ბახმაროს, კონკრეტულად, ასკანის ქუჩის ერთ-ერთმა დამსვენებელმა “გურია ნიუსს” წერილი მოსწერა. ქალბატონი, რომელიც წერილში მთელი ქუჩის სახელით საუბრობს, ხსენებული ქუჩის ინფრასტრუქტურული პრობლემების შესახებ გვწერს. ის გვთხოვს, რომ გავასაჯაროოთ წერილი, რომელსაც უცვლელად გთავაზობთ.
“გამარჯობათ, მოგმართავთ თხოვნით, გაასაჯაროოთ ბახმაროში ასკანის ქუჩაზე შექმნილი სავალალო მდგომარეობა, რათა მოხდეს სწრაფი რეაგირება.
ბახმაროს ასკანის ქუჩის მაცხოვრებლების სახელით, გვსურს, თქვენი ყურადღება მივაპყროთ იმ კრიტიკულ მდგომარეობას, რაც ჩვენს ქუჩაზე შეიქმნა ბოლო პერიოდში.
ბოლო ძლიერი წვიმების შედეგად, ისედაც დაზიანებული გზის საფარი კიდევ უფრო გაუარესდა. ადგილობრივი მოსახლეობა წლების განმავლობაში საკუთარი რესურსებით ცდილობდა მისი გამართვის უზრუნველყოფას, თუმცა ახლა მდგომარეობა იმდენად მძიმეა, რომ უკვე სერიოზულ საფრთხეს უქმნის, როგორც მცხოვრებლების, ისე დამსვენებლების უსაფრთხო გადაადგილებას.
სამწუხაროდ, უკვე დაფიქსირდა შემთხვევები, როდესაც ბავშვები ჩავარდნენ ღრმა თხრილებში, ხოლო ხანდაზმულებს გადაადგილება, ფაქტობრივად, შეუძლებელი გაუხდათ.
გარდა ამისა, გზის გასწვრივ სერიოზულად დაზიანებულია ელექტროენერგიის გადამცემი კაბელები, რომლებიც ღიად და მიწის ზედაპირზეა დაყრილი. ეს რეალურ და დაუყოვნებელ საფრთხეს წარმოადგენს როგორც ქვეითად მოსიარულეებისთვის, ისე ბავშვებისა და დამსვენებლებისთვის. დაზიანების შედეგად უკვე მესამე წელია რაც კონკრეტული ნაწილის მოსახლეობა უკვე მესამე წელია რაც ელექტროენერგიის გარეშეა დარჩენილი.
მიუხედავად იმისა, რომ საკითხზე არაერთხელ მივმართეთ შესაბამის სამსახურს, დღემდე რეაგირება არ ჩანს.
იმისთვის, რომ უკეთ წარმოიდგინოთ შექმნილი ვითარება, ვურთავთ სურათებს.
გვწერს ქუჩის სახელით ბახმაროს ერთ-ერთი დამსვენებელი.
წერილზე კომპეტენტური პირების კომენტარს “გურია ნიუსი” მალე შემოგთავაზებთ.
