ოზურგეთის მუნიციპალიტეტის სოფლების _ ფამფალეთის და მთისპირის დამაკავშირებელ გზაზე მეწყერია. მოქალაქეები შიშით გადაადგილდებიან და იმ საზარელ ტრაგედიებზე საუბრობენ, რომლებიც ხელისუფლების უმოქმედობამ გამოიწვია და მსხვერპლი მოჰყვა.
არსებული ვითარების შესახებ “გურია ნიუსს“ სწორედ მოქალაქე დაუკავშირდა და არსებული მძიმე ვითარების შესახებ მოგვაწოდა ინფორმაცია. ინფორმაცია მეწყრის შესახებ მოქალაქე ია კვიჭიძემაც გაავრცელა სოცქსელებით.
მიუხედავად იმისა, რომ ეს პრობლემა ახალი არაა, შესაბამისი უწყებები ამ ვითარების შესახებ აქტიურ მოქმედებას არ ჩქარობენ, ხალხი კი პრობლემის მოგვარებას დაუყოვნებლივ და საფუძვლიანად მოითხოვს.
“გურია ნიუსი“ ადგილზე ჩავიდა და გაეცნო არსებულ ვითარებას. მდგომარეობა მართლაც მძიმეა, რასაც მკითხველი ამ ფოტოებიდანაც ადვილად შეაფასებს.
_ თითქმის ერთი თვეა აქ ვარ _ მშობლებთან და აი, ასეთი მდგომარეობაა, რასაც თქვენ ხედავთ. ეს არ არის დღევანდელი დღის პრობლემა. თითქმის ყოველ უამინდობაზე გაწვიმებისას იჩენს, ხოლმე თავს. მდგომარეობა, ჩემი აზრით,ძალიან საყურადღებო და საშიშია _ როგორც ჩანს, ადგილი მეწყარსაშიშია და ყოველ უამინდობისას, როგორც გითხარით, ახლდება ეს პრობლემა. მოდიან, დაყრიან ამ წითელ ქვიშას და მიდიან. ასეთი ქმედებით კი ეს საკითხი არ მოგვარდება და რეალური პრობლემა პრობლემად რჩება. საჭიროა გეოლოგების ჩართვა ამ საქმეში და მოვითხოვთ, მათ ჩართვას ამ პრობლემის შესასწავლად. დროულად უნდა მოხდეს გეოლოგების ჩართვა და ამ პრობლემის ძირეული შესწავლა. ახლა საკმაოდ საშიში მდგომარეობაა და შესაძლებელია, ხვალ რაჭა განმეორდეს! მაინცდამაინც რაჭა უნდა განმეორდეს, რომ ყური გამოვიბერტყოთ?!!!” _ ამბობს მოქალაქე ია კვიჭიძე.
მეწყერსაშიში ადგილები, ჩვენი იქ ყოფნისას გამაფრთხილებელი ლენტით იყო შემოფარგლული. ჩვენი რესპონდენტის თქმით, მისთვის უცნობია ვინ იყო ადგილზე მისული და ვინ შემოსაზღვრა ეს ადგილი ლენტით.
_ დილით სოციალურ ქსელში დავწერე სტატუსი და დახმარებას ვითხოვდით. არავისგან შეტყობინება არ ყოფილა და არავინ დაინტერესებულა. ასევეб მოვნიშნე „გურია ნიუსი“, რომ გაგეშუქებინათ ეს ამბავი. კიდევ ერთხელ ვამბობ, რომ საფუძვლიანად უნდა ამ საკითხს შესწავლა და გადაჭრა, _ გვითხრა ია კვიჭიძემ.
ია კვიჭიძე ჩვენთან საუბარში ამბობს, რომ ვითარებას კიდევ უფრო ამძიმებს ამ დამეწყრილ გზაზე სატვირთო მანქანების მიმოსვლა.
ჩვენ კომენტარი ვთხოვეთ ოზურგეთის მუნიციპალიტეტის მერის წარმომადგენელს სოფელ ვაკიჯვარში დათო ჩავლეშვილს. მისი თქმით, აღნიშნულ პრობლემას იცნობს და საკითხის მოგვარებას იწყებენ,თუმცა, ზუსტი დრო არ უთქვამს _ როდის.
_ ყველა უწყება საქმის კურსშია და ხვალ მოდიან რათა ამ საკითხზე კონკრეტული დასკვნა გააკეთონ, _ გვითხრა ჩავლეშვილმა.
_ ანუ ხვალ გეოლოგები მოვლნენ ამ საკითხის შესასწავლად?
_ ხვალ, სათანადო სამსახურის თანამშრომლები აპირებენ ამოსვლას და გადაწყვეტენ ყველაფერს, _ დააზუსტა მერის წარმომადგენელმა.
ჩვენ გვინდოდა გადაგვემოწმებინა, თუ რამდენი ლარია დახარჯული ბოლო სამი წლის განმავლობაში სოფელ ფამფალეთის (ვაკიჯვრის თემი) გზების მოსაწესრიგებლად. ასევე, გასულ, 2024 წელს რა იყო ამ სოფელში უფრო პრიორიტეტულად მიჩნეული, მაგრამ ოზურგეთის მუნიციპალიტეტის მერიის ვებ გვერდი შეფერხებებით მუშაობს და მისი ჩამოტვირთვა ვერ ხერხდება.
ჩვენ თვალს მივადევნებთ ამ საკითხს და საზოგადოებას მივაწვდით ინფორმაციას თუ რას მოიმოქმედებს ადგილობრივი ხელისუფლება მოსახლეობის შიშის გასაფანტად, რომ ფამფალეთში რაჭის ტრაგედია არ განმეორდეს.
ჩვენ ასევე, დავუკავშირდით ოზურგეთის მუნიციპალიტეტის მერის პრესსამსახურს და ვიკითხეთ, არის თუ არა ეს დამეწყრილი ადგილი გეოლოგების მიერ შესწავლილი და თუ არა, როდის მოხდება გეოლოგების ჩართვა. პასუხი, ჯერჯერობით, არ მიგვიღია. ჩვენ მზად ვართ, ოფიციალური პასუხი მიღებისთანავე გამოვაქვეყნოთ.
ავტორი
