ბათუმში კორონავირუსით 22 წლის გოგო გარდაიცვალა. ის ბათუმის საერთაშორისო ჰოსპიტალში 12 დეკემბრიდან მკურნალობდა.
როგორც „ბაუში“ განაცხადეს, კლინიკაში შეყვანის დროს მას ჰქონდა ორმხრივი პნევმონია, მდგომარეობა რამდენიმე დღეში დამძიმდა.
„გოგონა 12 დეკემბერს შემოვიდა „ბაუში“. მას უკვე ჰქონდა ფილტვის დაზიანების მაღალი ინდექსი, ორმხირივი პნევმონია, სუნთქვის გართულებით შემოიყვანეს. რამდენიმე დღეში მდგომარეობა კიდევ უფრო დამძიმდა და 26 დეკემბერს ხელოვნური სუნთქვის აპარატზე გადაიყვანეს. ექიმებს მუდმივად ჰქონდათ კონსულტაციები წამყვან მედიკოსებთან როგორც ქვეყნის შიგნით, ისევე ფარგლებს გარეთ. სამწუხაროდ, დღეს 12 საათზე პაციენტი გარდაიცვალა”, – აცხადებენ „ბაუში“.
ამ დროისთვის საქართველოში კორონავირუსის 233 879 შემთხვევაა დადასტურებული. მათ შორის გამოჯანმრთელდა 223 276, გარდაიცვალა 2 666 პაციენტი.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
