ბელარუსში ჯორჯ ორუელის 1984-ის გაყიდვა აკრძალეს, – ინფორმაციას ლუკაშენკოს მთავრობის მიერ ექსტრემისტულ ორგანიზაციად შეფასებული გამოცემა Наша Ніва ავრცელებს.
წიგნის მაღაზიებს რომანის გაყიდვიდან ამოღება უბრძანეს. შესაბამისი განკარგულება 19 მაისამდე უნდა შესრულდეს.
,,1984“ ბრიტანელი მწერლის, ჯორჯ ორუელის ცნობილი ფანტასტიკური რომანია. ანტიუტოპიის მოქმედება ახლო მომავალში, ტოტალიტარულ სახელმწიფოში ხდება, რომელსაც ძლიერი პროპაგანდისტული ინსტიტუციებისა და რეპრესიების საშუალებით დიქტატურა მართავს. მოსახლეობა მოკლებულია სამოქალაქო უფლებებს და ინდივიდუალობს, წესრიგის იდეა კი აბსოლუტიზირებულია, არსებობს დიდი ძმის პიროვნების კულტი, ხალხს მოეთხოვება სრული და უკრიტიკო წარდგენა ხელისუფლებისადმი. ენაც კი შეცვალა Newspeak-მა. “ომი მშვიდობაა”, “თავისუფლება მონობაა” და “დიდი ძმა გიყურებს” – ეს გამოთქმები რომანიდან აფორიზმებია
საბჭოთა კავშირში და აღმოსავლეთ ევროპის სხვა ტოტალიტარულ სახელმწიფოებში წიგნი 1987 წლამდე აკრძალული იყო.
ბელარუსში ორუელის რომანი პირველად 1992 წელს მთარგმნელმა სერგეი შუპამ თარგმნა და გამოიცა. 2020 წელს კი რომანი გამომცემლობა Янушкевич-მა ხელახლა თარგმნა და გამოსცა. 2021 წელს კი გამომცემლობამ ტირაჟი გაზარდა, რადგან წიგნი სხვადასხვა მაღაზიებში გაყიდვების ლიდერად იქცა. სამთავრობო ვებგვერდის Белкнига-ს ბესტსელერების რეიტინგში 1984 მეოთხე ადგილს იკავებს, რაც ათეულობით წლის წინ გამოცემული წიგნებისთვის არცთუ დამახასიათებელია.
ეს ასახავს, თუ როგორ აღიქვამს ხალხი ქვეყანაში მიმდინარე პროცესებს.
ცნობისთვის, 16 მაისს სწორედ ორუელის ხსენებული წიგნის გამომცემი Янушкевич-ის დამფუძნებელი, ანდრეი იანუშკევიჩი დააკავეს. გავრცელებული ინფორმაციით, იანუშკევიჩის მაღაზიაში პოლიციამ რეიდი ჩაატარა, 200-ზე მეტი წიგნი ამოიღო და გამომცემელი დააკავა. 15-ზე მეტი პუბლიკაციას კი ექსპერტიზა ჩაუტარა. იანუშკევიჩის დაკავების მიზეზი უცნობია.
როგორც Наша Ніва წერს, ამას წინ უძღოდა შეკვეთილი ანგარიშების შექმნა ფალსიფიცირებული ფაქტებით TG არხებზე Azarenka და Gladkaya, რომლებსაც სპეცსამსახურები იყენებდნენ პროპაგანდის გასამართლებლად.
,,Наша Ніва აქვს წიგნის გაყიდვის აკრძალვის ბრძანების ასლი. ჩვენ არ ვაქვეყნებთ მას უსაფრთხოების მიზეზების გამო, ვინც ის მოგვცა. არ ვიცით, სულ რამდენ წიგნის მაღაზიასა და წიგნის გამავრცელებელ ქსელს აქვს მიღებული ასეთი შეკვეთა.
ლუკაშენკოს მთავრობის მიერ ექსტრემისტულ შეფასებული გამოცემა, ბელარუსელებისთვის, როგორც საზოგადოებისთვის და თითოეული ჩვენგანისთვის მნიშვნელოვანია, რომ ბელორუსი არ გახდეს დუმილის ზონა. მნიშვნელოვანია, რომ ვიცოდეთ ერთმანეთის და საზოგადოების შესახებ – როგორ ვცხოვრობთ, საფრთხეებით და იმედებით“, – წერს ორგანიზაცია.
ავტორი
