“ბეღურები ღამით არ დაფრინავენ” – ლევან ლორიას შემოქმედებითი საღამო მწერალთა სახლში

მწერალთა სახლში  ლევან ლორია მკითხველს შეხვდა. საღამოს  მთავარი თემა მწერლის ახალი წიგნი “ბეღურები ღამით არ დაფრინავენ” იყო. ცნობისთვის, წიგნის პრეზენტაცია ივნისში შედგა და საზოგადოების მხრიდან დიდი ინტერესიც გამოიწვია. სწორედ ამ ინტერესმა მწერლებს, პოეტებს, მხატვრებს და კიდევ მრავალ სხვა ადამიანს, ლევან ლორიას მეგობრებს, კურსელებსა თუ მოწაფეებს თავი ერთად მოუყარა.

ღონისძიებას მწერალი დავით შემოქმედელი უძღვებოდა.

“ლიტერატურა ასახავს იმას რა წყობაშიც ვართ, უფრო მეტი ხარისხით, ზოგჯერ უფრო პროტესტულად და ამიტომ ამ მონოტონურ  სახელმწიფოში და ჩვენს ცხოვრებაში,  სადაც ასეთი დაძაბულობაა, ლიტერატურა კიდევ უფრო მკაფიოდ  გვიჩვენებას ამას და ლევანის წიგნს  კი უფრო მშვიდ გარემოში გადავყავართ, რაც აუცილებელია, რომ ლიტერატურამ მოგვცეს  საშუალება  დავისვენოთ”,_ თქვა შემოქმედელმა.

მან ასევე აღნიშნა, რომ  ხელოვნების ნაწარმოებები იზომება იმის მიხედვით თუ რა მაგნიტური ველი აქვს, როგორ მოქმედებს ის ადამიანებზე, რა ფსიქოენერგეტიკული ველი აქვს ამ ნაწარმოებს და ლევანის ნაწარმოებები ამ კუთხით რომ გავზომოთ, მას ძალიან დადებითი  მუხტი დაუფიქსირდება.

როგორც წიგნის რედაქტორმა მაია მიქაიამ სიტყვით გამოსვლისას თქვა, ლევანის მოთხრობები იმდენად ჰგავს თვითონ ლევანს, სიალალით, სიკეთით და ადამიანობით, რომ გასულიერება რომ შეიძლებოდეს ამ მოთხრობების, ძალიან ბევრი ტყუპისცალი ეყოლებოდა.

“აქვს მრავალფეროვანი თემატიკა. არცერთი მოთხრობა არ ჰგავს მეორე მოთხრობას. გამოირჩევა ასევე თემების მრავალფეროვნებით. მძიმე საკითხებსაც ეხება. არის ისეთი აქტუალური თემები, რომლებიც აუცილებლად უნდა დაინახოს მწერალმა, უნდა აღწეროს და გააცნოს მკითხველს, მაგრამ  ლევანის მოთხრობებში არ არის სიმძიმე,  ისე გვთავაზობს და  ამ დროს კი ძალიან მძიმე თემებს ეხება. ვფიქრობ, ლევანი არ არის ბოლომდე ისე  დაფასებული, როგორც  იმსახურებს და ვფიქრობ, დროთა განმავლობაში ეს დამსახურებაც მოვა”,_ თქვა მიქაიამ.

თავად მწერალმა ლევან ლორიამ კი აუდიტორიას წეროზე მწარედ შეყვარებული ბეღურას მონოლოგი წაუკითხა. სიტყვით გამოსასვლელად კი საღამოს არაერთი სტუმარი მიიწვია.

სიტყვით გამომსვლელთა შორის იყო მწერალთა სახლის დირექტორი ქეთევან დუმბაძეც. საღამო კი მუსიკალურად ცნობილმა სოპრანომ, ირმა ბერძენიშვილმა გააფორმა.

ცნობისთვის, ლევან ლორიას მოთხრობები და ლექსები 2003 წლიდან იბეჭდება ქართულ პერიოდულ პრესაში. ის დაიბადა გურიაში, ამიტომ გასაკვირი არ არის, რომ მის ნაწარმოებებს თან ახლავს გურული იუმორი და სისხარტე.  ეს კრებული  ავტორის მეშვიდე წიგნია. აქამდე გამოქვეყნებული აქვს ერთი პოეტური, ოთხი მოთხრობების კრებული და ერთი რომანი. არის “ოდეონის”, “ლილეს”, ჟურნალ “განთიადის”, გოდერძი ჩოხელის და რევაზ ინანიშვილის ლიტერატურული კონკურსების პრიზიორი და ლაურეატი. აგრეთვე “წეროს” და პენ-მარათონის ფინალისტი. კულტურის, სპორტისა და ახალგაზრდობის სამინისტროს მიერ განხორციელებული პროექტის – “ცოცხალი წიგნების” წევრი.