„საქართველოს ბანკის“ ზუგდიდის ფილიალზე ყაჩაღურ თავდასხმაში ბრალდებული ბადრი ესებუა ფსიქიატრიული ექსპერტიზისთვის გადაიყვანეს, – ამის შესახებ ამის შესახებ ჟურნალისტებს ესებუას უფლებადამცველმა იოსებ ჯანაშიამ განუცხადა.
მისი თქმით, ბადრი ესებუას პროცესი, ზუგდიდის რაიონულ სასამართლოში გაურკვეველი ვადით გადაიდო გადაიდო. მისი დაცვის ქვეშ მყოფს შესაბამისი გამოკვლევა ლევან სამხარაულის სახელობის ექსპერტიზის ეროვნული ბიუროს ფსიქიატრიულ დაწესებულებაში ჩაუტარდება.
,,როგორც ჩემთვის გახდა ცნობილი, ბადრი ესებუა ფსიქიატრიულ ექსპერტიზაზე 18 აპრილს გადაიყვანეს.პროკურატურას ჰქონდა მისთვის ფსიქიატრიული ექსპერტიზის ჩატარების მოთხოვნა და სასამართლომ დააკმაყოფილა, იძულებით გადაყვანაზე განჩინება იყო გაცემული და ჩვენი პოზიციის მიუხედავად, მაინც ასე მოხდა. ჯერ უცნობია, რამდენ ხანს დარჩება იქ. გამოკვლევის ჩატარებას 10-15 დღე დასჭირდება. გადაწყვეტს. ისე, მაქსიმალური ვადა 20 დღეა. დღევანდელი პროცესი გადაიდო და ექსპერტიზის დასრულების შემდეგ გაგრძელდება სასამართლო სხდომები,“ – განაცხადა იოსებ ჯანაშიამ.
ზუგდიდის რაიონულმა სასამართლომ 22 თებერვალს გამართულ სხდომაზე დააკმაყოფილა პროკურატურის შუამდგომლობა ბადრი ესებუასთვის ფსიქიატრიულ-სტაციონარული ექსპერტიზის ჩატარების თაობაზე.
ამ პროცედურის აუცილებლობა ბრალდების მხარემ “საქმის სპეციფიკურობით” ახსნა. პროკურორების თქმით, საუბარია მძიმე დანაშაულზე – ადამიანების მძევლად აყვანაზე – ამიტომაც შესაბამისი დასკვნა საქმეში უნდა არსებობდეს. მოთხოვნას არ დაეთანხმა დაცვის მხარე. ადვოკატმა იოსებ ჯანაშიამ თქვა, რომ პროკურორის შუამდგომლობა უსაფუძვლოა და მხოლოდ „პატიმრის დისკრედიტირებას“ ემსახურება, ვინაიდან არც სამედიცინო დოკუმენტაცია და არც მოწმეთა ჩვენებები არ აჩენს ბრალდებულის ფსიქიკური მდგომარეობის ეჭვქვეშ დაყენების საფუძველს. მიუხედავად ადვოკატების პოზიციისა, მოსამართლემ პროკურატურის ეს შუამდგომლობაც დააკმაყოფილა.
ზუგდიდის რაიონულ სასამართლოში “საქართველოს ბანკის” ფილიალზე ყაჩაღური თავდასხმის საქმეზე მხარეები პროკურატურის წარდგენილი მტკიცებულებების გამოკვლევის ეტაპზე არიან. საქმეზე დაიკითხა ათეულობით მოწმე. გამოიკვლიეს ნივთიერი მტკიცებულებების ნაწილიც.
შეგახსენებთ, რომ ორწლიანი ძებნის შემდეგ პოლიციამ ბადრი ესებუა 8 თებერვალს დააკავა. ის ზუგდიდის სოფელ ჯიხაშკარში, ნათესავის სახლში აიყვანეს. ესებუა 2020 წლის 21 ოქტომბერს “საქართველოს ბანკში” შეიჭრა 40-ზე მეტი პირი მძევლად აიყვანა და მათი გათავისუფლების სანაცვლოდ ნახევარი მილიონი აშშ დოლარი მოითხოვა, თანხის მიღების შემდეგ კი მიმალვა შეძლო.
ბადრი ესებუა დაკავებულია ტერორისტული აქტის, ტერორისტული მიზნით მძევლად ხელში ჩაგდების, ცეცხლსასროლი იარაღის, საბრძოლო მასალისა და ასაფეთქებელი მოწყობილობის მართლსაწინააღმდეგო შეძენა-შენახვა-ტარების ბრალდებით.
ავტორი
