გუშინ ესპანეთში გამოქვეყნდა ამ ქვეყნის საფეხბურთო პირველობის _ ლა ლიგის პირველი ტურის სიმბოლური ნაკრები. სასიხარულოა რომ პირველად ქართული ფეხბურთის ისტორიაში ამ სახის ჩამონათვალში ჩვენი თანამემამულე მოხვდა. ესპანელმა ფეხბურთის თემაზე მწერალმა ჟურნალისტებმა „ვალენსიას“ კარის დარაჯი გიორგი მამარდაშვილი გამოარჩიეს და რჩეულ თერთმეტ მოთამაშეთა რიგებში შეიყვანეს.
გიორგი ლა ლიგამ პირველი ტურის საუკეთესო მეკარედ დაასახელა, ხოლო სიმბოლურში Mundo Deportivo-ს ვერსიითაც მოხვდა.
გახსოვთ, ალბათ, ცნობილი ესპანელი მეკარე სანტიაგო კანისარესი. ეს უკანასკნელი თავის დროზე „ვალენსიაშიც“ ასპარეზობდა. კანისარესს ადგილობრივი მასმედია ესაუბრა. კითხვაზე, მისი აზრით, ვინ უნდა იყოს „ვალენსიას“ ძირითადი მეკარე იმ ოთხიდან, რომელიც გუნდშია (მამარდაშვილი, იასპერ სილესენი, კრისტიან რივერო, ხაუმე დომენეკი) კანისარესმა შემდეგი პასუხი გასცა:
„ამ მომენტში სადებატოს ვერაფერს ვხედავ. არის ერთი, რომელმაც ეჭვები გაფანტა, მოგვიანებით კი ვნახოთ“.
გუშინდელი „სპორტული დღის“ მთავარი „შემოქმედი“ კი პორტუგალიელი კრიშტიანო რონალდო აღმოჩნდა. ცნობილია რომ „ვარსკვლავთბიჭუნა“ უახლოეს დღეებში ტურინის „იუვენტუსს“ გამოემშვიდობება. ადრე გავრცელებული ინფორმაციით კრიშტიანო კარიერას ლეო მესის ამჟამინდელ გუნდ „პარი სენ-ჟერმენში“ გააგრძელებდა. ასე იყო გუშინდელ დილამდე, შემდეგ კი მონასტერი აირია.
თავდაპირველად რონალდოს აგენტმა ჟორჟე მენდეშმა იტალიურ გამოცემას „Corriere dello Sport” განუცხადა, რომ 36 წლის მოთამაშე უახლოეს დღეებში ინგლისური „მანჩესტერ სიტის“ მაისურს მოირგებდა. მენდეშის ინფორმაციით, პეპ გვარდიოლას კლუბი იტალიურ მხარეს 30 მილიონ ევროს გადაუხდიდა.
გავიდა ორიოდე საათი და ესპანურმა „Marca“-მ სენსაციური ცნობა გაავრცელა. აღმოჩნდა რომ მადრიდის „რეალის“ მთავარმა მწვრთნელმა კარლო ანჩელოტიმ გუნდის ხელმძღვანელობას რონალდოს შეძენა დაუყოვნებლივ მოსთხოვა, არადა ცნობილი იყო რომ „სამეფო გუნდს“ პარიზული კლუბიდან კილიან მბაპეს გადმობირება სურს.
ცოტა ხანში პორტუგალიელის ახლობელმა, ჟურნალისტმა ედუ აგირემ ეს „ნიუსი“ დაადასტურა და განაცხადა, რომ კრიშტიანო ერთი ფეხით უკვე „რეალის“ მოთამაშეა.
გადის კიდევ რამდენიმე საათი და…
„რონალდო “რეალის” ლეგენდაა და ის ჩემგან დიდ სიყვარულსა და პატივისცემას იმსახურებს, მაგრამ ამ ზაფხულს მისი ტრანსფერი არ დაგვიგეგმავს და არც გვისაუბრია. ჩვენ მომავალზე ვმუშაობთ”, _ დაწერა კარლო ანჩელოტიმ საკუთარ “ტვიტერზე”.
გუშინვე, მოგვიანებით, „პარი სენ ჟერმენის“ ხელმძღვანელობამ ფრანგულ მასმედიასთან რონალდოსა და მბაპეს ირგვლივ შემდეგი განცხადება გააკეთა.
„მბაპეს „რეალში“ გაშვება ამჟამად არ გვსურს. ჩვენი სურვილია მოთამაშემ მიმდინარე სეზონი „პსჟ“-ში გაატაროს, მომდევნო წლის ზაფხულში კი გამოსასყიდი თანხის გარეშე „რეალს“ მიაშუროს. რაც შეეხება რონალდოს, მბაპეს პარიზში დარჩების შემთხვევაში, პორტუგალიელი ჩვენი კლუბის მაისურს მომავალი წლის სეზონის დასაწყისში მოირგებს.
იმ შემთხვევაში თუ მბაპეს შენარჩუნება ვერ შევძელით, კრიშტიანო უახლოეს მომავალში შემოგვიერთდება“.
ასეთი გახლავთ გუშინ განხორციელებული „საფეხბურთო ორომტრიალის“ დეტალები. იმედია, ყველაფერი უახლოეს დღეებში გაირკვევა.
„რონალდოს საგაზე“ საუბრისას გამოგვრჩა ლეო მესი. გუშინ ცნობილი გახდა თარიღი როდესაც არგენტინელი თავისი ახალი კლუბის ღირსებას ოფიციალურად პირველად დაიცავს.
ლიონელ მესის დებიუტი „პარი სენ-ჟერმენში“ 29 აგვისტოს შედგება, საფრანგეთის ჩემპიონატის მეოთხე ტურის მატჩში, „რეიმსის“ წინააღმდეგ _ გვამცნობს Sky Sports.
34 წლის არგენტინელი შვებულებიდან გვიან დაბრუნდა და ჯერ სათანადო ფორმაში არ არის.
დღევანდელი წერილი კი ერთი სასიამოვნო ამბით დავასრულოთ. ოდესის „ჩერნომორეცის“ რიგებში დებიუტი ჰქონდა გიორგი წიტაიშვილს. ქართველმა ფეხბურთელმა „მარიუპოლთან“ სტუმრად 90 წუთი ითამაშა და თავის გუნდს სეზონში პირველ გამარჯვებაში დაეხმარა (3:2).
მატჩის შემდეგ ქართველი ფეხბურთელის შესახებ კომენტარი ოდესელთა მთავარმა მწვრთნელმა იური მოროზმა გააკეთა:
„მისგან მეტს ველოდებით, შეუძლია მეტი გააკეთოს, მაგრამ მისი დრიბლინგები დღეს შესანიშნავი იყო. როდესაც ფორმაში შევა, კიდევ უფრო უკეთესად ითამაშებს“.
[sexy_author_bio]
