ფარულ ჩანაწერებზე, რომელიც ,,ქართული ოცნების“ პირობებში მართლმსაჯულების სანდოობას ეჭვვეშ აყენებს, ,,გურია ნიუსთან“ პოლიტოლოგმა სოსო ცისკარიშვილმა ისაუბრა.
_ ბატონო სოსო, „რუსთავი 2“-ის მიერ გავრცელებულ ფარულ ჩანაწერებში პროკურატურის ყოფილი მაღალჩინოსანი მირზა სუბელიანი ხორავას ქუჩაზე მომხდარი მკვლელობის საქმესთან დაკავშირებით პირდაპირ ამბობს, რომ ხელისუფლებას გაურიგდა და ციხეში მმართველი პარტიის იმიჯის გადასარჩენად ზის.
ეს იმ ფონზე, როცა ქვეყნის მთავარი საგამოძიებო ორგანო და ,,ქართული ოცნებიდან“ პარლამენტის საგამოძიებო კომისიის წევრები საზოგადოებას არწმუნებდნენ, რომ ხორავას ქუჩაზე მომხდარი მკვლელობა ჯეროვნად იყო გამოძიებული..
როგორ ფიქრობთ, მირზა სუბელიანის მონაწილეობით გუშინ გავრცელებული ფარული ჩანაწერები მთლიანად ეჭვქვეშ აყენებს ქართლი მართლმსაჯულების სანდოობას და ხაზს უსვამს საგამოძიებო ორგანოთა სისტემურ ნგრევას?
_ ამაზე უარესი რაღა უნდა გავიგოთ?! ამ უბედურების მთავარი მოქმედი პირები, (საუბარია ხორავას ქუჩაზე მომხდარ შემთხვევაზე), რომელთა მიმართ არანაირი სამართლებრივი ქმედება არ განხორციელებულა, თავს მშვენივრად გრძნობენ. თანდათან ვრწმუნდები, რომ ქვეყანაში არათუ შერჩევითი სამართალია, არამედ უსასრულო უსამართლობის მდგომარეობაში ვიმყოფებით.
დღეს საჭიროა, გავაათმაგოთ ჩვენი ყურადღება, რათა თვალსა და ხელს შუა არ ჩამოგვენგრას სახელმწიფო, ასეთი რამ ნორმალურ, დალაგებულ სახელმწიფოში არ ხდება. ხალხმა პასუხი უნდა გასცეს ამ უმსგავსობას.
_ ჩანაწერში მირზა სუბელიანი ასახელებს კონკრეტულ ფაქტებს და საქმეებს, რომელთა მოგვარებაშიც პირადად აქვს მონაწილეობა მიღებული , მაგალითად, სერგო თეთრაძის საქმე, ნავთლუღის სპეცოპერაცია და ციხის ბუნტის საქმე, რომელთა გამო ბაჩო ახალაია იხდის სასჯელს.
ასევე, ჩანაწერში მირზა სუბელიანის მიერ ყოფილი მთავარი პროკურორი ოთარ ფარცხალაძე პროკურატურის მმართველად არის მოხსენიებული.
მმართლმსაჯულების სისტემაში არსებული არაფორმალური მმართველობა, კორუფცია და ელიტური გარიგებები _რასთან გვაქვს საქმე?
_ მურუსიძის სახელობის მართლმსაჯულება ყველაფრის მკადრებელია. ამ მდგომარეობას შეეგუა მმართველი პარტიის თავმჯდომარე და არ გამოვრიცხავ, რომ, ბოლოს და ბოლოს, ბატონ ბიძინასაც დასჭირდება შველა იმ ადამიანებისგან, რომლებიც დღეს ხელის გულზე ჰყავს დასმული, მაგალითად, ფარცხალაძე.
თუ წინა ხელისუფლების დროს მიუღებელი გადაწყვეტილებები იბადებოდა და რეალიზდებოდა, ახლა მაქვს განცდა, რომ არა მხოლოდ საქართველოში იბადება მოღალატეობრივი გადაწყვეტილებები, არამედ ბევრად უფრო შორიდან, ჩრდილოელი მეზობლიდან მოდის.
თავხედობას არა აქვს ზღვარი თუ სამართალი მიძინებულია, საქართველოში დღეს ეს შემთხვევაა“, _ გვითხრა ცისკარიშვილმა.
გუშინ „რუსთავი 2“-მა სკანდალური ფარული ჩანაწერები გაავრცელა, რომელთა მოქმედი პირები არიან: „ქართული ოცნების“ დეპუტატი ვიქტორ ჯაფარიძე, გენერალური ინსპექციის ყოფილი თანამშრომელი დათო ცუხიშვილი და პროკურატურის ყოფილი მაღალჩინოსანი მირზა სუბელიანი.
აღსანიშნავია, რომ ჩანაწერების ნამდვილობა ,,ქართული ოცნების“ დეპუტატმა ვიქტორ ჯაფარიძემ დღეს დაადასტურა.
