აუცილებელი ნივთების სია – რა წავიღოთ აეროპორტში

საჭირო დოკუმენტები

პირველ რიგში, მოიძიე ყველა საჭირო დოკუმენტი, რომელიც შემოწმებისას უნდა წარადგინო: პასპორტი, ბილეთები, სამოგზაურო დაზღვევის ასლი, ჯავშნის დამადასტურებელი მოწმობა. ეს ყველაფერი ერთ ფაილში შეგიძლია ჩაალაგო, რომელიც მარტივად ხელმისაწვდომ ადგილას გედება. ძებნაში დრო რომ არ დაკარგო, შეგიძლია, წელის ჩანთაში ჩააწყო ან ლეპტოპის ჩანთაში გედოს. მთავარია, ახლოს გქონდეს და არ დაგეკარგოს. 

აუცილებელი მედიკამენტები

საჭიროების შემთხვევაში, თან იქონიე ყველა აუცილებელი მედიკამენტი. თუ ექიმის დანიშნულება გჭირდება, არ დაგავიწყდეს შესაბამისი საბუთიც თან გქონდეს, რათა წამლების თვითმფრინავში ატანაზე პრობლემა არ შეგექმნას. 

ჰიგიენის საშუალებები

მგზავრობისას აუცილებლად დაგჭირდება მშრალი და სველი ხელსახოცები და ანტისკეპტიკური ხსნარი. აეროპორტში უამრავი ადამიანი ირევა. ეს დაგეხმარება სისუფთავე შეინარჩუნო და თავი დაიზღვიო გადამდები ვირუსებისგან. ამ მიზნით, ჩანთაში ასევე შეგიძლია ჩააწყო პირბადეებიც.

ნივთები კომფორტის შესაქმნელად

მგზავრობა დამღლელი, ხანგრძლივი პროცესია. დისკომფორტის შემსუბუქებაში რამდენიმე ნივთი დაგეხმარება. თუ გსურს, სკამზე მოხერხებულად მოთავსდე და კისრისა და ზურგის ტკივილებმა არ შეგაწუხოს, სპეციალური კისრის ბალიში შეგიძლია გაიკეთო. ასეთ დროს ასევე კომფორტულია თვალების ნიღაბი, რომელიც სინათლეს დაახშობს და ჩაძინებაში დაგეხმარება. დროის გასაყვანად ქინდლი ან წიგნი შეგიძლია წაიღო პატარა სანათით. არ დაგავიწყდეს ყურსასმენები, რადგან შესაძლოა, მუსიკის მოსმენა ან ფილმის ყურება მოგინდეს. სასურველია, ასევე თან იქონიო საცობები, რათა სხვა მგზავრების ხმაურმა არ შეგაწუხოს. 

ხემსები

ხანგრძლივი მგზავრობისას შეიძლება მოგშივდეს. ცხადია, აეროპორტში არის კვების ობიექტები და მაღაზიები, სადაც წასახემსებელს იყიდი. თუმცა, თუ თანხის დაზოგვა გინდა, შეგიძლია, სახლიდან წაიღო შოკოლადი, სენდვიჩი, ღვეზელი, შენი საყვარელი ნამცხვარი ან ორცხობილა, რომელიც დაგანაყრებს.

შეჯამება

იმედია, ჩვენი გამზადებული სია ფრენის წინ სიმშვიდის პოვნაში დაგეხმარება. თუ ზემოთ ჩამოთვლილი ყველა ნივთი უკვე გიდევს ჩანთაში, შეგიძლია, აღარ იღელვო. კიდევ ერთხელ დაფიქრდი, რამე ხომ არ გავიწყდება, მობილიზდი და მოემზადე დაუვიწყარი მოგზაურობისთვის.