“ქართული ოცნების” თავმჯდომარის, ირაკლი კობახიძის შეფასებით, პარლამენტში პრეზიდენტის გამოსვლის დროს ბევრი გაუგებარი განცხადება მოისმინეს. მისივე თქმით, ეს მოსალოდნელი იყო.
კობახიძე ამბობს, რომ ერთი მხრივ ზურაბიშვილი კანდიდატის სტატუსის მნიშვნელობაზე საუბრობს, ხოლო და მეორეს მხრივ თავად უპირისპირდება მას, რაც შემაშფოთებელია.
“დღესაც ბევრი გაუგებარი განცხადება მოვისმინეთ, რაც მოსალოდნელი იყო. სხვა მოლოდინი არც გვქონდა და ვერ გვექნებოდა. მთავარი რა არის, რომ, როცა ქვეყნის პრეზიდენტი საუბრობდა იმაზე, რომ საქართველო არ იმსახურებდა კანდიდატის სტატუსს იმ ფონზე, როცა ევროკავშირმა თვითონ აღიარა, რომ უარი იყო უსამართლო. ეს ყველაფერი არის რა თქმა უნდა შემაშფოთებელი, როდესაც პრეზიდენტი აცხადებს რომ საქართველო არც წელს დაიმსახურებს კანდიდატის სტატუსს. ეს არის რა თქმა უნდა შემაშფოთებელი, ეს არ არის იმ ადამიანის პოზიცია, რომელიც უნდა ზრუნავდეს საკუთარ სახელმწიფოს ინტერესებზე. ერთის მხრივ შენ საუბრობ კანდიდატის სტატუსის მნიშვნელობაზე და მეორეს მხრივ თავად უპირისპირდები კანდიდატის სტატუსს, ეს არის გაუგებარი და ეს არის რა თქმა უნდა რადიკალური ოპოზიციის რიტორიკის გაგრძელება, რაც რბილად რომ ვთქვათ არის შემაშფოთებელი. ჩვენ მოვისმინეთ ასეთი გაუგებარი განცხადებები მრავლად”, – თქვა კობახიძემ.
“ქართული ოცნების” თავმჯდომარემ, მეორე ფრონტის შესახებ სალომე ზურაბიშვილის სიტყვებსაც უპასუხა და საქართველოს პრეზიდენტს 2008 წლის ომის შესახებ მისი ძველი განცხადებები გაახსენა.
“რაც შეეხება მეორე თემას, თითქოს მეორე ფრონტი არის კონსპირაცია, ამაზე მე მინდა შევახსენო პრეზიდენტს მისი განცხადებები 2008 წლის ომის შესახებ, რას ამბობდა ის 2008 წლის ომის შესახებ, ის იყო კონსპირაცია თუ რა იყო, იქნებ გაიხსენოს საკუთარი განცხადებები და ამის მერე ისაუბროს მეორე ფრონტის გახსნის კონსპირაციაზე”, – მიმართა ირაკლი კობახიძემ სალომე ზურაბიშვილს.
შეგახსენებთ, რომ დღეს საქართველოს პარლამენტში პრეზიდენტი სალომე ზურაბიშვილი სიტყვით გამოვიდა. გამოსვლისას მან “ქართული ოცნების” ამჟამინდელი პრორუსული რიტორიკა გააკრიტიკა და აღნიშნა, რომ “თბილისი და მოსკოვი, მეორე ფრონტის თემაზე ერთ ენაზე საუბრობს”.
