“ბახმარო კურორტს აღარ ჰგავს _ ნაძვებზე მეტი სახლებია”

ბახმაროში უკანონო მშენებლობების საკითხი, წლებია, აქტუალური თემაა.

მიუხედავად იმისა, რომ 2021 წელს ჩოხატაურის მერი დავით შარაშიძე ამბობდა, რომ მის მიერ გადადგმულმა ნაბიჯმა უკანონო მშენებლობები შეაჩერა, მოქალაქეები სოციალურ ქსელში იმის შესახებ, რომ კურორტზე სახლები სოკოებივით ამოდის, დღესაც წერენ.

 “როცა დაიწყო ჩემი უფლებამოსილება _ 28-29 ოქტომბერს, მეორე დღესვე მე ავირჩიე ბახმარო ნომერ პირველ პრიორიტეტად ჩემს საქმეებში და დავიწყეთ ე. წ. უკანონო “კოლების” ანუ უკანონო ბოძების დანგრევა ტრაქტორით.

ზედამხედველობის სამსახურთან ერთად ავდიოდით და ვამოწმებდით რომელი მშენებლობა იყო კანონიერი, რომელი უკანონო და დავიწყეთ ამ ბოძების დანგრევა“, _ ამბობდა 2021 წელს შარაშიძე ჩვენთან საუბარში და აღნიშნავდა, რომ გადადგმულმა ნაბიჯმა უკანონო სახლების მშენებლობა შეაჩერა.

“ჩემი სახლი დაინგრა _ ნაძვი დაეცა… ვეუბნებოდით კურორტის ხელმძღვანელობას, რომ ხე ხმელი იყო და მიეხედათ. თუმცა, არავინ მიხედა. მერე როგორც ხდება, ისე დაშალეს _ არაფერი დარჩა. მიწა და სახლი კი გვაქვს გაფორმებული, მარა ახლა სახლის უკან იმხელა სახლი გააკეთა ვიღაცამ, ჩვენს ტერიტორიაზეა გადმოსული. გადათხარა ყველაფერი საინტერესოა, ვინ მისცა ნებართვა…”

“ბახმაროში მშენებლობის ქუჩაზე ვინმე ესაძემ დაირეგისტრირა ჩემი კუთვნილი მიწა, სადაც მედგა სახლი. მაქვს ამ სახლის ტექპასპორტი და მშენებლობის ნებართვა. სახლი დაინგრა ნაძვის დაცემისგან წლების წინ. ვინც გარეულია ამ საქმეში, დროულად მიიღეთ ზომები, სანამ აღმოჩნდებით ოთხ კედელში (იქნებ, უცხო არ იყოს თქვენთვის, მაგრამ ახლა უფრო ხანგრძლივი არ გამოდგეს)!!!”

“ვაიმეეეე, ხალხნო, რა ხდება ბახმაროში, რომ იცოდეთ??? სახლები სოკოებზე უფრო ადრე ამოდიან… შოკში ვარ, ისეთი რაღაცეები ხდება იქ… ზოგს ერთი კი არა, რამდენიმე სახლი აქვთ, მაგრამ სახლებს გააჩნია _ სასახლეები აქვთ წამოჭიმული… ბახმარო უკვე კურორტს აღარ ჰგავს _ ნაძვებზე მეტი სახლებია და ამას ყველაფერს პატრონი არა ჰყავს“, _ ამ და მსგავსი სახის არაერთ პოსტს შეხვდებით ფეისბუქჯგუფში “ბახმაროში სახლების გაქირავება-ყიდვა გაყიდვა”.

აღნიშნული პრობლემის შესახებ ცოტა ხნის წინ “ნაციონალური მოძრაობის” პოლიტსაბჭოს თავმჯდომარემ, ლევან ხაბეიშვილმაც ისაუბრა:

“ბახმაროში ყოველდღე ახალი უკანონო მშენებლობა ჩნდება და ამ ყველაფრის უკან ხელისუფლების წარმომადგენლები დგანან, მათ შორის არის ჩოხატაურის მერიც“, _ განაცხადა მაშინ ლევან ხაბეიშვილმა.

მისი თქმით, უმძიმესი რეალობაა, უყურო როგორ ანადგურებენ ბახმაროს ვანდალურად.

“იჩეხება ტყეები, მიმდინარეობს უკანონო მშენებლობები, ყოველდღე რომ ამოვიდეს ადამიანი, ათობით დამატებით უკანონო მშენებლობები დახვდება, რაც, ცხადია, კატასტროფაა.

ამ უკანონო მშენებლობების უკან თანამდებობის პირები, მმართველ პარტიასთან დაახლოებული ადამიანები დგანან. ეს არის სისხლის სამართლის“, _ განაცხადა ლევან ხაბეიშვილმა.

უკანონო მშენებლობებისა და მიწების უკანონოდ მიტაცების პრობლემა ბახმაროში უკვე წლებია დგას და ამის შესახებ “გურია ნიუსი” პერმანენტულად წერს. ერთ-ერთი გახმაურებული სკანდალი ჯერ კიდევ 2010 წელს იყო, როდესაც ზაფხულში გარემოს დაცვის ინსპექციამ პატრულირებისას აღმოაჩინა, რომ მის საკონტროლო ტერიტორიაზე, ტყეში, სახლები იყო აშენებული. ჯერ კიდევ იმ პერიოდში პროკურატურისა და კონსტიტუციური უსაფრთხოების დეპარტამენტის მიერ ამოღებული დოკუმენტაციიდან გაირკვა, რომ ამ საქმის ერთ-ერთი კვანძი ჩოხატაურის მუნიციპალიტეტის ხელმძღვანელ ორგანოებში იმალებოდა…

ამ ხმაურიანი საქმიდან რამდენიმე წლის შემდეგ დაბა ბახმაროს ადმინისტრაცია და ჩოხატაურის მუნიციპალიტეტის მერიის ზედამხედველობის სამსახური გაეხვა სკანდალში _ 2022 წელს საქართველოს პროკურატურამ დაბა ბახმაროში, სახელმწიფოს კუთვნილი მიწების თაღლითურად დაუფლების ფაქტებზე 5 პირს, მათ შორის 1 საჯარო მოხელეს ბრალდება წარუდგინა.

პროკურატურის მიერ 2022 წლის 9 სექტემბერს გავრცელებულ განცხადებაში ვკითხულობთ:

“აჭარის ავტონომიური რესპუბლიკის პროკურატურის მიერ ჩატარებული გამოძიებით დადგინდა, რომ 2018 წელს, ბრალდებულები საცხოვრებელი სახლის ყალბი ტექნიკური პასპორტის გამოყენებით და ჩოხატაურის მუნიციპალიტეტის მერიის ზედამხედველობის სამსახურის სპეციალისტის მიერ არაჯეროვნად შედგენილი დათვალიერების ოქმის საფუძველზე, თაღლითურად დაეუფლნენ ჩოხატაურის მუნიციპალიტეტში, დაბა ბახმაროში მდებარე 95 000 ლარის ღირებულების სამ მიწის ნაკვეთს. შედეგად, სახელმწიფოს დიდი ოდენობით ქონებრივი ზიანი მიადგა.

ოთხ პირს ბრალდება საქართველოს სისხლის სამართლის კოდექსის 180-ე მუხლის მე-2 ნაწილის “ა” და მე-3 ნაწილის “ბ” ქვეპუნქტებით (წინასწარი შეთანხმებით ჯგუფის მიერ დიდი ოდენობით ჩადენილი თაღლითობა) და 362-ე მუხლის მე-2 ნაწილის “ბ” ქვეპუნქტით (ყალბი დოკუმენტის შეძენა–გამოყენება, რამაც მნიშვნელოვანი ზიანი გამოიწვია) წარედგინათ, რაც სასჯელის ზომად 6-დან 9 წლამდე თავისუფლების აღკვეთას ითვალისწინებს.

საჯარო მოხელეს ბრალდება საქართველოს სისხლის სამართლის კოდექსის 342-ე მუხლის პირველი ნაწილით (სამსახურებრივი გულგრილობა) წარედგინა, რაც სასჯელის ზომად 3 წლამდე თავისუფლების აღკვეთას ითვალისწინებს.

პროკურატურა ბრალდებულებისთვის აღკვეთის ღონისძიების შეფარდების თაობაზე შუამდგომლობით სასამართლოს კანონით დადგენილ ვადაში მიმართავს.

აღსანიშნავია, რომ საქართველოს პროკურატურა აქტიურად აგრძელებს გამოძიებას როგორც დაბა ბახმაროში, ასევე დაბა გომისმთაში ანალოგიური დანაშაულის ჩამდენი პირების გამოვლენის და მხილების მიზნით. დაბა ბახმაროში და დაბა გომისმთაში სახელმწიფოს კუთვნილი მიწების თაღლითურად დაუფლების ფაქტებზე სისხლის სამართლებრივი დევნა უკვე დაწყებულია 35 პირის მიმართ და სახელმწიფოს დაახლოებით მილიონი ლარის ღირებულების უძრავი ქონება უკვე დაუბრუნდა“.

აღნიშნულ საკითხთან დაკავშირებით სასაუბროდ ჩოხატაურის მუნიციპალიტეტის ყოფილ მერს და საკრებულოს ამჟამინდელ თავმჯდომარეს ირაკლი კუჭავას დავუკავშირდით. თუმცა, კუჭავამ გვითხრა, რომ აღნიშნულ საქმეზე კომენტარს ვერ გააკეთებს.

_ ბატონო ირაკლი, თქვენ იმ პერიოდში მუნიციპალიტეტის მერი იყავით. პროკურატურის განცხადებაში საუბარია მერიის ზედამხედველობის სამსახურის სუსტ და დარღვევით მუშაობაზე, თქვენ თუ გქონდათ ინფორმაცია ამის შესახებ?

_ არა, რა ინფორმაცია. ეს ისეთივე თემაა, იდენტობის შემოწმება, როგორიც არის ნებისმიერ სოფელში. მაშინ ბახმაროში წარმომადგენელი არ არსებობდა, ბახმაროს დაბის სტატუსი არ ჰქონდა და საქმის შესწავლა დაევალა ზედამხედველობის დეპარტამენტის ერთ–ერთ თანამშრომელს. მას ედავებიან მოწმეების გამოკითხვას _ ორის ნაცვლად ერთი რატომ გამოიკითხა და ა. შ.

რასაც ედავებიან, არ არის დაკავშირებული უკანონო მიწებთან. უკანონო მიწებს რაც შეეხება, ასეთი 900-ზე მეტი შენობა არის დაფიქსირებული და იმიტომ იწოდება უკანონოდ, რომ მაშინდელმა მერიამ და ზედამხედველობის სამსახურმა ეს დააფიქსირა. უბრალოდ, ჩვენ არ გვეყო იმის რესურსი, რომ დემონტაჟი მოგვეხდინა, თორემ ჯარიმები დაწერილია. მაგასთან დაკავშირებით მე ვერანაირ კომენტარს ვერ გავაკეთებ _ პროცესი მიდის სასამართლოში და დადგება შედეგი, _ ამბობს კუჭავა.

ბახმაროში სახელმწიფო კუთვნილი მიწების თაღლითურად დაუფლების ფაქტებზე განჩინება ბათუმის სასამართლომ 2022 წლის 10 სექტემბერს მიიღო.

“გურია ნიუსს” ბათუმის სასამართლოს პრესსამსახურში განუცხადეს, რომ 5-ვე პირს გირაო შეეფარდა.

“ი. ე. _ 3 000 ლარი, ხ. კ. _ 5 000 ლარი, დ. ჟ. _ 2 000 ლარი, კ. მ. –_3 000 ლარი, ა. ლ. _ 2 000 ლარი. აქვე დავაზუსტებთ, რომ პროკურატურის მოთხოვნაც გირაოს შეფარდება იყო 5-ვე პირის მიმართ“, _ გვითხრეს ბათუმის სასამართლოში.

2022 წლის 13 ოქტომბერს პროკურატურამ კიდევ 1 განცხადება გაავრცელა:

“აჭარის ავტონომიური რესპუბლიკის პროკურატურის მიერ ჩატარებული გამოძიებით დადგინდა, რომ 2021 წელს, ბრალდებულები ყალბი დოკუმენტების გამოყენებით, თაღლითურად დაეუფლნენ ოზურგეთის მუნიციპალიტეტის დაბა გომისმთაში მდებარე მიწის ნაკვეთებს, რითაც სახელმწიფოს 133 692 ლარის ქონებრივი ზიანი მიაყენეს.

სამივე ბრალდებულმა ითანამშრომლა გამოძიებასთან და აღიარა ჩადენილი დანაშაული. სასამართლოს გამამტყუნებელი განაჩენით, მათ ჩამოერთვათ თაღლითურად დაუფლებული მიწის ნაკვეთები, რომელიც დაუბრუნდა სახელმწიფოს.

აღსანიშნავია, რომ საქართველოს პროკურატურა აქტიურად აგრძელებს გამოძიებას, როგორც დაბა გომისმთაში, ასევე დაბა ბახმაროში ანალოგიური დანაშაულის ჩამდენი პირების გამოვლენის და მხილების მიზნით.

დაბა გომისმთაში და დაბა ბახმაროში სახელმწიფოს კუთვნილი მიწების თაღლითურად დაუფლების ფაქტებზე სისხლის სამართლებრივი დევნა დაწყებულია 38 პირის მიმართ და სახელმწიფოს 1 120 041 ლარის ღირებულების უძრავი ქონება დაუბრუნდა“, _ აცხადებდა პროკურატურა.

პროკურატურის გვერდზე აღნიშნულ საკითხზე ბოლოს ინფორმაცია 2023 წელს გავრცელდა, რომლის თანახმადაც დაბა გომისმთაში და დაბა ბახმაროში სახელმწიფოს კუთვნილი მიწების თაღლითურად დაუფლების ფაქტებზე სისხლის სამართლებრივი დევნა დაწყებულია 63 პირის მიმართ და სახელმწიფოს 2 102 636 ლარის ღირებულების უძრავი ქონება დაუბრუნდა.