„სალომე ზურაბიშვილს პირი დაბანეს და შეფუთეს. ეს ადამიანი საითაც არ უნდა წავიდეს, ყველგან ტყლაპოში ხტება. გუშინ გარკვეულ ჩარჩოში მოაქციეს, სიტყვა დაუწერეს და ავარჯიშეს. ზურაბიშვილს ისე მოექცნენ, როგორც მოსწავლეს, ამეცადინეს და გამოცდა ჩააბარებინეს“,_ აღნიშნა „გურია ნიუსთან“ პოლიტიკის ექსპერტმა გია ხუხაშვილმა.
ხუხაშვილი მიიჩნევს, რომ ინაუგურაციის დღეს ხელისუფლებამ პრობლემების გადალახვა მოახერხა, თუმცა „ნაციონალურმა მოძრაობამ“ საკუთარი ამოცანა მაინც შეასრულა, ყურადღება მიიქცია და ალტერნატიული ამბავი შექმნა“.
_ ბატონო გია, სალომე ზურაბიშვილის ინაუგურაციამ, რომელმაც გაერთიანებული ოპოზიციის პროტესტის ფონზე ჩაიარა, კიდევ ერთხელ ცხადყო, რომ სალომე ზურაბიშვილი საზოგადოების გარკვეული ნაწილისთვის მიუღებელია. როგორ ფიქრობთ, გამოხატულმა საპროტესტო ტალღამ სალომე ზურაბიშვილის ლეგიტიმურობა ეჭვქვეშ დააყენა? და რამდენად სწორი იყო თელავში ინაუგურაციის გამართვა?
_გუშინდელი დღე ხელისუფლების მორიგი სიბრიყვის გამოხატულება იყო. ინაუგურაციის თელავში გამართვით „ქართულმა ოცნებამ“ დიდი შეცდომა დაუშვა. ხელისუფლებას გაუმართლა, პრობლემები გადალახა, მაგრამ „ნაციონალურმა მოძრაობამ“ საკუთარი ამოცანა მაინც შეასრულა, ყურადღება მიიქცია და ალტერნატიული ამბავი შექმნა.
სალომე ზურაბიშვილს პოლიტიკურად პირი დაბანეს და შეფუთეს. ეს ადამიანი საითაც არ უნდა წავიდეს, ყველგან ტყლაპოში ხტება. გუშინ გარკვეულ ჩარჩოში მოაქციეს, სიტყვა დაუწერეს და ავარჯიშეს. მას ისე მოექცნენ, როგორც მოსწავლეს, ამეცადინეს და გამოცდა ჩააბარებინეს. როცა ეს ხალხი მოშორდება, მაქვს განცდა, რომ შეცდომების დაშვებას კვლავ დაიწყებს. ზურაბიშვილს აქვს გარკვეული დიპლომატიური უნარები, მაგრამ მისი ხასიათიდან გამომდინარე, როგორც მენეჯერი და სახელმწიფო მოღვაწე, მმართველ პარტიას დიდ პრობლემებს შეუქმნის.
_ გაერთიანებული ოპოზიცია ხვალიდან პერმანენტული აქციების ჩატარებას გეგმავს. მათი მოთხოვნები რიგგარეშე საპარლამენტო არჩევნების დანიშვნასთან და საარჩევნო კოდექსის ცვლილებისთან დაკავშირებით კვლავ უცვლელია. როგორც ფიქრობთ, მოთხოვნათა შეუსრულებლობის შემთხვევაში, ოპოზიცია რადიკალური ნაბიჯების გადადგმაზე წამსვლელია?
_ პოლიტიკური კრიზისის შექმნის მთავარი ინიციატორი ოპოზიცია არასდროს ყოფილა, მთავარი პროვოკატორი ყოველთვის ხელისუფლება იყო, რომლის ადეკვატურობაზეა დამოკიდებული, რამდენად წარმატებით შეძლებს ოპოზიცია ამ მოთხოვნების გახორციელებას. როგორც ჩანს, სიბრიყვეს საზღვარი არა აქვს. ფაქტობრივად, მიცვალებული პარტია „ქართული ოცნების“ შეცდომებმა გააცოცხლა. მმართველმა პარტიამ, რომელმაც ვერც ერთი სახელმწიფოებრივი პრობლემა გადაჭრა, ხელი შეუწყო „ნაციონალური მოძრაობის“ რეანიმაციას, ამიტომ ბუნებრივია, ახლა „ნაციონალური მოძრაობა“ „ქართული ოცნების“ მიერ ნაჩუქარი ამომრჩევლის შენარჩუნებას ცდილობს, რისთვისაც საზოგადოებას სხვადასხვა ფორმით გამოხატულ პოლიტიკურ დინამიკას აჩვენებს. საერთოდ, „ნაციონალური მოძრაობის“ შესაძლებლობები სერიოზული კრიზისის ინიცირების თვალსაზრისით, ძალიან შეზღუდულია. იმდენად მნიშვნელოვანი რიგგარეშე არჩევნების ჩატარება არ არის, რამდენადაც პროპორციულ საარჩევნო სისტემაზე გადასვლა.
_ საქართველოს ყოფილი პრეზიდენტი ქართულ პოლიტიკურ პროცესებში აქტიურად არის ჩართული. ჩანს, რომ მიხეილ სააკაშვილს ხელისუფლების შეცვლა რადიკალური მეთოდებით, მათ შორის, სახელმწიფოს გადატრიალების გზით სურს. როგორ ფიქრობთ, პოლიტიკური ამოცანების შესრულების მიზნით, რამდენად რეალურია, სააკაშვილი უახლოეს მომავალში საქართველოში ვიხილოთ?
_ მიხეილ სააკაშვილის საქართველოში ჩამოსვლას არ ველოდები. მათ ხელისუფლებაში დაბრუნების შანსი მიეცემათ იმ შემთხვევაში, თუ ხელისუფლება შეცდომების დაშვებას გააგრძელებს. „ქართული ოცნების“ ბედად, ხელისუფლებაში ერთი ადამიანი მაინც აღმოჩნდა ადეკვატური, რომელსაც კრიზისების მართვის უნარი გააჩნია, საუბარი მაქვს გიორგი გახარიაზე, რომელსაც ყოველდღიურად სულ უფრო და უფრო რთულ ამოცანებს აძლევენ. ბოლო-ბოლო შეიძლება ისეთი სიგიჟე შესთავაზონ, რომლის შესრულება ვეღარ შეძლოს.
_ პარტიის ლიდერმა ბიძინა ივანიშვილმა ქვეყანაში რიგი პრობლემების აღმოსაფხვრელად, ერთი წელიწადი მოითხოვა. დაპირების შეუსრულებლობის შემთხვევაში, როგორ ფიქრობთ, რა ბედი ელის „ქართულ ოცნებას“?
_ ერთგვაროვანი სცენარი არ არსებობს. ფაქტია, რომ “ქართული ოცნების“ დეგრადაციის პროცესი არ ჩერდება. იმისათვის, რომ ბიძინა ივანიშვილმა სავალალო პროცესი შეაჩეროს, სისტემური რეფორმები უნდა განახორციელოს. ფაქტობრივად, სრულიად ახალი სახელმწიფო მანქანის აშენებაზე უნდა ჰქონდეს პრეტენზია, რომლის შექმნაც, ვფიქრობ, აღარ შეუძლია. ივანიშვილს უდავოდ აქვს საჭირო თვისებები, მაგრამ ის ქვეყანაში არსებული ვითარების მძევალია, რომელსაც დღეს აღარაფრის შეცვლა შეუძლია. მისთვის ახლა ხელისუფლებისგან დისტანცირება ისეთივე სახიფათოა, როგორც შიგნით ყოფნა. ივანიშვილს იმის ფუფუნება აღარ აქვს, რომ დისტანცირდეს პროცესებისგან.
_ “ქართული ოცნების“ გუნდში შესაძლოა, საკადრო ცვლილებები გახორციელდეს. მათ შორის, საუბარია, რომ მთავრობის მეთაური მამუკა ბახტაძე, შესაძლოა, შს მინისტრმა გიორგი გახარიამ შეცვალოს. მიესალმებით ასეთ საკადრო გადაადგილებას და როგორ ფიქრობთ, შექმნილი ვითარება, ინსტიტუციის ყველა დონეზე, გუნდის გადახალისების აუცილებლობას მოითხოვს?
_ გიორგი გახარია გამორჩეული ადამიანია, რომელსაც, სხვებისაგან განსხვავებით, სახელმწიფო მოღვაწისთვის დამახასიათებელი უნარ-ჩვევები გააჩნია, მაგრამ საქმე ის გახლავთ, რომ ერთეული ადამიანების გადაადგილებები, საბოლოო ჯამში, შედეგს ვერ მოიტანს. მნიშვნელოვანი მმართველობითი სისტემის ცვლილებაა.
ინსტიტუციური ცენტრები, რომლებიც მართვის ცენტრებთან აცდენილია, გამართულად ვერ ფუნქციონირებენ. თუ „ქართულ ოცნებას“ არსებული ვითარების გამოსწორება და 2020 წელის საპარლამენტო არჩევნებში პოლიტიკური მომავლის პერსპექტივის გაჩენა სურს, რომელიც უფრო და უფრო ბუნდოვანი ხდება, ივანიშვილი უნდა გაპრემიერდეს, რაც ინსტიტუციური წესრიგის აღდგენას ნიშნავს.
