“ბეგიმ დამიბარა” _ სად და რატომ იბარებს “ოცნების” შტაბი აქტივს

ქალაქ ოზურგეთში, რესტორან „ელეგანტში“, რომელიც არსებული ინფორმაციით მერობის კანდიდატის, ბეგლარ სიორიძის საკუთრებაა, „ქართული ოცნების“ ოზურგეთის რაიონული ორგანიზაციის წარმომადგენლები, ქალაქისა და მუნიციპალიტეტის ააიპ–ის მენეჯერებს, მათ თანამშრომლებს და საჯარო სამსახურში დასაქმებულ პირებს ისევ იბარებენ.

„გურია ნიუსი“ ჯერ კიდევ ორი დღის წინ წერდა, რომ ოზურგეთის მუნიციპალიტეტის სკოლამდელი სააღმზრდელო ცენტრის დირექტორი ავთანდილ მექვაბიშვილი ბაღების მენეჯერებთან და თანამშრომლებთან იმ “საეჭვო“ პირთა ვინაობას განიხილავდა, რომლებიც მხარს არ უჭერენ მმართველი გუნდის მერობის კანდიდატს.

გუშინ კი გავარკვიეთ, რომ „ელეგანტში“, სამუშაო დღის დასრულებისთანავე  ხალხური ცეკვისა და სიმღერის ანსამბლების წარმომადგენლები დაიბარეს:

_არ ვიცი რაზე ვართ დაბარებული, ჩამოდითო, გვითხრეს და ჩამოვედი, _ აღნიშნა ჩვენთან საუბრისას, შეხვედრაზე მისულმა ერთ-ერთმა პირმა, რომლის თქმით რესტორანში ბეგლარ სიორიძის დავალებით მივიდა.

მერობის კანდიდატის შტაბის ხელმძღვანელი და პარტიის აღმასრულებელი მდივანი გიორგი ღურჯუმელიძე ამბობს, რომ პარტიის წარმომადგენლები  აქტივისტებს და ამომრჩევლებს კანონის შესაბამისად ხვდებიან და არცერთ მათგანზე მუქარა და შანტაჟი არ ხორციელდება:

_ პარტიას ი/მ ხათუნა ღლონტთან გაფორმებული აქვს ხელშეკრულება და ამის საფუძველზე ვმართავთ აქ შეხვედრებს.  ჩვენს აქტივს და მხარდამჭერებს ვხვდებით, 19:00 საათის შემდეგ. ყველას აქვს კონსტიტუციური უფლება ვისაც უნდა იმას შეხვდეს. თუ დაძალებაზეა საუბარი,  მე მგონი, ეგ 2012 წლის 1 ოქტომბერს დავამთავრეთ. არ ვიცი, იქ, რომელიმე სამსახურის უფროსი ან თანამშრომელი თუ იყო. მე შტაბის უფროსი ვარ, გამგებლის მოადგილე და ამჟამად ვარ შვებულებაში, სამსახურეობრივი უფლებამოსილება შეჩერებული მაქვს. თუ ვინმეს სურვილი აქვს ჩვენთან შეხვედრაზე მოვიდეს, კითხვა დაგვისვას, გახსნილები ვართ ყოველთვის და კანონით განსაზღვრულ ყველა პროცედურას ვიცავთ, _ აღნიშნა ჩვენთან საუბრისას ღურჯუმელიძემ.

_ბატონო გიორგი, ჩვენი ინფორმაციით რესტორანში მოსულ ადამიანებს ემუქრებიან, რომ თუკი  სიორიძეს არ მისცემენ ხმას, ეს მათთვის ცუდად დამთავრდება…

–  არა, ღმერთმა დაგვიფაროს, ნებისმიერმა კანდიდატმა, რომ მიმართოს ვინმეს ასე! თუ ასეთ ფაქტს ჰქონდა ადგილი, პირმა, რომლის მიმართაც მსგავსი ქმედება გახორციელდა  სამართალდამცავ ორგანოებს უნდა მიმართოს, _ ამბობს „ოცნების“ ოზურგეთის საარჩევნო შტაბის უფროსი.

გიორგი ღურჯუმელიძის თქმით, შეხვედრებს თავად მართავს, როგორც შტაბის უფროსი:

_ მე ვხდები ამ ადამიანებს და აქტივს, ასევე ხვდება ბეგლარ სიორიძეც.

–ბატონო გიორგი, აქტივს ააიპ–ების თანამშრომლებს ეძახით?

_ აქტივს ვეძახით ნებისმიერ ადამიანს ვინც მხარს გვიჭერს _ არ აქვს მნიშვნელობა სად მუშაობს. შეიძლება არსად არ მუშაობდეს, რა მნიშვნელობა აქვს?!

საია-ს ოზურგეთის ოფისის ხელმძღვანელი თამაზ ტრაპაიძე ამბობს, რომ თუ მსგავს შეხვედრებზე ნამდვილად არსებობს  შანტაჟის, მუქარის და მოსყიდვის ფაქტები, ეს ნამდვილად არის კანონდარღვევა.

– თუ ამის მტკიცებულება, ფაქტები, არსებობს ერთი მაინც მოგვაწოდეთ და საიას ოზურგეთის ოფისი ადმინისტრაციულ საჩივარს მოამზადებს და მიყვება ამ საქმეს ბოლომდე, _ აღნიშნა ჩვენთან საუბრისას ტრაპაიძემ.