„ბიძინა ივანიშვილს კოვზი ნაცარში ჩაუვარდა, ამიტომ პავლე მოციქულივით გვესაუბრება_ სანიკიძე

„ბიძინა ივანიშვილისთვის, რომელსაც კოვზი ნაცარში ჩაუვარდა, მთავარი საკუთარი პოლიტიკური ინტერესებია, ხოლო, როცა საზოგადოებისთვის გამაღიზიანებელი თემის გატანა არ გამოსდის, პავლე მოციქულივით გვესაუბრება“, _ აღნიშნა „გურია ნიუსთან“ „დემოკრატიული მოძრაობა-ერთიანი საქართველოს“ ლიდერმა გუბაზ სანიკიძემ.  მისივე თქმით, „ბიძინა ივანიშილს საზოგადოებისთვის მოსამართლეების “შეტენვა“ უნდოდა, რაც არ გაუვიდა და ახლა დიდი დემოკრატი გახდა“.

_ ბატონო გუბაზ, პარტია „ქართული ოცნება_დემოკრატიული საქართველოს თავმჯდომარე“ ბიძინა ივანიშვილმა მოსამართლეებთან დაკავშირებით დუმილი დაარღვია. მისი თქმით, აღნიშნულ საკითხზე გადაწყვეტილება ფართო მსჯელობის საფუძველზე იქნება მიღებული. მოსაზრება იმის შესახებ, რომ ბიძინა ივანიშვილი თანამდებობაზე მოსამართლეთა უვადოდ განმწესებას ლობირებს, მის მიერ გაკეთებულმა განცხადებამ გააბათილა?

_ბიძინა ივანიშვილს საზოგადოებისთვის მოსამართლეების შეტენვა უნდოდა, რაც არ გაუვიდა და ახლა დიდი დემოკრატი გახდა. ბიძინა ივანიშვილმა ზღაპრები თავის პოლიტიკურ გუნდს მოუყვეს. თავი ისე მოაქვს, თითქოს კარგი არბიტრი და მიუკერძოებელი ადამიანია. მოსამართლეების სია მისი დაწერილია, თუმცა კოვზი ნაცარში ჩაუვარდა. ბიძინა ივანიშვილი, როცა საზოგადოებისთვის გამაღიზიანებელი თემის გატანა არ გამოსდის, პავლე მოციქულივით გვესაუბრება.

_“ქართულ ოცნებაში“ კრიტიკული აზრის „გარეთ გამოტანა“ გუნდურობის დარღვევად აღიქმება, რაც უმკაცრესი პოლიტიკური სასჯელით, კონკრეტული დეპუტატის პარტიიდან გარიცხვითაც მთავრდება ხოლმე. ბიძინა ივანიშვილმა საკუთარ განცხადებაში იურიდიულ საკითხთა კომიტეტის ყოფილი თავმჯდომარე სწორედ გუნდური თამაშის წესების დარღვევაში დაადანაშაულა და სავარაუდოდ, ეკა ბესელია „ქართული ოცნებიდან“ გარიცხული დეპუტატის, დავით ჭიჭინაძის ბედს გაიზიარებს. “ქართულ ოცნების“ გუნდში პოლიტიკური დიქტატურა მყარდება?

_ გუნდიდან გარიცხავენ თუ არა ეკა ბესელიას, ვერ გეტყვით, მაგრამ ყველა ნორმალური პარტიის გუნდს საერთო ბიოგრაფია, მისწრაფებები და იდეოლოგია აერთიანებს.  ჩამოთვლილიდან რომელი აქვს „ქართულ ოცნებას“?!  შესაბამისად, ბიძინა ივანიშვილისთვის კონკრეტული დეპუტატი დიდ ფასეულობას არ წარმოადგენს. ბიძინა ივანიშვილი „ქართულ ოცნებას“ პატივისცემით ეძახის გუნდს, გული რომ არ ატკინოს. “ქართული ოცნების“ ახალბედა ნაწილს „ნორჩი ბიძინელების“ მხარდამჭერებს დავარქმევდი, რომლებიც ბიძინა ივანიშვილის ბრძანებებს უსიტყვოდ ასრულებენ. ივანიშვილისთვის სწორედ „ქართულ ოცნებაში“ არსებული ახალგაზრდა ჯგუფია მთავარი დასაყრდენი ძალა, თუმცა დრო გავა და მათაც მოისვრის. 

_ თანამდებობებზე მოსამართლეთა უდავოდ განმწესებამ, შესაძლოა, „ქართული ოცნების“ მმართველობა კითხვის ნიშნის ქვეშ დააყენოს. რაში უნდა აწყობდეს მმართველ პარტიას ამხელა პოლიტიკური ფასის გაღება?

_ ქართულ ოცნებას“ რა აწყობს, ბიძინა ივანიშვილს ფეხებზე კიდია. მისთვის მთავარი საკუთარი ინტერესებია. საზოგადოებას მისი პოლიტიკური გემოვნება დიდი ხანია ნანახი აქვს. არაკომპეტენტურობის თვალსაზრისით,  მისი საკადრო პოლიტიკა მსოფლიოში პირველ ადგილზეა. ბიძინა ივანიშვილის საქმიანობა, ჩვენთვის დაქცევის ტოლფასია.

_ პოლიტიკოსთა ნაწილი მიიჩნევს, რომ იუსტიციის უმაღლესი საბჭო, რომელსაც  „ქართულმა ოცნებამ“  შეუზღუდავი უფლებამოსილება მიანიჭა, დასაშლელია. როგორ ფიქრობთ, იუსტიციის უმაღლესმა საბჭომ, რა ფორმით უნდა გააგრძელოს ფუნქციონირება?

_ იუსტიციის საბჭო არა მხოლოდ დასაშლელია, არამედ მოსამართლეთა ნაწილი დასაჭერია. ეს პარაზიტები ანტისახელმწიფოებრივად იქცევიან და ქვეყნის განვითარების საშუალებას არ აძლევენ. თუ უმრავლესობაში 39 ნამუსიანი კაცი აღმოჩნდება, რა თქმა უნდა, სია  ვერ გავა. თუ გაიტანენ, ვერანაირ სამუდამო სავარძელს მოსამართლეები  ვერ მიიღებენ. ხელისუფლების შეცვლისთანავე დაპანღურდებიან. კანონები იმისთვის იწერება, რომ გამოიცვალოს.