„ბიძინა ივანიშვილი თეთრზე ამბობს შავიაო, ტყუილებს აფრქვევს, რაც გვაფიქრებინეს, რომ ის და მისი პარტია რთულ მდგომარეობაშია. აქედანვე ჩანს, რომ „ქართულ ოცნებას“ ხვალინდელი დღე არ უწერია. ამ პარტიას 2020 წელის საპარლამენტო არჩევნების მოგება ძალიან გაუჭირდება“, _აღნიშნა „გურია ნიუთან“ იურისტმა ლია მუხაშავრიამ.
მუხაშავრია საქართველოს პრეზიდენტის, სალომე ზურაბიშვილის შესახებაც საუბრობს და აცხადებს, რომ დაშვებლი შეცდომების გამო, მის ადგილზე ბოდიშს აუცილებლად მოიხდიდა.
_ ქალბატონო ლია, საქართველოს პრეზიდენტს, სალომე ზურაბიშვილს სახელმწიფო ცერემონიების სასახლეში, 1989 წლის 9 აპრილს დაღუპულთა ოჯახის წევრებისა და საქართველოს სახელმწიფოს დამოუკიდებლობის აღდგენის აქტის ხელმომწერთა მიღებაზე, 9 აპრილს მოკლული თამარ ჭოველიძის გვარის წაკითხვა გამორჩა და ეკა ბეჟანიშვილის გვარი შეცდომით ამოიკითხა. რის გამოც, თამარ ჭოველიძის მამამ, არკადი ჭოველიძემ შეხვედრა პროტესტის ნიშნად დატოვა. როგორ ფიქრობთ, 9 აპრილის მნიშვნელობიდან გამომდინარე, პრეზიდენტს აღნიშნული შეცდომების დაშვება ეპატიება?
_ სალომე ზურაბიშვილი პრეზიდენტი იმიტომ არის, რომ ამგვარი შეცდომები არ დაუშვას. წინა პრეზიდენტი, გიორგი მარგველაშვილი საჯაროდ იგინებოდა და მთავრობის წევრებს ლანძღავდა. სალომე ზურაბიშვილი კი საერთოდ 9 აპრილს გარდაცვლილთა სახელებსა და გვარებს ვერ კითხულობს, რაც სირცხვილია. იმის გამო, რომ სალომე ზურაბიშვილი საქართველოში არ ცხოვრობდა, მას საქართველოსთვის მნიშვნელოვანი დღეები გულთან ახლოს არ მიაქვს. დაშვებული შეცდომების გამო, მის ადგილზე ყველა ღირსეული ადამიანი ბოდიშს მოიხდიდა. ზურაბიშვილს ჰგონია, რომ სხვა პლანეტაზე ცხოვრობს. 9 აპრილის მემორიალთან მივიდა და მოქალაქეებს, მათ შორის, არც მალხაზ მაჩალიკაშვილს დაელაპარაკა, რომელიც პროტესტის ნიშნად დღესა და ღამეს ქუჩაში ათევს. პრეზიდენტი, პირველ ყოვლისა, კარგი ადამიანი უნდა იყოს და შემდეგ ქვეყნის ღირსეული მთავარსარდალი.
_“ქართული ოცნების“ ლიდერის ბიძინა ივანიშვილის აზრით, საქართველოში იმდენად მდარე სერიალები გადის, რომ საზოგადოება მალე გამოთაყვანდება. ამ ფონზე, ივანიშვილმა ბანკი „ქართუს“ დაფინანსების საშუალებით კინოწარმოების აღორძინება დააანონსა. როგორ ფიქრობთ, პარტიის ლიდერი სერიალებს პოლიტიკური მიზნებისთვის გამოიყენებს და ამ გზით რეალობისგან განსხვავებული პოლიტიკური მდგომარეობის ჩამოყალიბებას შეეცდება?
_ბიძინა ივანიშვილი კინოწარმოებას წმინდა ბიზნესად უყურებს. მას ჰგონია, რომ სერიალის დაფინანსებით ქვეყანაში შექმნილი მდგომარეობის შესახებ განსხვავებულ წარმოდგენას შეგვიქმნის. აღნიშნული საბჭოთა პერიოდში მუშაობდა და როგორც ჩანს, პარტიის ლიდერი ამ პერიოდში ჩარჩა. ბიძინა ივანიშვილი ქუჩაში არ დადის, არ იცის, ვის რა უჭირს, ამიტომ ჰგონია, რომ კარგად ვცხოვრობთ და მაინც უკმაყოფილოები ვართ. მაცივარს რომ გამოვაღებთ, ჩანთაში რომ ჩავიხედავთ, საბანკო ანგარიშს რომ შევხედავთ, სერიალი რანაირად დამარწმუნებს, რომ ქვეყანაში უკეთესი ცხოვრებაა?! ივანიშვილმა ილუზიებში თავად იცხოვროს, ხალხს თავი დაანებოს.
_ ბიძინა ივანიშვილმა სანდრო გირგვლიანის საქმის ადვოკატი შალვა შავგულიძე წინა ხელისუფლებასთან გარიგებაში დაადანაშაულა და აღნიშნული საქმის განმხილველი მოსამართლის, ლევან მურუსიძის გაკრიტიკების ნაცვლად, ქართულ მართლმსაჯულებაში საქმის გაჭიანურებაზე პასუხისმგებლობის უმეტესი წილი შალვა შავგულიძეს დააკისრა. თქვენ როგორ აფასებთ ივანიშვილის ამ პარადოქსულ მოსაზრებას?
_ აღნიშნული ნიშნავს იმას, რომ ბიძინა ივანიშვილი სხვა პლანეტაზე ცხოვრობს. მას გულწრფელ ადამიანებთან კომუნიკაცია აღარ აქვს. შალვა შავგულიძე ერთ-ერთი ყველაზე წესიერი და პროფესიონალი ადამიანია. იმ პერიოდში, როცა შავგულიძე სულხან მოლაშვილისა და სანდრო გირგვლიანის საქმეზე მუშაობა, ის ამ ადამიანების ოჯახის წევრების ჭირისუფალი და უახლოესი ადამიანი იყო. შალვას ღირსებას ივანიშვილის ნათქვამი არაფერს დააკლებს, თვითონ ივანიშვილს კი ბევრი დააკლდება. „ოცნების“ ხელმძღვანელმა საზოგადოების თვალში წარმოდგენა დაკარგა. ბიძინა ივანიშვილი ტყუილებს პირიდან ვერასდროს გამოირეცხავს.
_“თიბისი ბანკის“ დამფუძნებლების მიმართ განხორციელებული შტურმის შემდეგ, ბიძინა ივანიშვილი ამტკიცებს, რომ მამუკა ხაზარაძე და ბადრი ჯაფარიძე ხელისუფლებას თავად ებრძვიან. იმ ფონზე, როცა პროკურატურამ ფულის გათეთრების სქემაში ბანკის დამფუძნებლების ბრალეულობა, ჯერჯერობით, ვერ გამოკვეთა და როგორც პოლიტიკურ წრეებში ამბობენ, „ქართულ ოცნებას“ ანაკლიის პროექტიდან მამუკა ხაზარაძისა და ბადრი ჯაფარიძის ჩამოცილება სურს, ივანიშვილის აღნიშნული განცხადება რამდენად ობიექტურია?
_ მამუკა ხაზარაძე, ადამიანი რომელსაც წლების განმავლობაში ქვეყანაში შექმნილ სოციალურ-ეკონომიკურ მდგომარეობაზე ხმა არ ამოუღია, პარლამენტში შველას ითხოვდა და კიდევ ეს ადამიანი ებრძვის ხელისუფლებას?! ეს არის ბიძინა ივანიშვილის მორიგი ოპერა, სახელწოდებით_ კარგად ვცხოვრობთ, მაგრამ ვერ ვხვდებით. ივანიშვილი თეთრზე ამბობს შავიაო, ტყუილებს აფრქვევს, რაც გვაფიქრებინეს, რომ ის და მისი პარტია რთულ მდგომარეობაშია. აქედანვე ჩანს, რომ „ქართულ ოცნებას“ ხვალინდელი დღე არ უწერია. ამ პარტიას 2020 წელის საპარლამენტო არჩევნების მოგება ძალიან გაუჭირდება, ამიტომ ბიძინა ივანიშვილს ლევან მურუსიძე გაყალბებული არჩევნების დაკანონებისთვის სჭირდება. მან წინასწარ იცის, რომ არჩევნებში „ქართული ოცნების“ მარცხი გარდაუვალია.
