17 მარტს, ჩოხატაურში, საქართველოს საფეხბურთო ჩემპიონატის პირველი ტურის მატჩი გაიმართა ადგილობრივ “ბახმაროს” და ქუთაისის “ტორპედო 2-ს” შორის. პირველი ტაიმი გარდამავალი უპირატესობით წარიმართა _ საგოლე მომენტი ორივე კართან შეიქმნა, თუმცა, ანგარიშის გახსნა ვერცერთმა გუნდმა ვერ მოახერხა.
განსხვავებულად განვითარდა მოვლენები მეორე ტაიმში. ინიციატივას მასპინძლები ფლობდნენ და უფრო მწვავედაც უტევდნენ, თუმცა, სტადიონზე შეკრებილ გულშემატკივარს ნერვიულობა მაინც მოუწია. ჩოხატაურელებმა ანგარიშის გახსნა ტაიმის დამთავრებამდე 10 წუთით ადრე მოახერხეს ბაბუნაშვილის თავური დარტყმით. რასაც ორიოდე წუთში ჩინჩალაძის ეფექტური გოლი მოჰყვა და მატჩის ბედიც გადაწყვიტა. საბოლოოდ, “ბახმარომ” მძიმე ბრძოლაში 2:0 მოუგო საკმაოდ “უხერხულ” მეტოქეს და საოცნებო შედეგამდე პირველი ნაბიჯი გადადგა.
გათამაშების რეგლამენტის თანახმად, მონაწილე 15 გუნდიდან საუკეთესო ორი გუნდი პირდაპირ გადადის მესამე ლიგაში, მესამე ადგილოსანი კი პლეიოფში ცდის ბედს.
მომდევნო თამაში “ბახმაროს” 23 მარტს აბაშაში აქვს და მის შედეგზე ძალიან ბევრია დამოკიდებული.
