„ბიძინა ივანიშვილი მარტო დარჩა, ’’ოცნება“ კი განახლებას აღარ ექვემდებარება“ _ დავით ბერძენიშვილი

„საქართველოში ბიზნესი შეტევის ობიექტი მანამდე იქნება, სანამ  ქვეყანაში მთავარი დამლაგებელი ბიძინა ივანიშვილია, რომელსაც კონკურენტუნარიან მედიაგარემოსა და ბიზნესგარემოში ცხოვრება არ შეუძლია“, _ აღნიშნა “გურია ნიუსთან“ „რესპუბლიკური პარტიის“ ერთ-ერთმა ლიდერმა დავით ბერძენიშვილმა.  

მისივე თქმით, „პარტიებს ცვლილებები სჭირდებათ, მაგრამ „ქართული ოცნება“ განახლებას აღარ ექვემდებარება“.

_ ბატონო დავით, „ქართულ ოცნებაში“ გუნდის განახლების პროცესი დაიყო. როგორც ცნობილია, პარტია ახალ კადრებს მთელი ქვეყნის მასშტაბით ეძებს. აღნიშნულ პროცესს ექსპერტები სკეპტიკურად უყურებენ, რომლებიც აცხადებენ, რომ პოლიტიკურ კრიზისში მყოფ მმართველ პარტიაში პროფესიონალი კადრები გაწევრიანებას არ მოინდომებენ. თავად როგორ აფასებთ „ქართულ ოცნებაში“ დაწყებულ  გუნდის განახლების პროცესს?

_“ქართულ ოცნებაში“ ახალი სახეების მოზიდვის მცდელობა ჩემში მხოლოდ ღიმილს იწვევს. ზოგადად, პარტიებს ცვლილებები სჭირდებათ, მაგრამ „ქართული ოცნება“ განახლებას აღარ ექვემდებარება, რადგან ის პარტიის ნაცვლად, სახელისუფლებო ბიუროკრატიაა. როგორც ცნობილია, „ქართული ოცნება“ ახალი კადრების მოძიებას კერძო კომპანიას ავალებს, რაც სისულელეა. სახეზეა პოლიტიკური უმწიფრობის მორიგი დადასტურება.

_“ქართულ ოცნებაში“ არსებული კრიზისის აღმოფხვრის მიზნით, პოლიტიკაში ბიძინა ივანიშვილის ერთ-ერთი საიმედო კადრი ირაკლი ღარიბაშვილი დაბრუნდა. როგორ ფიქრობთ, ყოფილ შს მინისტრსა და პრემიერს ქვეყანაში პოლიტიკური კრიზისის დაძლევის რესურსი გააჩნია?

_ მაშინ, როცა ირაკლი ღარიბაშვილი პრემიერი იყო, მან თვითმმართველობის რეფორმა დაამუხრუჭა. პოლიტიკური პლურალიზმი მისთვის უცხო და მიუღებელი იყო. ღარიბაშვილმა პოლიტიკის ანაბანა არ იცოდა და ვერც ახლა ისწავლა. ღარიბაშვილის პრემიერ-მინისტრობა ხელს უშლიდა ქვეყნის განვითარებას. რეგიონებში ფეოდალებს ქმნიდა, არა მარტო კახეთში, არამედ სამეგრელოში. ირაკლი ღარიბაშვილის მისია რეტროგრატული ფლანგის გაძლიერებაა. „ქართული ოცნება“ ევროპული, მოდერნიზებული პოლიტიკოსებისგან დაცლილია. პარტიიდან ეკა ბესელიას წასვლის შემდეგ, ბიძინა ივანიშვილმა ირაკლი ღარიბაშვილი გამოიძახა, რაც წარსულისკენ მიბრუნებაა და დარწმუნებული ვარ, „ქართული ოცნება“ ამ პროცესს ცუდად დაამთავრებს.

_“თიბისის“ დატოვების შემდეგ, მამუკა ხაზარაძე შს მინისტრს დაუპირისპირდა და აღნიშნა, რომ გიორგი გახარიასგან  შანტაჟის შემცველი წერილი მიიღი. წერილის ავთენტურობას, რომელზეც პროკურატურამ გამოძიება შეწყვიტა და მმართველმა გუნდმა მას არაფრის მთქმელი ფარატინა ფურცელი უწოდა, ლონდონში ჩატარებული ექსპერტიზა დაადგენს. მანამდე კი წერილის სანდოობასთან დაკავშირებით, როგორია თქვენი პოზიცია?

_ აღნიშნული წერილი მამუკა ხაზარაძის პოზიციებს აძლიერებს. გიორგი გახარია, რომელიც დაბნეულია, ხალხს სიტყვა ბანზე აუდო. გახარიას ქმედება არა მარტო ჟურნალისტებისა და საზოგადოების მიმართ აგდებულ დამოკიდებულებაზე მეტყველებს, არამედ  მასში არსებულ სრულიად მდარე პოსტსაბჭოთა გემოვნებაზე. დიდია ალბათობაა იმისა, რომ  წერილი ნამდვილი იყოს. ბიძინა ივანიშვილს საკუთარი ძალაუფლების არავისთან გაყოფა არ სურს, ამიტომ ჰყავს ვითომ პარტია, რომელსაც თურმე ახლა რომელიღაც საკონსულტაციო ფირმის მეშვეობით განაახლებს. ივანიშვილი მარტო დარჩა, პარტია კი განახლებას აღარ ექვემდებარება. ბიძინა ივანიშვილს კონკურენტუნარიან მედიაგარემოსა და ბიზნესგარემოში ცხოვრება არ შეუძლია. ის  ერთპიროვნული მმართველი და თანამედროვე მაფიოზია.

_ მამუკა ხაზარაძის მიმართ დაწყებული სამართლებრივი დავის შემდეგ, ხელისუფლების მხრიდან განხორცილებულ ზეწოლაზე ბიზნესმენთა  ნაწილი ალაპარაკდა, მათ შორის, „ფრესკოს“ დამფუძნებელი ვასილ სოფრომაძე ამტკიცებს, რომ ხელისუფლების მხრიდან მის ბიზნესზე უსაფუძვლო შეტევა ხორციელდება. როგორ ფიქრობთ, საქართველოში ბიზნესი დაცული და ხელშეუხებელია?

_ საქართველოში ბიზნესი შეტევის ობიექტი მანამდე იქნება, სანამ  ქვეყანაში მთავარი დამლაგებელი ბიძინა ივანიშვილია. ის, რომ ცალკეული ბიზნესმენი ხმას იღებს ცუდი არ არის, თუმცა უფრო დიდი “ღლავები“ გაჩერებულები არიან. მახსენდება შემთხვევა, როცა ბადრი პატარკაციშვილს შეუტიეს, რომლის მიმართაც რაიმე განსაკუთრებული სიმპათია არ მქონია, მაგრამ აშკარა იყო, რომ მაშინ ხელისუფლების მხიდან ზეწოლა განხორციელდა. ახლაც ასე ხდება, მამუკა ხაზარაძე ყველა ხელისუფლებასთან ახერხებდა ურთიერთობის დალაგებას, მაგრამ ბიძინა ისეთი დამლაგებელი აღმოჩნდა, რომ მასთან ურთიერთობა შეუძლებელი გახდა.

_ხელისუფლებაში „ქართული ოცნების“ მოსვლიდან მეშვიდე წლისთავზე ქვეყანაში ბევრი პრობლემა დაგროვდა. ხალხს კვლავ ძალიან უჭირს, იზრდება უმუშევართა რაოდენობა, კორუფცია და კრიმინალი. „საქსტატის“ მიერ გამოქვეყნებული  მონაცემების მიხედვით, სურსათზე, სამედიცინო პროდუქციასა და სატრანსპორტო მომსახურებაზე ფასები გაიზარდა. ამ ფონზე, 2020 წლის საპარლამენტო არჩევნებში პარტიების, მათ შორის, „ქართული ოცნების“ ძალთა გადანაწილება როგორი იქნება?

_ივანიშვილის ხელისუფლება შეჯანჯღარებულია. ის შეშფოთებული და შეშინებულია, ახალი პოლიტიკური სვლებით კი უარესს მიიღებს.  პოსტსაბჭოთა საქართველოში ნებისმიერი ხელისუფლება ქვეყნის მართვის სათავეში, დაახლოებით, ათი წელი ძლებს. შევარდნაძე, როგორც ყველაზე გამოცდილი პოლიტიკოსი, ხელისუფლებაში თერთმეტი წელი იყო. სააკაშვილი, რომელიც იყო ძალიან ენერგიული, ნიჭიერი და რეფორმატორი ადამიანი, რომელსაც დემოკრატიის დაბალი ხარისხით ახორციელებდა, ხელისუფლებაში ცხრა წელი იყო. ამოცანა გვეკითხება, რამდენ ხანს გაძლებს ბიძინა ივანიშვილი _ რვა წელს? _ სავარაუდოდ, ასეა, რადგან არჩევნებში ოპოზიციის გამარჯვების ალბათობა უფრო მეტია, ვიდრე „ქართული ოცნების“.