„2016 წელს ბიძინა ივანიშვილმა თავისი ჭკუით გადაგვაგდო, მაგრამ სანაგვეზე გადაგდებული თვითონ აღმოჩნდება“, _აღნიშნა „გურია ნიუსთან” “დემოკრატიული მოძრაობა-ერთიანი საქართველოს“ლიდერმა გუბაზ სანიკიძემ.
საკინიძე „ქართული ოცნების“ ლიდერის, ბიძინა ივანიშვილის ბრალდებებსაც პასუხობს და აცხადებს, რომ პარტიის ხელმძღვანელი არაადეკვატურია.
_ ბატონო გუბაზ, „ქართული ოცნების“ ლიდერი ბიძინა ივანიშვილი შალვა შავგულიძეს, დავით უსუფაშვილს, გია ხუხაშვილსა და თქვენ „ნაციონალურ მოძრაობასთან“ ალიანსში გადანაშაულებთ და ამტკიცებს, რომ განვლილმა წლებმა აღნიშნულ პარტიასთან თქვენი კავშირი ცხადყო. ამ ბრალდებას რას უპასუხებთ?
_ ივანიშვილის ოჯახს ვურჩევ, ეს ადამიანი სასწრაფოდ ფსიქიატრთან წაიყვანონ. 2016 წელს ბიძინა ივანიშვილს ვუთხარი, რომ მარტო დარჩებოდა და ყველაფერი მას დაბრალდებოდა, ასეც მოხდა. დღეს ბიძინა ივანიშვილი მარტო დარჩა და ჭკუიდან გადავიდა. 7 ნოემბერს მიხეილ სააკაშვილი ბიძინა ივანიშვილის მიერ ნაყიდ ტყვიებს გვესროდა, წლების განმავლობაში ყოფილი პრეზიდენტის თანამოაზრე და დამფინანსებელი იყო, კიდევ მე ვარ „ნაციონალური მოძრაობის“ მხარდამჭერი?! საინტერესოა, მიშისტმა გუბაზ სანიკიძემ ქუთაისში არჩევნები როგორ მოიგო?! მიხეილ სააკაშვილმა მომაგებინა?! ივანიშვილი, რომელსაც ჰქონია, რომ სამყაროს ოქროს ჭიპია, ქვეყნისთვის სახიფათოა, რადგან ხელისუფლების შენარჩუნების მიზნით ყველაფერზეა წამსვლელი.
_ როგორც ბიძინა ივანიშვილის განცხადებიდან ირკვევა, 2012 წელს ქვეყნის სათავეში სამართლიანობის აღდგენის მიზნით მოსულმა „ქართულმა ოცნებამ“ წინა ხელისუფლების მორჩილ და სასამართლო სისტემაში კლანური მმართველობის დამნერგველ მოსამართლეებად მიჩნეული ადამიანების _ ლევან მურუსიძისა და მიხეილ ჩინჩალაძის შესახებ იქამდე არაფერი იცოდა, სანამ მათ შესახებ „ნაციონალური მოძრაობა“ და არასამთავრობო სექტორი არ ალაპარაკდა. პარტიის ლიდერი ასეთი პათოსით 2012 წლის მონაპოვარს ჩირქს თავად ხომ არ სცხებს?
_ პარლამენტში პირადად სიტყვით გამოვედი და ვთქვი, რომ ლევან მურუსიძის ვირუსი “ქართულ ოცნებას“ დაღუპავდა. მიშისტად, ალბათ, ამის შემდეგ ჩავითვალე. კვლავ ბიძინა ივანიშვილის დიაგნოზთან ვბრუნდებით. ფსიქიკურად აშლილი ადამიანის ლოგიკაზე ვერ ვიკამათებ. თურმე, ივანიშვილის აზრით, შალვა შავგულიძე გირგვლიანის საქმის გამყალბებელი ყოფილა და მურუსიძე ჭეშმარიტებისთვის მებრძოლი ადამიანი. მაინტერესებს, გუშინდელი ინტერვიუს შემდეგ საქართველოში თუ დარჩა ერთი კაცი მაინც, რომელსაც ბიძინა ივანიშვილის საუბრის გულწრფელად სჯერა?! ივანიშვილის აზრით, ჩვენ ყველა კლანი ვართ, რომელსაც ეკა გიგაური გვატყუებს და საკუთარ თავს ბედნიერებაში არ ვუტყდებით. ამ ადამიანის საუბრით დათრგუნული ვარ.
_ “ქართული ოცნების“ ლიდერმა ბიძინა ივანიშვილმა განაცხადა, რომ ხალხს „ქართული ოცნების“ მიღწევების დადებითი ტენდენციების ადეკვატურად შეფასება უჭირს. ციტირება: “ადამიანი კარგს იოლად ეჩვევა, მაგრამ მალე ივიწყებს და მუდმივად უნდა იყოს ტენდენცია უკეთესობისკენ, თუმცა გვყავს „ნაციონალური მოძრაობა“, რომელიც სიცრუეს მუდმივად აფრქვევს, ამიტომ საზოგადოების განწყობა არის ძალიან მძიმე“. იმ ფონზე, როცა ქვეყანაში რთული სოციალურ-ეკონომიკური ვითარებაა, როგორ ფიქრობთ, პარტიის ლიდერი აღნიშნულს ოპოზიციური პარტიის მიერ ხელოვნურად შექმნილ მდგომარეობად და საზოგადოების წარმოსახვის ნაწილად რატომ მიიჩნევს?
_ ფაქტია, ბიძინა ივანიშვილი ქართველ ხალხს უმადურობაში ადანაშაულებს. პარტიები ხომ ერთ ქვაბში მოგვხარშა და ახლა ქართველი ხალხიც მიშისტი გახდა. მისთვის უკვე ყველა მტერი ვართ. ირაკლი ალასანია გადააგდო და ბოლოს დაჭერას უპირებდა. ბიძინა ივანიშვილს, როგორც ჩანს, რაღაცები უნდა გავახსენო, როცა კვირიკაშვილს შევხვდი, მითხრა, რომ ბიძინას ჩვენთან კოალიცია აღარ უნდოდა და უნდა გავსულიყავით. მონებით უნდოდა ემართა ქვეყანა. 2016 წელს, თავისი ჭკუით, გადაგვაგდო, მაგრამ ისტორიის სანაგვეზე გადაგდებული თვითონ ბიძინა ივანიშვილი აღმოჩნდება. კაცს სერიალების შიშები აქვს. თავი ზვიად გამსახურდიას და მერაბ კოსტავას მემკვიდრედ გამოაცხადა. გარშემო ძველი პუტჩისტები ჰყავს შეკრებილი, რომელთა ჭკუაზეც დადის. ყველა კარგად ვხედავთ, რომ ეს კაცი ხელისუფლებიდან საკუთარი ნებით წამსვლელი არ არის. ქუჩაში ისე ვგრძნობ თავს, როგორც თევზი წყალში. კაბინეტში მეხუთება სული.
_ ივანიშვილი ინტერვიუში „თიბისი ბანკისა“ და მამუკა ხაზარაძის ირგვლივ განვითარებულ მოვლენებსაც გამოეხმაურა და აღნიშნა, რომ ბანკის დამფუძნებლები ხელისუფლებას თავად უტევენ. აღნიშნულთან დაკავშირებით თქვენი პოზიცია როგორია?
_ აღნიშნული მამუკა ხაზარაძემ და ბიძინა ივანიშვილმა თავად გაარკვიონ. საქმე გვაქვს შიდა მაფიოზური გარჩევასთან. შიგნით რას ლაპარაკობენ, რაზე გარიგდნენ და რატომ გადააგდეს ერთმანეთი, არ ვიცი. იმისთვის არ ვარ მოწადინებული, რომ მამუკა ხაზარაძის ინტერესები დავიცვა, ისიც ისეთივე ხალხის გამღლეტია, როგორც ბიძინა ივანიშვილი, უბრალოდ, მასშტაბებშია განსხვავება.
