აშშ-ის სახელმწიფო დეპარტამენტი აპირებს სანქციების დაწესებას ისრაელის თავდაცვის ძალების ერთ-ერთი ქვედანაყოფის, „ნეცაჰ იეჰუდას“ წინააღმდეგ. ამის შესახებ axios.com წერს.
როგორც გამოცემა წყაროებზე დაყრდნობით წერს, ამერიკის უწყების ცნობით, ამ სამხედრო ნაწილის ჯარისკაცები მდინარე იორდანეს დასავლეთ ნაპირზე პალესტინელი არაბების უფლებებს არღვევენ.
„ნეცაჰ იეჰუდაში“ სამხედრო სამსახურს გადიან ისრაელელები ულტრარელიგიური თემებიდან. სანქციები ნიშნავს, რომ ქვედანაყოფს არ შეუძლია მიიღოს არავითარი ამერიკული დახმარება ან გაიაროს წვრთნა ამერიკელ ინსტრუქტორებთან.
axios.com თან საუბარში წყაროებმა განაცხადეს, რომ გადაწყვეტილება მიღებულია ბატალიონის საქმიანობის შესახებ სახელმწიფო დეპარტამენტის სპეციალური კომისიის გამოძიების საფუძველზე. საქმის განხილვა 2022 წლის ბოლოს დაიწყო მას შემდეგ, რაც გავრცელდა ცნობები პალესტინელების მიმართ ძალადობასთან სამხედრო მოსამსახურეების კავშირის შესახებ.
Axios-ის თანახმად, გამოძიების ერთ-ერთი საბაბი გახდა 78 წლის პალესტინური წარმოშობის ამერიკელის, ომარ ასადის სიკვდილი 2022 წლის იანვარში. „ნეცაჰ იეჰუდას“ ჯარისკაცებმა ის დასავლეთ ნაპირის ერთ-ერთ სოფელში საგუშაგოზე დააკავეს. ასადმა უარი თქვა შემოწმებაზე. ამერიკელს ხელბორკილები დაადეს და სიცივეში დატოვეს. რამდენიმე საათის შემდეგ მას გული გაუჩერდა და ის გარდაიცვალა. გაზეთი წერს, რომ ორი ისრაელელი ოფიცერი სამსახურიდან დაითხოვეს.
2022 წლის დეკემბერში ისრაელმა დასავლეთ ნაპირიდან გაიყვანა „ნეცაჰ იეჰუდას“ ქვედანაყოფი. ამის შემდეგ ბატალიონი ძირითადად ქვეყნის ჩრდილოეთით იმყოფებოდა და ღაზის სექტორში საბრძოლო მოქმედებებში მონაწილეობდა.
ეს იქნება პირველი შემთხვევა, როდესაც შეერთებული შტატები სანქციებს დაუწესებს ისრაელის არმიის ქვედანაყოფს, აღნიშნავს Axios-ი. ამას შეიძლება მოჰყვეს სხვა მსგავსი ნაბიჯები ისრაელის თავდაცვის ძალებისა და ისრაელის პოლიციის იმ ქვედანაყოფების მიმართ, რომლებიც დასავლეთ ნაპირზე მოქმედებენ.
ისრაელის პრემიერ-მინისტრმა ბენიამინ ნეთანიაჰუმ „ნეცაჰ იეჰუდას“ ბატალიონის წინააღმდეგ შესაძლო სანქციებს აბსურდის მწვერვალი და მორალური ფსკერი უწოდა.
ავტორი
