ლეო მესის დაკარგვის შემდეგ კატალონიურ “ბარსელონას” რთული დროება დაუდგა. გუნდი ვერ ბრწყინავს და ერთ უფანტაზიო, უილაჯო კლუბად გარდაიქმნა. ერთ დროს მსოფლიო ფეხბურთის ლიდერი თანდათან “ოსასუნა”, “გრანადა” და “სელტას” დონემდე ეშვება და გამოსავალი ჯერ არ ჩანს.
ესპანეთის პირველობის ბოლო ტურში “გრანადასთან” საშინაო მატჩის შემდეგ, სადაც “ბარსა” მარცხს სასწაულებრივად გადაურჩა, გუნდის ამჟამინდელმა პრეზიდენტმა ჟოან ლაპორტამ კლუბის თაყვანისმცემლებისათვის სპეციალური განცხადება გაავრცელა:
“გთხოვთ, ჩვენი გუნდის გულშემატკივრობა გააგრძელოთ. ფეხბურთელებს სჭირდებით და ძალიან მადლობელი ვართ თქვენი. იცით, რომ რთული პერიოდის გავლა გვიწევს და ამ რთულ მომენტში ჩვენს გვერდით უნდა იყოთ. შეგიძლიათ, დარწმუნებული ბრძანდებოდეთ, რომ ჩვენი გუნდი “კადისთან” გამარჯვებისთვის ყველაფერს გააკეთებს. რაც უნდა მოხდეს, გააგრძელეთ გუნდის ქომაგობა “ლევანტესთან” მომდევნო საშინაო მატჩშიც _ გუნდს ეს ჭირდება. ეცადეთ, სიმშვიდე შეინარჩუნოთ, ვიცით, რა უნდა გავაკეთოთ და ყველა პრობლემას მოვაგვარებთ”.
გავრცელდა ცნობა, რომ უახლოეს დღეებში “ბარსელონას” მთავარი მწვრთნელი რონალდ კუმანი თანამდებობას გამოეთხოვება. ესპანური მასმედიის მტკიცებით, ნიდერლანდელის შემცვლელად პირლო, ჩავი ერნანდესი, რობერტო მარტინესი, ანტონიო კონტე, იოახიმ ლიოვი და ფილიპ კოკუ განიხილებიან. კლუბის პრეზიდენტი იტალიელი პირლოსაკენ იხრება, კლუბის ფანობას კი ჩავი ერნანდესის ხილვა სურთ.
გუშინ “ბარსელონას” პრობლემებზე ახლო წარსულში ლეგენდარულმა მოთამაშემ ანდრეს ინიესტამ ისაუბრა. ანდრესი ამჟამად იაპონიაში, “ვისელ კობეს” ღირსებას იცავს. ინიესტა დარწმუნებულია, რომ ჩავი ერნანდესი უკვე მზადაა “ბარსელონას” მწვრთნელობისთვის:
“ვფიქრობ, რომ ის მზადაა. თუ მკითხავთ, წარმომიდგენია თუ არა ჩავი ამჟამად ბარსელონას მთავარ მწვრთნელად, გეტყვით, რომ დიახ. ის გარკვეული პერიოდის განმავლობაში ემზადებოდა და სწავლობდა მწვრთნელობას. მას აქვს შესაბამისი თავდაჯერებულობა, რომ ამ გამოწვევას გაუმკლავდეს”, _ განაცხადა ანდრეს ინიესტამ გამოცემა “Goal”-თან საუბრისას.
ლიონელ მესის კი მძიმე დრო დაუდგა. ფრანგული სპორტული მედიის მტკიცებით არგენტინელმა სუპერვარსკვლავმა “ლიონთან” ბოლო შეხვედრაში დაზიანება მიიღო და მას მაგნიტურ-რეზონანსული ტომოგრაფია ჩაუტარდა, რომელმაც აჩვენა, რომ ლეოს სისხლჩაქცევების ნიშნები აქვს. სამხრეთამერიკელ შემტევს მომდევნო სამედიცინო შემოწმება 48 საათში ჩაუტარდება.
გუშინ ესპანეთის “ლა ლიგის” მეექვსე ტურში “ვალენსია” “სევილიას” ესტუმრა და 1:3 დამარცხდა. გიორგი მამარდაშვილმა შეუცვლელად ითამაშა და პირველივე ტაიმში გაუშვა გოლები.
მესამე წუთზე მას პაპუ გომესმა გაუტანა, მე-15 წუთზე ტონი ლატომ მიითვალა ავტოგოლი, ხოლო 22-ე წუთზე რაფა მირმა სხვაობა სამამდე გაზარდა.
გამოცემა “El Chiringuito”-ს ინფორმაციით, ფრანგული “პარი სენ ჟერმენი” ზინედინ ზიდანის მთავარ მწვრთნელად მიწვევის ვარიანტს განიხილავს. ფრანგმა სპეციალისტმა, შესაძლოა, მაურისიო პოჩეტინო შეცვალოს, რომელმაც გუნდი მიმდინარე წლის იანვარში ჩაიბარა. ზიდანმა ზაფხულში მადრიდის “რეალი” დატოვა და ამჟამად უმუშევარია. აღსანიშნავია, რომ სამწვრთნელო კარიერაში სხვა კლუბი ჯერჯერობით არ გაუწვრთნია.
გუშინ გამოცემამ “Forbes” ყველაზე მაღალანაზღაურებადი ფეხბურთელების ჩამონათვალი გამოაქვეყნა. “მანჩესტერ იუნაიტედის” პორტუგალიელი ნახევარმცველი კრიშტიანო რონალდო 2021-22 წლების სეზონში ყველაზე მაღალანაზღაურებადი ფეხბურთელების სიაში პირველ ადგილზე მოხვდა.
რონალდოს შემოსავალმა (გადასახადების ჩათვლით) 125 მილიონი დოლარი შეადგინა, საიდანაც 70 მილიონი ხელფასია, 55 მილიონი კი _ სარეკლამო კონტრაქტებზე მოდის.
რონალდოს შემდეგ სიაში ფრანგული “პსჟ”-ს სამი ვარსკვლავია _ ლიონელ მესი 110 მილიონს გამოიმუშავებს (75+35), მას კი ნეიმარი (95, 75+20) და კილიან მბაპე (43, 28+15) უდგანან კვალში.
გუშინ კიდევ ერთი საყურადღებო ინფორმაცია გავრცელდა _ “სერიალ “ლაზიერის გამბიტის” მეორე სეზონის გადაღება არ იგეგმება”, _ ამის შესახებ გამოცემა “Deadline”-ს სერიალის რეჟისორმა სკოტ ფრენკმა განუცხადა.
“მგონია, რომ ჩვენ უკვე მოვუყევით მაყურებელს ის ისტორია, რომლის მოყოლაც გვსურდა. მეშინია, რომ მეორე სეზონის გადაღების შემთხვევაში გავაფუჭებთ იმას, რაც უკვე გვაქვს”, _ განაცხადა ფრენკმა.
19 სექტემბერს “ლაზიერის გამბიტი” წლის საუკეთესო მინი-სერიალად დასახელდა და ამერიკის ყველაზე პრესტიჟული ტელეჯილდო _ “ემი” მიიღო.
გონივრული ეჭვია, რომ ამ ტელესერიალის გადაღების შეჩერების ერთ-ერთი მიზეზი ნონა გაფრინდაშვილის სარჩელი და მომავალი სასამართლო დავაა, რომელიც უახლოეს მომავალში ქალაქ ლოს ანჯელესში დაიწყება.
[sexy_author_bio]
