მიმდინარე წელს დასავლეთ საქართველოში მოსულმა უხვმა თოვლმა ციტრუსოვანი მცენარეები და ხილი მნიშვნელოვნად დააზარალა. ზარალი განსაკუთრებით დიდია აჭარა-გურიასა და სამეგრელოში.
„აგროინვესტსერვისის“ დირექტორი, ვაჟა მკურნალაძე “კომერსანტთან” ამბობს, რომ ციტრუსოვანი ხეების 70% მძიმე გასხვლას საჭიროებს. მძიმედ გასხლული მანდარინის ხე მოსავალს რამდენიმე წლის განმავლობაში არ იძლევა. იმის გამო, რომ დასავლეთ საქართველოში ციტრუსოვანი კულტურის ბიზნესი მოუწესრიგებელია, ბაღების აბსოლუტური უმრავლესობა დაზღვევით არ სარგებლობს, ფერმერები არც რაიმე სახის ფინანსური დახმარების მიღებას ელოდებიან.
„მანდარინის ბაღებში ძალიან რთული მდგომარეობაა, სოფლებში, სადაც დიდთოვლობა იყო, მცენარეების 60-70% ან დაზიანებულია, ან ძალიან მძიმე გასხვლას საჭიროებს. მანდარინის ხეების მხოლოდ 30% გადარჩა, დანარჩენი თოვლმა მთლიანად გაანადგურა. ახლა აჭარა-გურიაში ციტრუსის ხეებს მძიმედ სხლავენ, პირდაპირ ვამბობ, რომ 4-5 წელი, ყველაზე მცირე, დასჭირდება ამ ნარგავებს, რომ ძველ კონდიცია აღიდგინოს და იმ მსხმოიარობას მიაღწიოს, რაც დიდთოვლობამდე ჰქონდა. მიმდინარე სეზონი ძალიან დაბალმოსავლიანი იქნება, რადგან ციტრუსოვანი მცენარეები განადგურებულია. მანდარინი ერთწლიანი მცენარე არაა, მის გაზრდას და ნაყოფის მიღებას საკმაო დრო სჭირდება. ჩემს წარმოდგენებიც კი არ მაქვს ჩამოყალიბებული, როგორ შეიძლება ამხელა ზარალის შემდეგ ფერმერებმა დახმარება მიიღონ. ეს სექტორი გამართული რომ იყოს და ტენდენციური სახე ჰქონდეს, მაშინ ბაღები დაზღვეული იქნებოდა და პრობლემაც არ შეიქმნებოდა, ახლა ძალიან რთულია იმის განსაზღვრა და დათვლა, თუ ვინ რა ზარალი მიიღო“,- თქვა ვაჟა მკურნალაძემ.
ვრცლად: კომერსანტი
