როგორც მოგეხსენებათ, ჩქაროსნული საავტომობილო გზის სამტრედია-გრიგოლეთის მონაკვეთის მშენებლობა უკვე წლებია გრძელდება და იქ არსებული სხვადასხვა პრობლემების ფონზე როდის დასრულდება, ჯერ არავინ უწყის. შეგახსენებთ, რომ ეს 52 კმ-იანი მონაკვეთი, რომელიც თავიდანვე 4 ლოტად დაიყო, ზესტაფონი-ქუთაისის შემოვლითი-სამტრედიის გზის 42-ე კმ-ზე, მდ. ოჩოფასთან იწყება და გრიგოლეთის ტერიტორიაზე, მდინარე სუფსასთან მთავრდება.
დღესდღეობით, სურათი კი ასეთია – 2020 წლის ზაფხულში ამ გზის მხოლოდ ერთი, 14 კმ-იანი მონაკვეთი შევიდა ექსპლუატაციაში, რომელიც გაივლის ქალაქ ლანჩხუთსა და ლანჩხუთის მუნიციპალიტეტის სოფლებს: ჯაპანას, ქვიანს, ჭყონაგორას, ჩოლობარგს, ნიგოითსა და შუხუთს. ამ წლის ბოლოსთვის იგეგმება პირველი და მეოთხე ლოტად წოდებული მონაკვეთების გახსნაც. პირველ ლოტზე, რომელიც სამტრედია -ჯაპანას დაუკავშირდება, პრობლემური აღმოჩნდა მდინარე რიონზე გამავალი ხიდი, რომლის დასრულებამ ამ მონაკვეთის გახსნა 2 წლით გადაავადა.
მეოთხე ლოტიც პრობლემური გამოდგა, გრიგოლეთიდან ხაჯალიამდე გზის ამ მონაკვეთზე არამყარი გრუნტის გამო გზის მშენებლობა გაჭიანურდა და ჩვენი ინფორმაციით, გამორიცხული არაა გახსნის შემდგომაც უამრავმა პრობლემამ იჩინოს თავი.
თუმცა ეს რა მოსატანია, როცა ამ გზის მესამე ლოტზე საერთოდ არ დაწყებულა სამუშაოები და ჩვენი ინფორმაციით, ამ მონაკვეთის მშენებლობაზე ტენდერი უკვე დასრულებულია და თუ ყველაფერი გეგმის მიხედვით წარიმართა, 5 წლის შემდეგ უნდა მოხდეს მშენებლობის დასრულება.
ფაქტია, რომ დღესდღეობით სამტრედია-გრიგოლეთის გზის მხოლოდ ერთი მონაკვეთია გახსნილი და როგორც ირკვევა, ისიც არასაკმარისად არის შესრულებელი. საქმე იმაში გახლავთ, რომ ამ მონაკვეთს სამი კვანძი გააჩნია. ერთი ჯაპანაში, მეორე ლანჩხუთის ტერიტორიაზე, მესამე კი გზის შუა მონაკვეთზე, სოფელ ჩოლობარგში. როგორც წესი, ამ კვანძებით უნდა მოხდეს ამ გზის მეორეხარისხოვან გზაზე მიერთება. ჯაპანაში და ლანჩხუთში ეს ასეც არის, მაგრამ რატომღაც ნიგოითის ადმინისტრაციული ერთეულის სოფელ ჩოლობარგში, ამ გზის გაკეთება „დაავიწყდათ“, რამაც გარკვეული გაურკვევლობა უკვე გამოიწვია.
საქმე იმაშია, რომ ერთი თვის წინ ლანჩხუთის მუნიციპალიტეტის საკრებულოში, მერიის საფინანსო სამსახურის მიერ მომზადებული დოკუმენტი შევიდა, რომლის თანახმად “საქართველოს რეგიონებში განსახორცილელებელი პროექტების ფონდიდან” ლანჩხუთის მუნიციპალიტეტს დამატებით ორი მილიონ 50 ათასი ლარი გამოეყო, მუნიციპალიტეტის მასშტაბით ინფრასტრუქტურული პროექტების განხორციელების მიზნით.
რეგიონული ფონდიდან გამოყოფილი ამ თანხის ნაწილით, შიდა სასოფლო გზების რეაბილიტაცია იგეგმება ნიგოითის, გვიმბალაურის, ნინოშვილის, მამათის, აცანის, შუხუთის, ჯურუყვეთის, ნიგვზიანის, ჩოჩხათის, ლესის და სუფსის ადმინისტრაციულ ერთეულებში. ჰოდა, საგულისხმოა, რომ მუნიციპალიტეტის მერია, ნიგოითის თემისთვის განკუთვნილი თანხით სწორედ ზემოთ ნახსენები ავტობანიდან მეორეხარისხოვან გზაზე მისასვლელი გზის დაგებას აპირებს. ამ გადაწყვეტილებამ ბევრი კითხვის ნიშანი გააჩინა, მათ შორის ის, თუ რატომ იხარჯება რეგფონდიდან ეს თანხა და რეალურად ავტობანის პროექტის შეუსრულებელ ვალდებულებასთან გვაქვს საქმე თუ არა.
საკრებულოს წევრი, პარტია „ლელოდან“, გოჩა ჯანაშია მიუღებლად მიიჩნევს ამ ფაქტს და მუნიციპალიტეტის ხელმძღვანელობას ამ საკითხის მიმართ მკაცრად დაინტერესებას ითხოვს.
„გამაგებინეთ ერთი, ავტობანის პროექტი ხომ არსებობდა? სამი კვანძი რომ უნდა გაკეთებულიყო გზის ამ მონაკვეთზე, ესეც ხომ ცხადი იყო. ჰოდა, რა გამოდის?! ჯაპანაში და ლანჩხუთში კვანძის მშენებლობა ბოლომდე მივიდა, ჩოლობარში კი ფული „მოტყდა“, თუ რა ხდება?! მაინტერესებს ინფრასტრუქტურის სამინისტროს ან საავტომობილო გზების დეპარტამენტის პოზიცია, როცა ეს მონაკვეთი ჯერ კიდევ 2020 წელს საზეიმოდ გაიხსნა ისე, რომ ერთ-ერთ კვანძზე არ მოხდა ავტობანის მეორეხარისხოვან გზაზე დაერთება, რაც პროექტის ან მძიმე დარღვევად მიმაჩნია, ანაც თავის დროზე არასრულფასოვან დაგეგმარებად.
ისიც გაუგებარია მუნიციპალიტეტისთვის განკუთვნილი თანხებით რატომ უნდა შესრულდეს ეს სამუშაოები, როცა გასაკეთებელი სხვაც უამრავია. ნუთუ არ დაინტერესებულა ვინმე რატომ ხდება ასე? და საერთოდ, ავტობანის დილემაა – რა საჭიროა კვანძი, თუ ის სხვა გზასთან არ მიგვიყვანს“?!- კითხვებს სვამს ჯანაშია.
საავტომობილო გზების დეპარტამენტში ამ საკითხთან დაკავშირებით, ბევრი ვერაფერი გავარკვიეთ. უწყების პიარის თქმით, მას არ აქვს ინფორმაცია იყო თუ არა პროექტში გათვალისწინებული ამ კვანძის ბოლომდე მიყვანა.
„შეიძლება პროექტით არ იყო გათვალისწინებული სამივე მისასვლელი რომ გაკეთებულიყო. მე გამიჭირდება კონკრეტულად რაიმეს თქმა, გამოითხოვეთ ინფორმაცია და გაარკვიეთ რა როგორ იყო, ჩემი კომპეტენციის ფარგლებში მეტს ვერაფერს გეტყვით“. – გვაუწყეს დეპარტამენტის პიარ-სამსახურში.
მუნიციპალიტეტის მერი, ალექსანდრე სარიშვილი ამ ეტაპისთვის არ ფლობს სარწმუნო ინფორმაციას იყო თუ არა პროექტში გათვალისწინებული ამ გზის დაგება.
„ჩვენ როცა პროექტებს ვარჩევთ რეგფონდისთვის, ვუთანხმდებით ადგილობრივ რწმუნებულსა და დეპუტატს. მე მქონდა დღეს საუბარი ამ სოფლის დეპუტატთან. ჩვენ ორი საათის წინ ადგილზე მოვინახულეთ თუ რა ხდება, წრიული არის და ახლა გზების დეპარტამენტთან გავარკვევთ რეალურად ითვალისწინებდა თუ არა პროექტი საკვანძო გზის ბოლომდე მიყვანას. შესყიდვებთანაც გავარკვევთ შეიძლება თუ არა ამ პროექტის სხვა პროექტით ჩანაცვლება. ხვალისთვის გვეცოდინება ზუსტი პასუხი რა და როგორაა“, _ გვითხრა სარიშვილმა.
ავტორი
