გუშინ, თბილისის ოპერისა და ბალეტის თეატრის ბაღში, ზაქარია ფალიაშვილის ძეგლთან, იოჰან სებასტიან ბახის 333-ე დაბადების დღისადმი მიძღვნილი კონცერტი გაიმართა.
Bach in the Subways არის საერთაშორისო პროექტი, რომლის ავტორიცაა ამერიკელი ჩელისტი დეილ ჰენდერსონი.
ის ამჟამად საქართველოში იმყოფება და სწორედ მიერ მიერ ჩელოზე შესრულებული ბახის ნაწარმოებების მოსმენა შეეძლო დღეს თბილისის ოპერისა და ბალეტის თეატრის ბაღში მისულ საზოგადოებას.
როგორც Bach in the Subways ორგანიზატორი, ანა ვაშაყმაძე, “გურია ნიუსთან” საუბრისას აღნიშნავს, კონცერტის გარდა, ფილმის გადაღებაც იგეგმება.
“წლევანდელი ბახის დაბადების დღე განსაკუთრებულია საქართველოსთვის, “Bach in the Subways” წარმომადგენლებმა მსოფლიოს სამი ქალაქი აირჩიეს – სინგაპური, თბილისი და სიეტლი, რომლებშიც ჩავიდოდა პროექტის ავტორი მონაწილეობის მისაღებად. ასევე ჩამოდის ფილმის – “Bach in the Subways” მსოფლიოს გარშემო – გადამღები ჯგუფი. ეს ყველაფერი კი იმას ნიშნავს, რომ საქართველო ამ საოცარი პროექტის ეპიცენტრშია”,_ამობს ვაშაყმაძე.
მისივე თქმით, იოჰან სებასტიან ბახის 333-ე დაბადების დღისადმი მიძღვნილ კონცერტში თბილისის სახელმწიფო კონსერვატორიის სტუდენტები და პროფესორები, ასევე სხვადასხვა სამუსიკო სკოლების მოსწავლეები მონაწილეობდნენ.
რაც შეეხება დეილ ჰენდერსონს, მან ბახის ნაწარმოებების ჩელოზე შესრულება მეტროში 2010 წელს დაიწყო.
მას მიაჩნდა, რომ ადამიანების უმრავლესობას არ ჰქონდა მოსმენილი კლასიკური მუსიკა ცოცხალი შესრულებით და სწორედ ეს იყო მიზეზი კლასიკური მუსიკისადმი ინტერესის შესუსტების.
როგორც ის “გურია ნიუსთან” საუბარში აღნიშნავს, მისი მთავარი მიზანია კლასიკური მუსიკა მთელი კონტინენტის მასშტაბით მიიტანოს მსმენელამდე.
“რამდენიმე წლის წინ, როდესაც ბახის ნაწარმოებების მეტროში დაკვრა დავიწყე ეს იყო სოლო პროექტი. ჩემი მთავარი მიზანი იყო ამ პროექტის დახმარებით კლასიკური მუსიკა ფართო მსმენელამდე მიმეტანა”,_ამბობს ჰენდერსონი.
როგორც ცნობილია, საქართველო “Bach in the Subways” წელს მეოთხედ შეუერთდა.
