სახელმწიფო აუდიტის ინფორმაციით, საქართველოში სტიქიური მოვლენების შესახებ ადრეული გაფრთხილების სისტემის ეფექტიანობა დაბალია. ანგარიში, რომელიც სახელმწიფო აუდიტმა ახლახანს გამოაქვეყნა, 2022-2023 წლებში გახორციელებულ მონიტორინგს ასახავს.
დოკუმენტის თანახმად, მეტეოროლოგიური, ჰიდროლოგიური და გეოლოგიური მონაცემების საფუძველზე მომზადებული გაფრთხილებები მოსახლეობამდე დროულად და ეფექტიანად ვერ აღწევს.
როგორც ანგარიშის დასკვნაშია ნათქვამი:
_ არ არსებობს ერთიანი ცენტრალიზებული საინფორმაციო საკომუნიკაციო ტექნოლოგიების სისტემა (ICT), საგანგებო სიტუაციების ეროვნული სატელეკომუნიკაციო გეგმა და მასთან დაკავშირებული გამართული პროცესები, რათა დაინტერესებულ პირებამდე და ბუნებრივი კატასტროფის რისკის ქვეშ მყოფ საზოგადოებამდე გაფრთხილების შეტყობინებებმა მიაღწიოს სხვადასხვა საკომუნიკაციო არხის გამოყენებით. აღნიშნულის გამომწვევი ერთ-ერთი მიზეზია ყოვლისმომცველი სამართლებრივი ჩარჩოს არარსებობა, რომელიც განსაზღვრავდა ქვეყანაში ICT სისტემის და სატელეკომუნიკაციო გეგმის მნიშვნელობას. აღნიშნული ართულებს ქვეყანაში ადრეული გაფრთხილების სისტემის ელემენტების დანერგვის შესახებ ერთიანი ხედვის ჩამოყალიბებას. ამასთანვე, აღნიშნულ საკითხთან დაკავშირებულ უწყებებს შორის კოორდინაცია არ არის განვითარებული. ერთიანი ICT სისტემის, ეროვნული სატელეკომუნიკაციო გეგმის და გამართული პროცესების არარსებობა ასუსტებს EWS-ების ეფექტიანობას, ზრდის საზოგადოების დაუცველობას და აფერხებს ქვეყანაში კატასტროფების ეფექტიან მართვას.
სახელმწიფო აუდიტი რეკომენდაციას აძლევს ეროვნული უსაფრთხოების საბჭოს აპარატს: _საქართველოში მრავალმხრივი საფრთხეების ადრეული გაფრთხილების სისტემის შექმნისა და ეფექტიანი ფუნქციონირების მიზნით, ეროვნული უსაფრთხოების საბჭოს აპარატმა უზრუნველყოს კატასტროფის რისკის შემცირების ეროვნული სტრატეგიის შემუშავების პროცესის ორგანიზება და კოორდინაცია, ასევე ინციდენტის/მოსალოდნელი ან წარმოქმნილი საგანგებო სიტუაციის შესახებ შეტყობინების სისტემის დებულების პროექტის, როგორც ადრეული გაფრთხილების სისტემის ინტეგრირებული და ყოვლისმომცველი ჩარჩო დოკუმენტის შემუშავება, რომელიც, მათ შორის, განსაზღვრავს სისტემის მონაწილე სუბიექტების როლებს, პასუხისმგებლობებს, უწყებებს შორის თანამშრომლობის და კოორდინირების მექანიზმებს.
