| ბახვი ჰესის საგანმანათლებლო პროგრამის ფარგლებში, ოზურგეთის მუნიციპალიტეტის სოფელ მთისპირის და ჩოხატაურის მუნიციპალიტეტის სოფელ ჩხაკაურას საჯარო სკოლის მოსწავლეებთან კიდევ ერთი შეხვედრა გაიმართა.
ამჯერად, კომპანიის მოწვევით, USAID-ის საქართველოს ენერგეტიკული მომავლის უზრუნველყოფის პროგრამამ და საქართველოს განახლებადი ენერგიის განვითარების ასოციაცია GREDA-მ ქვეყნის ენერგოუსაფრთხოების უპირატესობების, ეკონომიკური ზრდისა და ქართველი ხალხის კეთილდღეობის შესახებ ლექცია გამართა. ცნობიერების ამაღლების კამპანიის ფარგლებში დაგეგმილი ლექციები მიზნად ისახავს მომავალ თაობაში განახლებადი ენერგიისა და გარემოს დაცვის შესახებ ცოდნის ამაღლებას. მიზნობრივი ინტერვენციები ახალგაზრდებში მდგრადი გადაწყვეტილებებისა და ქვეყნის ენერგეტიკულ უსაფრთხოებაში მათი წვლილის წასახალისებლად არის მიმართული, ხოლო ახალი იდეები და ტექნოლოგიები მათ კრიტიკული აზროვნების განვითარებასა და ენერგეტიკული პრობლემების მოგვარების ახალი გზების პოვნაში დაეხმარებათ. „მოხარულნი ვართ, რომ GREDA-ს დახმარებით, გვაქვს შესაძლებლობა მთისპირის სკოლის მოსწავლეებს სექტორში მომუშავე ექსპერტები გავაცნოთ. ჩვენი მიზანია ბევრი ვისაუბროთ განახლებადი ენერგიების უპირატესობაზე. მნიშვნელოვანია ახალგაზრდა თაობამ იცოდეს იმ სიკეთეების შესახებ, რაც ამ ტიპის ენერგიის წყაროებს მოაქვთ. კადრების დეფიციტის პირობებში ასევე, უაღრესად მნიშვნელოვანია დავანახოთ აბიტურიენტებს ის პერსპექტივები, რაც ამ დარგის სპეციალისტებს შეიძლება ჰქონდეთ. პროფესიის არჩევისას დაფიქრებაა საჭირო, გასათვალისწინებელია მოთხოვნები, რაც სექტორს გააჩნია, კონკურენცია, შესაძლებლობები, ქვეყანაში ამ მხრივ არსებული განვითარების ტენდენციები. უნდა ითქვას, რომ მთისპირში მეორედ გაიმართა ეს შეხვედრა, პირველი შარშან ამ დროს ჩატარდა, ჩხაკაურაში კი პირველად იყვნენ GREDA-ს წარმომადგენლები. უფროსკლასელებმა უშუალოდ ამ დარგის ახალგაზრდა პროფესიონალებისგან შეიტყვეს ბევრი ახალი რამ ენერგეტიკაზე როგორც დარგზე და პროფესიულ არჩევანზე. ჩვენ, ჩვენის მხივ შეგვიძლია, და გაცხადებულიც გვაქვს ეს შესაძლებლობა, რომ ხელს შევუწყობთ და წავახალისებთ ახალგაზრდებს, თუკი საკუთარ მომავალს ენერგეტიკას ან გარემოსდაცვას დაუკავშირებენ“, _ განაცხადა დავით კობერიძემ, ბახვი ჰესის გარემოსდაცვისა და სოციალური საკითხების მენეჯერმა. |
