ჩოხატაურის საკრებულოს წევრი, კოალიცია “ცვლილებებისთვის” წარმომადგენელი ბაჩო ახალაძე ზურაბ გირჩი ჯაფარიძის დაკავებას ეხმაურება და “გურია ნიუსთან” საუბრისას აცხადებს, რომ “ქვეყანა იძირება ავტოროტარიზმში, სადაც პოლიტიკური განსხვავებულობა დასჯადია”.
“ზურაბ ჯაფარიძის დაპატიმრება პარლამენტის დროებით კომისიაზე არ მისვლის გამო არა სამართლებრივი, არამედ შინაარსობრივად პოლიტიკური ნაბიჯია, ვინაიდან ქვეყანაში არის ავტოკრატიული მმართველობა. მაშინ როდესაც ქვეყნის შიგნით და ქვეყნის გარედ არავინ არ აღიარებს ამ პარლამენტის ლეგიტიმურობას, კომისიასაც არ გააჩნია ლეგიტიმაცია.
ოპოზიციური ლიდერის დაკავება მხოლოდ იმის გამო, რომ მან არ სცნო კომისია, რომელსაც არ გააჩნია საზოგადოებრივი ნდობა, არის პოლიტიკური ზეწოლის კლასიკური მაგალითი.
“ქართული ოცნების” რეჟიმი ყოველდღიურად უფრო აშკარად ადასტურებს, რომ კრიტიკული აზრის მიმართ რეპრესიას ირჩევს პასუხად. ეს კი მხოლოდ ამყარებს იმ რწმენას, რომ ქვეყანა იძირება ავტორიტარიზმში, სადაც პოლიტიკური განსხვავებულობა დასჯადია.
დემოკრატიულ სახელმწიფოში მოქალაქეს უნდა ჰქონდეს უფლება, არ სცნოს ინსტიტუცია, რომელიც არ წარმოადგენს ხალხის ნებას. და იმ დროს, როცა ხელისუფლება თავად ვერ ატარებს სამართლიან არჩევნებს და ვერ უზრუნველყოფს ინსტიტუციური ლეგიტიმაციას, ოპონენტის დასჯა მხოლოდ აღრმავებს პოლიტიკურ კრიზისს და ემსახურება დაშინების მიზანს”,_ განაცხადა “გურია ნიუსთან” საუბრისას ბაჩო ახალაძემ.
ინფორმაციისთვის, ზურაბ ჯაფარიძე გუშინ სასამართლო სხდომათა დარბაზში დააკავეს.
„კოალიცია ცვლილებისთვის” წევრს, ზურაბ გირჩი ჯაფარიძეს აღკვეთის ღონისძიების სახით შეფარდებული 20 000-ლარიანი გირაო პატიმრობით შეეცვალა.
აღნიშნული გადაწყვეტილება თბილისის საქალაქო სასამართლოს მოსამართლემ ირაკლი შვანგირაძემ მიიღო და ამით პროკურატურის შუამდგომლობა დააკმაყოფილა.
