სერიოზული ეჭვები არსებობს იმასთან დაკავშირებით, არის თუ არა საქართველოს უსაფრთხო ქვეყნად მიჩნევა შესაბამისობაში ევროკავშირის კანონმდებლობასთან. ამის შესახებ ნათქვამია ბერლინის ადმინისტრაციული სასამართლოს მიერ მიღებულ განაჩენში.
2023 წელს გერმანიამ საქართველო უსაფრთხო ქვეყნად ცნო, ანუ მიიჩნია, რომ ამ ქვეყანაში ადგილი არ აქვს ადამიანის უფლებების სისტემურ დარღვევებს და პოლიტიკური ან სხვა ნიშნით ადამიანის დევნას. ამან გერმანიას მკვეთრად გაუიოლა პროცედურა, უარი უთხრას საქართველოს მოქალაქეებს პოლიტიკური ნიშნით თავშესაფრის სტატუსის განცხადებაზე, რადგან უსაფრთხო სტატუსით დაადგინა პრეზუმფცია, რომ საქართველოში პოლიტიკურად მოტივირებული სამართალი არ არსებობს.
როგორც ირკვევა ცოტა ხნის წინ გერმანიას პოლიტიკური თავშესაფრის მოთხოვნით მიმართ ქართველმა წყვილმა. ისინი სასამართლოში ასაჩივრებენ გერმანიის შესაბამისი ორგანოს მხრიდან მიღებულ უარს მათთვის თავშესაფრის მინიჭების თაობაზე. ქმარი ირწმუნება, რომ საქართველოს საჯარო დაწესებულებაში ვეტერინარად მუშაობდა და გაათავისუფლეს პოლიტიკური ნიშნით, რადგან მონაწილეობდა “რუსული კანონის” საწინააღმდეგო აქციებში. ცოლიც საჯარო უწყებაში მუშაობდა საქართველოში და აცხადებს, რომ მიიღო შენიშვნები ხელმძღვანელობისაგან პროტესტში მონაწილეობისთვის.
ამის შემდეგ ცოლ-ქმარი გერმანიაში გაემგზავრა და პოლიტიკური ნიშნით თავშესაფარი მოითხოვა.
ბერლინის სასამართლომ მათ დროებით მიანიჭა თავშესაფარი სანამ, საქმეზე საბოლოო განაჩენს გამოიტანს და სწორედ ამ გადაწყვეტილებაში აღნიშნა, რომ კითხვის ნიშნის ქვეშაა, საქართველო მართლაც არის თუ არა უსაფრთხო ქვეყანა.
სასამართლო ხაზს უსვამს, რომ საქართველო ვერ აკონტროლებს ორ რეგიონს აფხაზეთსა და სამხრეთ ოსეთს და როდესაც ქვეყნის ტერიტორიის ნაწილი უსაფრთხო არ არის მართლმსაჯულების ევროპული სასამართლოს თანახმად, ის შესაძლოა ვერ ჩაითვალოს უსაფრთხოდ. ბერლინის სასამართლომ ხაზი გაუსვა რომ აფხაზეთსა და სამხრეთ ოსეთში ადამიანის უფლებების მხრივ მძიმე მდგომარეობაა, რომ იქ დევნილები დაბრუნებას ვერ ახერხებენ, არ არსებობს გადაადგილების თავისუფლება, ასევე პრობლემებია პოლიტიკური და რელიგიური თავისუფლებების მიმართულებებითა და ეთნიკური დისკრიმინაციის ნაწილში.
ასევე სასამართლოს თანახმად, ღია რჩება კითხვა, არის თუ არა საქართველო უსაფრთხო ქვეყანა ქვიარ ადამიანების პოტენციური დევნის გამოც.
ევროკავშირის ქვეყნების მიერ საქართველოს უსაფრთხო ქვეყნად აღიარება მნიშვნელოვანია უვიზო მიმოსვლის კონტექსტში. საქართველოს უვიზო რეჟიმის სიმყარისთვის სჭირდება, რომ ის ევროპაში უსაფრთხო ქვეყნად იყოს აღიარებული.
თავის დროზე ევროპის ქვეყნებმა საქართველო უსაფრთხო ქვეყნად სწორედ მას შემდეგ აღიარეს, რაც საქართველოს მოქალაქეებისათვის უვიზო მიმოსვლის რეჟიმი დააწესეს. ამით დააზღვიეს საქართველოდან უვიზო რეჟიმის პარალელურად თავშესაფრის მოთხოვნების მკვეთრი ზრდა და სისტემის გადატვირთულობა. უცხოელი, რომლის ქვეყანასაც უსაფრთხო სტატუსი არ აქვს, ევროპაში თავშესაფრის განაცხადზე პასუხს იღებს დაახლოებით 6 თვეში (და ამ დროის განმავლობაში იქ ლეგალურად რჩება), ხოლო უსაფრთხო სტატუსის მქონე ქვეყანა – 1 თვეში.
წყარო: ბათუმელები
