ავღანური ოპოზიცია ბრძოლას აპირებს _ იკრძალება მუსიკა, წვერის გაპარსვა, მტრედების მოშენება…

ავღანეთის სათავეში ექსტრემისტული დაჯგუფება „თალიბანის“ მოსვლა მსოფლიოსათვის მოულოდნელი აღმოჩნდა. 350 000-იანმა კბილებამდე შეიარაღებულმა სამთავრობო ძალებმა 60-70 ათასს თალიბან მეომარს ვერანაირი წინააღმდეგობა ვერ გაუწია და მთელი ქვეყანა პრაქტიკულად ერთი გასროლის გარეშე ჩააბარა.

სანამ აშშ და მისი დასავლელი მოკავშირეები ქვეყნიდან თავიანთი თანამემამულეებისა და ავღანელთა ნაწილის გაყვანას ცდილობენ, დაჯგუფება „თალიბანის“ მოწინააღმდეგეები პანჯშირის პროვინციაში გამაგრდნენ და ახალი ხელისუფლებისათვის წინააღმდეგობის გაწევას აპირებენ.

ამ დაჯგუფების სათავეში აჰმად მასუდია, ახლო წარსულში საბჭოთა ოკუპაციის წინააღმდეგობის მონაწილის, ლეგენდარული სარდლის აჰმად შაჰ მასუდის ვაჟიშვილი. მასუსის გვერდით ავღანეთის ვიცე-პრეზიდენტი ამრულა სალეჰიც დგას, რომელმაც „ტვიტერზე“ ჯერ კიდევ 17 აგვისტოს ღამით დაწერა, რომ ავღანეთში რჩება და მას შემდეგ, რაც პრეზიდენტი აშრაფ ღანი გაიქცა, მისი მოვალეობის ლეგიტიმური შემსრულებელია.

“ჩვენ, ავღანელებმა, უნდა დავამტკიცოთ, რომ ავღანეთი არ არის ვიეტნამი. შეერთებული შტატებისა და ნატოსგან განსხვავებით, ჩვენ სული არ დაგვიკარგავს და წინ უზარმაზარ შესაძლებლობებს ვხედავთ. უსარგებლო გაფრთხილებები დასრულდა. შემოუერთდით წინააღმდეგობას”, _ აღნიშნა მან.

მასუდსა და სალეჰთან ერთად ავღანეთის ყოფილი თავდაცვის მინისტრი ბისმილა მუჰამადიც არის. ოპოზიციის ამ სამი ლიდერის დაქვემდებარებაში დაახლოებით ოცი ათასი კარგად შეიარაღებული მებრძოლია. მათი დიდი ნაწილი ავღანეთის ოფიციალური ძალოვანი სტრუქტურების წარმომადგენლები არიან _ ის ადამიანები, რომლებმაც ტაჯიკეთში ან უზბეკეთში გადასვლაზე უარი განაცხადეს, ავღანეთში დარჩნენ და ახალ რეჟიმთან დაუნდობელი ბრძოლა გადაწყვიტეს.

რამდენიმე დღის წინ აჰმად მასუდმა სპეციალური მიმართვა გამოაქვეყნა.

„ჩვენ გვყავს ავღანეთის რეგულარული არმიის ჯარისკაცები, რომლებიც შეურაცხყოფილნი არიან თავიანთი მეთაურების დანებებით და ახლა თავიანთი აღჭურვილობით მოემართებიან პანჯშირის ხეობისაკენ. ავღანეთის სპეცრაზმის ყოფილი წევრებიც შეუერთდნენ ჩვენს ბრძოლას. მაგრამ, ეს საკმარისი არ არის. თუ თალიბანი დაიწყებს თავდასხმას, ისინი, რა თქმა უნდა, მდგრად წინააღმდეგობას წააწყდებიან ჩვენგან. ეროვნული წინააღმდეგობის ფრონტის დროშა იფრიალებს ყველა პოზიციაზე, რომლის დაკავებასაც ისინი შეეცდებიან“.

რამდენიმე დღის წინ ოპოზიციურმა ძალებმა პირველ სერიოზულ სამხედრო წარმატებას მიაღწიეს და პანჯშირის პროვინციაში მდებარე რამდენიმე სტრატეგიული სიმაღლე დაიკავეს. ამჟამად „ავღანეთის ეროვნული წინააღმდეგობის ფრონტი“ ხეობას სრულად აკონტროლებს.

„თალიბანის“ განცხადებით, მისმა საბრძოლო დანაყოფებმა პანჯშირის პროვინცია ალყაში მოაქცია და აჯანყებულ დაჯგუფებებს დანებება მოსთხოვა, წინააღმდეგ შემთხვევაში, ხეობაში საბრძოლო მოქმედებების დაწყებით დაიმუქრა.

უახლოეს დღეებში, ქაბულის აეროპორტის გარდა, პანჯშირის პროვინცია განსაკუთრებულ ცხელ წერტილად გადაიქცევა, რას მოიმოქმედებს “თალიბანი“ და როგორი იქნება აჰმად მასუდის მომხრეების საპასუხო ნაბიჯები, ჯერჯერობით, უცნობია.

„თალიბანის“ ნაბიჯები კი უფრო და უფრო რადიკალური ხდება _ გუშინ მათ აშშ-სა და ნატოს კოალიციაში შემავალ ქვეყნებს ოფიციალური გაფრთხილება გაუგზავნეს:

„აშშ და დასავლეთის სხვა ქვეყნები შედეგებს მოიმკიან, თუ ავღანეთიდან თავიანთ ჯარებს 31 აგვისტოსთვის არ გაიყვანენ. ჯარების გაყვანის საკითხი წითელი ხაზია. პრეზიდენტმა ბაიდენმა განაცხადა, რომ 31 აგვისტოს სამხედრო ძალებს გაიყვანს. თუ ისინი გაყვანის ვადებს გაახანგრძლივებენ, ეს ნიშნავს, რომ ისინი ოკუპაციას აგრძელებენ, რისი საჭიროებაც არ არსებობს“, _ განაცხადა რადიკალური დაჯგუფება „თალიბანის“ ოფიციალურმა წარმომადგენელმა სუჰაილ შაჰინმა.

ამის პარალელურად „თალიბანმა“ ქვეყანაში ახალი ოფიციალური აკრძალვების ჩამონათვალი გაავრცელა:

_ ქალებს ეკრძალებათ შილიფად ჩაცმა;

_ იკრძალება მუსიკა;

_ იკრძალება წვერის გაპარსვა;

_ ყველა მამაკაცს, რომელიც წვერს გაიპარსავს ან შეიკრეჭს, დააპატიმრებენ და ციხეში დარჩება მანამ, სანამ წვერი მუშტის სიგრძეზე არ მოეზრდება;

_ ლოცვის დაკანონებული ჟამები მკაცრად იქნას დაცული ქვეყნის ყველა რაიონში. ლოცვების ზუსტი დრო გამოცხადებულ იქნება „წესრიგის დამყარებისა და ცოდვათა დაძლევის“ სამინისტროს მიერ;

_ იკრძალება მტრედების მოშენება და ფრინველთა პაექრობების მოწყობა;

_ მკაცრი ბრძოლა გამოცხადდება ნარკოტიკებისა და მათი მომხმარებლების წინააღმდეგ;

_ აიკრძალება ფრანების გაშვება;

_ იკრძალება სურათები;

_ იკრძალება აზარტული თამაშები;

_ იკრძალება ევროპული ვარცხნილობა;

_ იკრძალება პროცენტების აღება ვალად გაცემულ თანხაზე, ფულის გადახურდავებისას და გადაცვლისას;

_ იკრძალება მდინარის პირას, მდინარის წყალში სარეცხის რეცხვა;

_ იკრძალება მუსიკის დაკვრა და ცეკვა ქორწილებსა და ნიშნობებზე;

_ იკრძალება დოლზე დაკვრა;

_ მკერავებს ეკრძალებათ ქალის ტანსაცმლის კერვა და შეკვეთების მიღება;

_ იკრძალება მკითხაობა.

[sexy_author_bio]