„საზოგადოების მნიშვნელოვან ნაწილს ბიძინა ივანიშვილის დაპირებების აღარ სჯერა. 2013-2014 წლებში პარტიის ლიდერისადმი ნდობის ხარისხი 50%-ს აღემატებოდა, დღეს კი მისი რეიტინგი მინიმალურ დონეზეა დასული“,_ აღნიშნა „გურია ნიუსთან“ პოლიტიკის ექსპერტმა ნიკა ჩიტაძემ.
ჩიტაძე პანკისში განვითარებულ მოვლენებსაც აფასებს და ამბობს, რომ “ხელისუფლებამ არარაციონალური მოქმედებებით, მათ შორის, ადგილზე სპეცრაზმის შეყვანით საქართველოს არაკეთილმოსურნეების წისქვილზე წყალი დაასხა“.
_ ბატონო ნიკა, პოლიტიკოსთა და ექსპერტთა ნაწილი პანკისის ხეობაში სამართალდამცავებისა და ადგილობრივ მოსახლეობას შორის მომხდარ მწვავე დაპირისპირებაზე პასუხისმგებლობის უმეტეს წილს შს მინისტრს, გიორგი გახარიას აკისრებს. იმ ფონზე, როცა ადგილზე დამატებითი ძალების მობილიზებამ ვითარება კიდევ უფრო გაამწვავა, როგორ ფიქრობთ, “ქართული ოცნების“ ხელისუფლების მხრიდან რამდენად გააზრებული და მართლზომიერი ნაბიჯი იყო ძალადობრივი ქმედებების განხორციელების მიზნით ხეობაში სპეცრაზმის შეყვანა?
_პირველ ყოვლისა, პრობლემა იმაში მდგომარეობს, რომ შს სამინისტროს აღნიშნულმა ქმედებამ საქართველოს ინტერესები დააზიანა. საქართველოს სოციალურ-ეკონომიკური განვითარების თვალსაზრისით ქვეყანაში ჰიდროელექტრორესურსების გამოყენება აუცილებელია. მაგალითისთვის, ჯამში საქართველოს, დაახლოებით, ჰიდროელექტრორესურსების 15%-მდე აქვს ათვისებული. ჰიდროელექტრორესურსების მაქსიმალურად ათვისების შემთხვევაში კი, საქართველოს შეუძლია, დაახლოებით, 150 მილიარდ კილოვატსაათი ელექტროენერგია გამოიმუშავოს. ასეთ ვითარებაში, ხელისუფლების შეცდომა ის არის, რომ პანკისის მოსახლეობასთან ჰესის მშენებლობასთან დაკავშირებით ნაკლები კომუნიკაცია ჰქონდა. აღნიშნულ რეგიონში მნიშვნელოვანი პროექტები უნდა განხორციელდეს, ხელისუფლებამ კი საკუთარი არარაციონალური მოქმედებებით, მათ შორის, ადგილზე სპეცრაზმის შეყვანით, რაც სრულიად გაუზრებელი ნაბიჯი იყო, საქართველოს არაკეთილმოსურნეების წისქვილზე წყალი დაასხა.
_მედიაში აქტიურად ვრცელდება ინფორმაცია იმის შესახებ, რომ პანკისში სამართალდამცავებსა და მოსახლეობას შორის მომხდარი დაპირისპირება სუს-ის უფროსის ვახტანგ გომელაურისა და პოლიტიკაში დაბრუნებული ირაკლი ღარიბაშვილის შს მინისტრ გიორგი გახარიასთან დაპირისპირების შედეგია. აღნიშნულის შესახებ რას ფიქრობთ?! გავლენების გადანაწილების მიზნით, შესაძლოა, მაღალჩინოსნებს შორის შიდაპარტიული ბრძოლა მიმდინარეობდეს?
_მაღალჩინოსენბს შორის დაპირიპირება გამორიცხული არ არის, თუმცა აღნიშნულის დამამტკიცებელი საბუთი, ჯერჯერობით, არ არსებობს, ამიტომ ამ თემის შესახებ კომენტარის გაკეთება გამიჭირდება. ვარაუდების შესახებ იმ შემთხვევაში ვისაუბრებ, თუ მაღალჩინოსნებს შორის დაპირისპირების კონკრეტულ ფაქტი გამოიკვეთება. ამ ეტაპზე, მნიშვნელოვანია საზოგადოებამ კარგად გაიგოს, პანკისი ხეობაში ჰიდროელექტროსადგურის მშენებლობა ქვეყნისთვის სასარგებლო არის თუ არა.
_ 2 წლის შემდეგ ირკვევა, რომ პარლამენტმა ზაზა ხარებავა იუსტიციის უმაღლესი საბჭოს არამოსამართლე წევრად კანონდარღვევით დაამტკიცა. კერძოდ, არასამთავრობო ორგანიზაცია “საქველმოქმედო-ჰუმანიტარული ცენტრი აფხაზეთი”, რომელმაც ხარებავა კანდიდატად წარადგინა, სასამართლოში წარმომადგენლობით საქმიანობას არ ახორციელებდა, რაც კანონის მიხედვით, კანდიდატის წარმდგენ არასამთავრობო ორგანიზაციას მოეთხოვება. ნიშანდოვლივია ის ფაქტი, რომ ხარებავა ამავე საბჭოს წევრის, სასამართლო კლანის წევრად მიჩნეული ირაკლი შენგელიას მეჯვარე და შვილის ნათლიაა, აღნიშნული ფაქტი, როგორ ფიქრობთ, სასამართლო სისტემაში კლანურ მმართველობასა და კორუფციის არსებობაზე მიუთითებს?
_ ფაქტები აჩვენებს, რომ განსაკუთრებით სასამართლო სისტემაში კლანური მმართველობა და ნეპოტიზმის პრობლემა არსებობს. როგორც ცნობილი ფილოსოფოსი ციცერონი იტყოდა, მართლმსაჯულება სახელმწიფოს საფუძველია. სასამართლო სისტემაში მურუსიძე-ჩინჩალაძის არსებობა კი ნიშნავს იმას, რომ საქმე კლანურ მმართველობასთან გვაქვს. სასამართლო სისტემაში ნეპოტიზმის არსებობა ყველა უწყებასთან შედარებით ბევრად უკეთ ჩანს. პრობლემაა ისიც, რომ მართლმსაჯულების სისტემაში მოსამართლეთა შესარჩევი კონკურსები გამჭვირვალედ არ ტარდება.
_ ხელისუფლების მიმართ საზოგადოების უკმაყოფილების ზრდის ფონზე, როგორ ფიქრობთ, „ქართული ოცნება“ 2020 წლამდე მსხვილ საკადრო ცვლილებებს, მათ შორის, პრემიერ-მინისტრისა და პარლამენტის თავმჯდომარის დონეზე, განახორციელებს?
_ 2020 წლამდე „ქართული ოცნების“ გუნდში საკადრო ცვლილებები განხორციელდება. მმართველი პარტიის საარჩევნო სიაში ახალ სახეებს ვიხილავთ. გამორიცხული ისიც არ არის, რომ პრემიერი მამუკა ბახტაძე უახლოეს მომავალში შეიცვალოს. იმ ფონზე, როცა მოსახლეობა ყველაფერს ბიძინა ივანიშვილს აბრალებს, პარტიის ლიდერი ვიღაცებს განტევების ვაცის როლს აუცილებლად მოარგებს. აღსანიშნავია, რომ საზოგადოების მნიშვნელოვან ნაწილს ბიძინა ივანიშვილის აღარ სჯერა, 2013-1014 წლებში მისდამი ნდობის ხარისხი 50%-ს აღემატებოდა, დღეს კი მისი რეიტინგი მინიმალურ დონეზეა დასული.
