ამ ვიზიტით კიდევ ერთხელ ხაზი გაესმევა საქართველოს ტერიტორიულ მთლიანობის მხარდაჭერას, _ ამის შესახებ აშშ-ში საქართველოს ელჩმა დავით ბაქრაძემ აეროპორტში მაიკ პომპეოსთან დახვდრისას განაცხადა.
მისივე თქმით, ძალიან მნიშვნელოვანია თავდაცვისა და უსაფრთხოების სფეროში თანამშრომლობა, რომელიც წარმოადგენს საქართველოსა და ამერიკის შეერთებული შტატებს შორის სტრატეგიული პარტნიორობის უმნიშვნელოვანეს მიმართულებას და ამ თვალსაზრისით ჩვენ გვექნება მნიშვნელოვანი დისკუსია.
„რეგიონში სტაბილურობისა და უსაფრთხოების მხარდასაჭერად საქართველოს როლის ხაზგასმა იქნება ერთ-ერთი მნიშვნელოვანი საკითხი. ამერიკის შეერთებული შტატები არის ჩვენი ქვეყნის ტერიტორიული მთლიანობის მტკიცე მხარდამჭერი. ამერიკის შეერთებულმა შტატებმა წლების განმავლობაში დაამტკიცა, რომ ის არაღიარების პოლიტიკა, რომელსაც საქართველო ახორციელებს, სწორედ ამერიკის შეერთებული შტატების მტკიცე მხარდაჭერით ხორციელდება. ჩვენ ამის არაერთი მნიშვნელოვანი ფაქტი და დადასტურება გვაქვს, რომელიც გამოიხატება მათ შორის საქართველოს მხარდამჭერი აქტით, ასევე აპროპრეაციების აქტით და ველოდებით, რომ ამ ვიზიტით კიდევ ერთხელ ხაზი გაესმევა საქართველოს ტერიტორიული მთლიანობის მხარდაჭერას. რასაკვირველია, ჩვენთვის ძალიან მნიშვნელოვანია თავდაცვისა და უსაფრთხოების სფეროში ჩვენი თანამშრომლობა, რომელიც წარმოადგენს საქართველოსა და ამერიკის შეერთებული შტატებს შორის სტრატეგიული პარტნიორობის უმნიშვნელოვანეს მიმართულებას და ამ თვალსაზრისით ჩვენ გვექნება მნიშვნელოვანი დისკუსია. კოვიდ-19-ის და მსოფლიოში შექმნილი ეკონომიკური ვითარების გათვალისწინებით, რა თქმა უნდა, ეკონომიკა და ვაჭრობის განვითარება ამერიკის შეერთებული შტატების მხრიდან როგორც საქართველოსთან, ასევე რეგიონთან საქართველოს გავლით იქნება მნიშვნელოვანი საკითხი, რომელსაც განვიხილავთ ამერიკის შეერთებული შტატების სახელმწიფო მდივანთან ერთად. მნიშვნელოვანი მაღალი დონის შეხვედრები იგეგმება საქართველოს პრეზიდენტთან, პრემიერ-მინისტრთან, პატრიარქთან. დარწმუნებულები ვართ, რომ ეს ვიზიტი იქნება ისეთივე შედეგიანი და კიდევ უფრო განამტკიცებს ჩვენს ურთიერთობებს, რომელიც დღეს არის უმაღლეს ნიშნულზე“,- განაცხადა ბაქრაძემ.
შეგახსენებთ, რომ აშშ სახელმწიფო მდივანი მაიკ პომპეო დღეს 8 საათზე ჩამოვა თბილისში. ის შეხვედრებს გამართავს საქართველოს პრემიერ-მინისტრთან, საქართველოს პრეზიდენტთან, საქართველოს კათოლიკოს-პატრიარქთან.
