,,აშშ–ს კონგრესში საქართველოს დახმარების საკითხს განიხილავენ, უკვე ტრაგიკულია,“ – ამის შესახებ ამერიკის შეერთებული შტატების თადარიგის პოლკოვნიკმა, საგარეო პოლიტიკის კვლევის ინსტიტუტის მკვლევარმა, ომის კოლეჯის პროფესორმა, რობერტ ჰამილტონმა ამერიკის ხმასთან ინტერვიუში ისაუბრა.
მისი თქმით, დისკუსიები რომელიც მიმდინარეობს საქართველოსთვის ტრაგიკულია.
“ვფიქრობ, რომ თავად ის ფაქტიც, რომ კონგრესში განიხილავენ საქართველოსადმი ამერიკის დახმარების გადახედვის, ან საქართველოს მთავრობის ზოგიერთი წარმომადგენლის სანქცირების საკითხს, – თავად ის ფაქტიც კი, რომ ეს დისკუსიები ხდება, არის მოვლენათა ტრაგიკული განვითარება საქართველოსთვის“, – თქვა ჰამილტონმა.
მისი შეფასებით, უკრაინის ომი ერთგვარი შესაძლებლობა იყო საქართველოსთვის კიდევ უფრო დაახლოებულიყო NATO-ს, თუმცა ეს “ხელიდან გაშვებული შანსი” აღმოჩნდა.
“ომი უკრაინაში თავისთავად ტრაგიკული მოვლენაა. რუსეთის არაპროვოცირებული შეჭრა NATO-ს პარტნიორ და ასპირანტ ქვეყანაში, ყველანაირად გაუმართლებელია, მაგრამ ეს, ასევე არის შესაძლებლობა საქართველოსთვის, რომ მიაღწიოს NATO-სთან უფრო ახლო პარტნიორობას და გაამყაროს ალიანსთან მისი ურთიერთობა. იმისთვის, რომ ის დაინახონ უკრაინის გვერდით. 2008 წლის ბუქარესტის სამიტიდან მოყოლებული საქართველოს და უკრაინას ყოველთვის ერთად ახსენებდნენ ხოლმე, საქართველოსთვის სამწუხაროდ, ვფიქრობ ამ ომმა აჩვენა მნიშვნელოვანი განსხვავება არა მხოლოდ სამხედრო შესაძლებლობების კუთხით, არამედ მათი მზაობის კუთხითაც, იყვნენ NATO-ს პარტნიორები და გააკეთონ ის, რასაც NATO-ს წევრები აკეთებენ. ვფიქრობ, რომ ეს ხელიდან გაშვებული შესაძლებლობაა და ის, რომ ამერიკის კონგრესში საქართველოს დახმარების გადახედვის, ან ზოგიერთი ქართველის სანქცირების შესახებ მსჯელობენ, ნამდვილად ტრაგიკულია. და როცა ეს მოხდება, ეს ძალიან სევდიანი დღე იქნება საქართველოსთვის“, – აღნიშნა ჰამილტონმა ინტერვიუში.
ჰამილტონმა ასევე ისაუბრა “ქართული ოცნების” ნარატივის შესახებ, რომ თითქოს დასავლეთი ომში ითრევს საქართველოს და ხაზგასმით აღნიშნა, “სიმართლისგან ასე შორს არაფერია“.
“სამწუხაროდ, ესაა მართლაც ერთ–ერთი ყველაზე ნაკლებად გამოსადეგი რამ, რაც საქართველოს მთავრობას გაუკეთებია უკრაინაში ომზე პასუხად – ეს ნარატივი, რომ დასავლეთს და NATO-ს სურთ საქართველოს ომში ჩათრევა. რა თქმა უნდა, სიმართლისგან ამაზე შორს არაფერია. ეს უბრალოდ სიყალბეა. ვვარაუდობ, რომ ადამიანებმა, რომლებიც ამას ამბობენ, იციან, რომ ეს სიცრუეა, მაგრამ ამას მაინც აკეთებენ იმ პოზიციის გასამართლებლად, რაც საქართველოს უკრაინაში ომის მიმართ აქვს. კიდევ ერთხელ ვამბობ, ეს მართლა სამწუხაროა. ეს არ ასახავს საქართველოს. ეს არაფრით ეხმარება NATO-ს და კოლექტიურად, დასავლეთს რუსეთის აგრესიასთან გამკლავებაში“, – თქვა აშშ–ს თადარიგის პოლკოვნიკმა.
შეგახსენებთ, რომ 17 ნოემბერს აშშ–ის სენატის საგარეო ურთიერთობათა კომიტეტის სხდომაზე საქართველოს საკითხი განიხილეს.
სენატორებმა აღნიშნეს, რომ ამერიკის შეერთებული შტატების მხრიდან საქართველოს დახმარების სისტემა, შესაძლოა, შეიცვალოს.
“სამწუხაროა. ეს არ ასახავს საქართველოს. ეს არაფრით ეხმარება NATO-ს და კოლექტიურად, დასავლეთს რუსეთის აგრესიასთან გამკლავებაში“, – თქვა მან.
ავტორი
