირი ავტოსაგზაო შემთხვევებიდან გამომდინარე, ადგილობრივი მოსახლეობის მთავარ პრობლემად იქცა.
მარტო იანვრის მიწურულს, აქ სამი დღის შუალედით ორჯერ მოხდა ავტოავარია _ ჯერ მთავარი მაგისტრალიდან ავტობანის გადასახვევის კვეთაზე ავტობანით ბათუმისკენ მიმავალმა მსუბუქმა მანქანამ შეუჩერებლად გაიარა და მას მაგისტრალზე მოძრავი ყველგანმავალი დაეჯახა. შეჯახება იმდენად ძლიერი იყო, რომ ერთი ავტომობილი პირველი საჯარო სკოლის ეზოს კუთხესთან აღმოჩნდა. მიმდინარე კვირის დასაწყისში ამავე ტერიტორიაზე ავარიაში სასწრაფო დახმარების მანქანა მოჰყვა. საბედნიეროდ, ორივე შემთხვევა მსხვერპლის გარეშე დასრულდა, თუმცა, ლანჩხუთელი მოქალაქეების თქმით, შექმნილი ვითარებიდან გამომდინარე, უკვე წლებია, “მსხვერპლის შიშის მოლოდინის რეჟიმში” უწევთ ცხოვრება.
“ძალიან შეუფერებელი ადგილია ავტობანის გზისთვის. ხომ შეიძლებოდა სხვაგან გაეკეთებინათ ასასვლელი, ქალაქის თავში რომ გააკეთეს? მაქაა სკოლა, ბინები, საავადმყოფო და რა ვიცი, რამდენი რამე. ცარიელი ადგილი არ მოიძებნა, ხომ?
სკოლის მოსწავლეების მშობლებმაც მოვითხოვეთ, ხელმოწერებიც მოვაგროვეთ, მაგრამ ყურადღებას არავინ გვაქცევს. ვინმე რომ მოკვდება, მაშინ გააკეთებენ აუცილებლად, ისე არა. არასწორად დაპროექტებულია ეგ მონაკვეთი. პირველი შემთხვევა არ არის და სასწრაფოდ შუქნიშანია საჭირო. რა გახდა ერთი შუქნიშანი აქ. მართლა რა ფეხებზე დაკიდება და უპასუხისმგებლობაა.
ძალიან საშიში მდგომარეობაა ამ ადგილას, ტრაილერმა კინაღამ მიკროავტობუსი გაიტანა, რომელშიც ბავშვი იჯდა.
ფაქტი ისაა, რომ აქ ავტობანიდან ამოსასვლელი არ უნდა გაკეთებულიყო, არასწორადაა ადგილი შერჩეული და იმიტომაც ხდება ამდენი ავტოსაგზაო შემთხვევა გზის ამ მონაკვეთზე. გზაჯვარედინია, ყველა მხრიდან მანქანები მოძრაობენ, თან სკოლაც აქვეა, კლინიკაც, ზემოთა ქუჩიდან სასწრაფოები ჩამოდიან. ეს რა უბედურება გააკეთეს, სრული ქაოსია ამ მონაკვეთზე. ეს უკვე მერამდენე ავარიაა და სანამ მართლა საშინელება არ მოხდება, მანამ არავინ მიაქცევს ყურადღებას?!
გახსნის დღიდან არაერთი ავტოსაგზაო შემთხვევა მოხდა, ზოგი მანქანა ისე დაიმტვრა, ჯართში ჩასაბარებლად თუ გამოდგება. მაინცდამაინც ადამიანი უნდა შეეწიროს, ვინმემ ყურად რომ იღოს ეს პრობლემა?! აქვე სკოლაა და ხან მშობლები, ხან ბავშვები დგანან. აქ მომხდარი ავარიებიდან სასწაულებრივადაა გადარჩენილი ბევრი. “ზებრაზე” დაეჯახა მანქანა სკოლიდან გამომავალ ბავშვს, საბედნიეროდ, ბავშვი გადარჩა.
სასწრაფო სამედიცინო დახმარების მანქანებსაც სკოლის მხრიდან უწევთ ჩამოსვლა, “ავერსის” კლინიკაც აქვეა, მოკლედ სრული ქაოსია, ასეთი საშიში საავარიო ადგილი არსად არ არის. არც შუქნიშანია და არც რაიმე დამაბრკოლებელი”, _ უკვე წლებია ხმამაღლა ამბობენ ლანჩხუთელები.
ის, რომ ავტომაგისტრალის ჯაპანა-ლანჩხუთის მონაკვეთის გახსნით სატრანსპორტო ნაკადების გამტარუნარიანობა გაიზარდა და შეუფერხებელი სატრანსპორტო მიმოსვლის უზრუნველყოფაც მოხდა, ამაზე მოქალაქეები არ დაობენ. მათი უკმაყოფილება გზის იმ მონაკვეთს უკავშირდება, რომლითაც ავტობანი ცენტრალურ ავტომაგისტრალს უკავშირდება. ეს გზა, ფაქტობრივად, ქალაქის ცენტრში, პირველი საჯარო სკოლისა და “ავერსის” კლინიკის მიმდებარე ტერიტორიაზე ამოდის და მოსახლეობის თქმით, განვითარებული მოვლენებიდან გამომდინარე, საფრთხის შემცველია.
მოსახლეობის ერთი ნაწილი მიიჩნევს, რომ შექმნილი მდგომარეობის გამოსწორების მიზნით, პირველი საჯარო სკოლის შენობასთან შუქნიშნის დადგმაა აუცილებელი. თუმცა, მეორე ნაწილის აზრით, შუქნიშანი საცობს წარმოქმნის და კიდევ უფრო გაართულებს სიტუაციას. ისინი მიიჩნევენ, რომ გამოსავალი ე. წ. “წრიულის” გაკეთებაა: “არ არის აქ საჭირო შუქნიშანი, საცობი იქნება. ერთი წრიული რომ გააკეთონ, საკმარისია, კომფორტულია უფრო და უსაფრთხო”.
ზოგადად კი, ლანჩხუთში უმრავლესობა მიიჩნევს, რომ ავტობანიდან ამოსასვლელი ქალაქის ცენტრში არ უნდა გაკეთებულიყო.
“ვის მოაფიქრდა ქალაქის ცენტრში, ხალხმრავალ ადგილას გაეკეთებინა ეს?! ქალაქიდან უნდა გასულიყვნენ და შემდეგ ამოეყვანათ ეს გზა. ღმერთმა ყველა დაგვიფაროს, მაგრამ ეს პრობლემა დროზე უნდა მოგვარდეს. სკოლასთან ახლოს ეს შეიძლებოდა, ან კლინიკასთან, სადაც სულ სასწრაფოები მოძრაობს?! შვილებს გულის კანკალით ვუშვებთ სკოლაში. საქმე ბავშვებს ეხება და რაიმე რომ მოხდეს, ვინ იქნება პასუხისმგებელი?!
ხელმოწერები შევაგროვეთ, სკოლას გადავეცით. სკოლამაც მიმართა შესაბამის ორგანოებს, მაგრამ ყურადღებას არავინ აქცევს. მსხვერპლის შიშის მოლოდინის რეჟიმი როდის უნდა დასრულდეს?” _ გზის ზემოთ ნახსენებ მონაკვეთთან დაკავშირებით ლანჩხუთელები სოციალურ ქსელშიც აქტიურობენ.
საგულისხმოა, რომ გზის იმ მონაკვეთზე შექმნილ მდგომარეობასთან დაკავშირებით, რომლითაც ლანჩხუთში ავტობანი ცენტრალურ ავტომაგისტრალს უკავშირდება, არახალია და გახსნის დღიდან აქ მომხდარი ავტოსაგზაო შემთხვევების გამო არაერთხელ გამხდარა მოსახლეობის გულისწყრომის ობიექტი. აქედან გამომდინარე, თავის დროზე “გურია ნიუსი” საკითხთან დაკავშირებით საავტომობილო გზების დეპარტამენტსაც დაუკავშირდა. როგორც მაშინ უწყების პრესსამსახურში გვითხრეს, აღნიშნული პრობლემის თაობაზე მათ არაფერი სმენიათ და ისიც დაგვიკონკრეტეს, რომ დეპარტამენტის ფუნქციაში არ შედის შუქნიშნების დაყენება _ ამის თაობაზე მოქალაქეებმა ადგილობრივ ხელმძღვანელობას უნდა მიმართონ:
“მომატებული ავტოსაგზაო შემთხვევები პირდაპირ კავშირშია გაუმჯობესებულ გზის საფართან, ამიტომ მათი თავიდან აცილებისთვის საჭიროა ყველა დაემორჩილოს დაწესებულ საგზაო წესებს. თუკი მოსახვევში არ შემოვლენ გადამეტებული სიჩქარით და დადგენილ წესებს დაემორჩილებიან, ავარიის შემთხვევებიც არ იქნება. საგზაო დეპარტამენტი კომპეტენციაში არ შედის შუქნიშნების დაყენება _ ამის თაობაზე მოქალაქეებმა ადგილობრივ თვითმმართველობებს უნდა მიმართონ.
პროექტის მიხედვით რაც იყო გათვალისწინებული საგზაო უსაფრთხოების კუთხით, ყველაფერი შესრულებულია, თუ დამატებით რაიმე არის საჭირო, წერილი უნდა გამოაგზავნონ ადგილობრივი მუნიციპალიტეტიდან გზების დეპარტამენტში. შესაბამისი სამსახური ადგილზე შეისწავლის საკითხს და ყველა შესაბამისი ღონისძიება გატარდება დამატებით”, _ გვითხრეს მაშინ გზების დეპარტამენტში.
ადგილობრივ ხელისუფლებისგან კი მაშინ საკითხთან დაკავშირებით პასუხად მივიღეთ, რომ აღნიშნულ საკითხთან დაკავშირებით კომუნიკაცია ჰქონდათ შესაბამის უწყებებთან, თუმცა, იქედან გამომდინარე, რომ ცენტრალურ მაგისტრალზე ფიზიკურად არ ხდება შუქნიშნის დაყენება, მოსახლეობის ეს მოთხოვნა ვერ დაკმაყოფილდებოდა:
“ამ საკითხზე ჩვენ მივმართეთ შესაბამის უწყებას, თუმცა, ცენტრალურ ავტომაგისტრალზე ფიზიკურად არ ხდება შუქნიშნის დაყენება. უბრალოდ, პერიფერიულ გზაზე შეზღუდვაა დაწესებული სათანადო საგზაო ნიშნით, რომ ცენტრალურ მაგისტრალზე მანქანა გაატაროს და შემდეგ გავიდეს. აღმაშენებლის ქუჩა ამ ეტაპზე არის საერთაშორისო მნიშვნელობის გზა და ამიტომაც ვერ დგება შუქნიშანი”, _ გვითხრეს მაშინ მერიის ინფრასტრუქტურის სამსახურში.
მოკლედ, უკვე წლებია ლანჩხუთელებს “შიშის რეჟიმში” ცხოვრება და დიდი ალბათობით, ეს მანამ გაგრძელდება, სანამ ავტომაგისტრალის ლანჩხუთი-ხაჯალიის მონაკვეთი არ გაიხსნება, რომლის მშენებლობაც, ჩვენი ინფორმაციით, დაიწყო.
ავტორი
