გუშინ რუსულ მასმედიაში ცნობილი კომენტატორი გიორგი ჩერდანცევის საინტერესო მოსაზრება გამოქვეყნდა _ საფეხბურთო მიმომხილველი არც მეტი, არც ნაკლები, კატალონიური “ბარსელონას“ ხელმძღვანელობას გუნდიდან აბარგებული ლეო მესის შემცვლელად ყაზანის “რუბინისა“ და საქართველოს ეროვნული გუნდის თავდამსხმელი ხვიჩა კვარაცხელიას შეძენას სთავაზობს.
“საკითხი სწორად უნდა დაისვას. ფინანსური პრობლემების გამო, “იუვენტუსმაც“ ვერ შეძლო რონალდუს შენარჩუნება და “ბარსელონამ“ კი მესის. თანამედროვე ფეხბურთში სრულიად ნორმალურია, როდესაც ახალგაზრდა და ნიჭიერი ფეხბურთელი მოდის კლუბში, თამაშობს რამდენიმე სეზონს, იზრდება მისი ღირებულება და შემდეგ კლუბი ყიდის იქ, სადაც ფულს გადაიხდიან, რადგან ფეხბურთი მხოლოდ გართობა არაა _ ბიზნესიცაა. ეს ნორმალური მოვლენაა, ნებისმიერ კლუბისთვის, მათ შორის “რუბინისთვის.
ვფიქრობ, ხვიჩა უნიკალური ნიჭის ფეხბურთელია. მგონია, მას ნებისმიერ ჩემპიონატში და ნებისმიერ გუნდში თამაში შეუძლია. “ბარსელონას“ ადგილზე რომ ვიყო, მესის შემცვლელად წავიყვანდი. რაც შეეხება ინგლისს, იქაც უყვართ ასეთი ფეხბურთელები: სწრაფი, ტექნიკური. ჯანმრთელობის პრობლემები თუ არ შეექმნება, მას ბრწყინვალე კარიერა ექნება, შეუძლია მსოფლიოში ერთ-ერთი საუკეთესო ფეხბურთელი გახდეს“, _ განაცხადა გიორგი ჩერდანცევმა.
რასაკვირველია, “ბარსელონაში“ ხვიჩა კვარაცხელიას ხილვა არა ერთი ქართველი გულშემატკივრის თითქოსდა აუხდენელი ოცნებაა, მაგრამ ამ ცხოვრებას წინდაწინ ვერანაირად ვერ განსაზღვრავ და ის რაც დღეს ერთგვარ უტოპიას წარმოადგენს, ხვალ შეიძლება სრულ რეალობად გადაიქცეს.
ამ რუსეთს კი ვერანაირად ვერ გაუგებ. გიორგი ჩერდანცევმა “რუბინში“ ჩარჩენილ ქართველს ერთგვარი მალამო მოასხა, მაგრამ რუსულმა გამოცემამ “TNV” სრულიად საწინააღმდეგო რამ მოიმოქმედა და ხვიჩა კვარაცხელია დაუნდობელი კრიტიკის ქარცეცხლში გაატარა.
ერთი თვის წინ “რუბინმა“ 7 მილიონ ევროდ დანიის ახალგაზრდული ნაკრების წევრი ანდერს დრეიერი შეიძინა. მაშინ გაჩნდა მოსაზრება, რომ კლუბს დრეიერი კვარაცხელიას შემცვლელად სურდა. მოსაზრება მოსაზრებად დარჩა, კვარაცხელიამ ახალი ნავსაყუდელი ვერ იპოვა და კვლავ რუსეთში დარჩა. რუსეთის საფეხბურთო პირველობის მეშვიდე ტურში “რუბინმა“ ლუკა გაგნიძის “ურალს“ უმასპინძლა და 4:0 დაამარცხა. ამ შეხვედრაში კვარაცხელიამ ერთი საგოლე გადაცემა მიითვალა, დებიუტანტმა დრეიერმა კი “ჰეთ-თრიკი“ შეასრულა. ამ ფაქტს ზემოთ ხსენებული რუსული გამოცემაც გამოეხმაურა და… ქართველი გააკრიტიკა.
“კვარაცხელიამ დრეიერისგან მაგალითი უნდა აიღოს, თუ სამუდამოდ რუსეთის პრემიერლიგაში დარჩენა არ სურს.
დრეიერმა თავის სადებიუტო მატჩში ჰეთ-თრიკი შეასრულა, რაც არა მხოლოდ “რუბინის“ რეკორდია, არამედ მთელი პრემიერლიგის. მოხერხებულ და სწრაფ ანდერსს კარგი დარტყმა და პოზიციის შერჩევის საოცარი უნარი აქვს. პლუს ამას გოლის ალღო. გასულ მატჩში მან ეს ყველაფერი სრულად წარმოაჩინა.
ტექნიკის გარდა, სხვა ძლიერი თვისებები ხვიჩას თამაშში რთული საპოვნელია, თუ რა თქმა უნდა, რუსეთის პრემიერლიგის დონიდან გამომდინარე არ ვიმსჯელებთ.
დანიელი ახალწვეულის ფონზე ცხადია, თუ რატომ დარჩა კვარაცხელია რუსეთის პრემიერლიგაში. დიახ, კვარაცხელიამ საგოლე პასი გააკეთა, მაგრამ ეს იმ კატეგორიიდან იყო, როცა გოლი მთლიანად მისმა ავტორმა შექმნა. ხვიჩას პასი ნელი და არასასიამოვნო იყო, მაგრამ დანიელმა ქუსლით გატანა შეძლო.
დანიელი ახალწვეულის ფონზე, ჩვენ კიდევ ერთხელ დავინახეთ, თუ რატომ დარჩა კვარაცხელია “რუბინში“. მიუხედავად უამრავი ჭორისა, რომ მისით ტოპ კლუბები ინტერესდებოდნენ. მას ტრადიციულად ბურთი ფეხში ხშირად ჰქონდა და ასევე ხშირად კარგავდა, არც თუ ისე კარგ მინდვრის საფარზე“.
ამ მაგალითიდანაც კარგად ჩანს, თუ რატომ უნდა დატოვოს ხვიჩამ რუსეთი და როგორმე ევროპაში წავიდეს. როგორც კი საშუალება და მიზეზი მიეცათ, რუსულმა მასმედიამ კვარაცხელიას თამაშისა და შესაძლებლობების გაუფასურება დაიწყო.
გუშინ ჩემპიონთა ლიგის ჯგუფური სტადიის პირველი ტურის მორიგი შეხვედრები გაიმართა.
A ჯგუფი: “ბრიუგე“ _ “პსჟ“ 1:1, “მანჩესტერ სიტი“ _ “ლაიპციგი“ 6:3.
B ჯგუფი: “ატლეტიკო“ (მადრიდი) _ “პორტო“ 0:0, “ლივერპული“ – “მილანი“ 3:2.
C ჯგუფი: “ბეშიქთაში“ _ “ბორუსია“ (დორტმუნდი) 1:2, “სპორტინგი“ _ “აიაქსი“ 1:5.
D ჯგუფი: “შერიფი“ _ “შახტარი“ 2:0. “ინტერი“ _ “რეალი“ (მადრიდი) 0:1.
[sexy_author_bio]
