საქართველოს ეროვნული ბანკის პრეზიდენტის ოჯახმა გასული წლის განმავლობაში შემოსავლის სახით, 376 858 ლარი მიიღო, აღნიშნულის შესახებ კობა გვენეტაძის ქონებრივ დეკლარაციაში წერია, რომელიც საჯარო სამსახურის ბიუროს ვებ-გვერდზე გამოქვეყნდა.
შემოსავლები, ხელფასი
დეკლარაციის თანახმად, კობა გვენეტაძემ საქართველოს ეროვნული ბანკის პრეზიდენტის თანამდებობიდან 2016 წლის 17 მარტიდან ამავე წლის 31 დეკემბრამდე შემოსავლის სახით 119047,62 ლარი მიიღო. საქართველოს ეროვნული ბანკის საბჭოს წევრობისთვის, 2016 წლის 2 მარტიდან 31 დეკემბრამდე კი – 65 000 ლარი; ეროვნულ ბანკში გადასვლამდე კი, სს საქართველოს ბანკის მთავარი ეკონომისტის პოსტიდან მხოლოდ ორ თვეში 2016 წლის 1 იანვრიდან 29 თებერვლამდე – 41 666 ლარი აქვს მიღებული. გარდა ამისა, გვენეტაძის ოჯახის შემოსავლების გრაფაში, მისი მეუღლის, ირინე კოკაიას სახელფასო შემოსავალიც წერია, რომელიც მას საერთაშორისო საფინანსო კორპორაციიდან აქვს მიღებული, სადაც მას საოპერაციო ოფიცრის თანამდებობა უჭირავს, მისი წლიური ანაზღაურება ამ პოსტიდან გასულ წელს – 151 145 ლარი ყოფილა.
დეკლარაციის მიხედვით, კობა გვენეტაძის სახელზე 34 საბანკო ანგარიშია გახსნილი, აქედან 8 ანგარიშზე თანხა საერთოდ არ ირიცხებოდა. რაც შეეხება დანარჩენ ანგარიშებს, კობა გვენეტაძეს ჯამში ყველა საბანკო ანგარიშზე 764 085,09 დოლარი და 184 373,41 ლარი ჰქონდა.
გარდა ამისა, ნაღდი ფულის სახით მის საკუთრებაში 660,00 ევრო და 3600,00 დოლარი იყო.
მის საკუთრებაშია ასევე, 10 წლიანი 20 ცალი 19350,60 ლარის ღირებულების ფასიანი ქაღალდი (სახაზინო ობლიგაცია) და 5 წლიანი 1 ცალი 988,33 ლარის ღირებულების სახელმწიფო ქაღალდი (საზახინო ობლიგაცია).
ხოლო მისი მეუღლის ფინანსურ ანგარიშებზე დეკლარაციის მიხედვით, ჯამში, ირინე კოკაიას ანგარიშებზე ჯამში 14167,39 დოლარი და 32363,20 ლარი იყო.
უძრავ-მოძრავი ქონება
რაც შეეხება უძრავ მოძრავ ქონებას, ამავე დეკლარაციიდან ირკვევა, რომ 2016 წელს, კობა გვენეტაძემ 62000,00-ლარად თბილისში, სამგორის რაიონში, 70,02 კვ.მ.-ის ფართობის ბინა შეიძინა;
ასევე, მის საკუთრებაშია 2012 წელს, 37000,00-დოლარად ნაყიდი 28,00 კვ.მ-ის ფართობის ბინა თბილისში, ასათიანის ქუჩაზე; 1993 წელს, 305566,00 მანეთად ნაყიდი 67,26 კვ.მ-ის ფართობის ბინა თბილისში, დიღმის მასივის I კვარტალში, რომელიც მის მშობლებს შეუძენიათ და გვენეტაძის სახელზეა გაფორმებული.
გარდა საქართველოში არსებული ქონებისა, კობა გვენეტაძე და მისი მეუღლე ფლობენ საცხოვრებელ სახლის აშშ-ში, ვაშინგტონის ოლქში, რომელიც მათ 705000,00-დოლარად, 2006 წელს შეუძენიათ.
ხოლო 2007 წელს, 763,01 კვ.მ-ის ფართობის მიწის ნაკვეთი აქვთ ამავე მისამართზე ნაყიდი, თუმცა მისი საფასური დეკლარაციაში მითითებული არ არის.
ირინე კოკაიას საკუთრებაშია ასევე, 2006 წელს, 70500,00-დოლარად ნაყიდი, 70,00 კვ.მ-ის ფართობის ბინა თბილისში, აბაშიძის ქუჩაზე.
ასევე, 1996 წელს დარეგისტრირებული 600,00 კვ.მ-ის ფართობის მიწის ნაკვეთი გარდაბნის მუნიციპალიტეტის სოფელ კუმისში და ამავე მისამართზე არსებული 29,00 კვ.მ-ის ფართობის საცხოვრებელი სახლი, რომელიც დეკარაციის მიხედვით საკუთარი სახსრებითაა აშენებული.
რაც შეეხება მოძრავ ქონებას, დეკლარაციის მიხედვით, კობა გვენეტაძე ფლობს 2014 წელს გამოშვებულ მსუბუქ ავტომანქანა Lexus GX 460-ს რომელიც მას 60140,36-დოლარად აქვს შეძენილი. ხოლო მისი მეუღლის საკუთრებაშია მსუბუქი ავტომანქანა Toyota Rav 4, რომელიც მას 2013 წელს 11000,00-დოლარად შეუძენია.
გარდა ამისა, კობა გვენეტაძის 100,00%-იან საკუთრებაშია ფერწერული ტილო, ლადო გუდიაშვილის ნამუშევარი, რომელიც მას 2010 წელს 10000,00-ლარად შეუძენია
დეკლარაციის თანახმად, კობა გვენეტაძეს საცხოვრებელი ფართის დაქირავებისთვის 2015 წლიდან, 2017 წლის 22 დეკემბრამდე 14400,00 დოლარი აქვს გადასახდელი, გასულ წელს კი 17097,00 ლარის გასავალი ჰქონია. ასევე კობა გვენეტაძის სახელზეა საცხოვრებელი ფართის გაქირავების ხელშეკრულება, საიდანაც ყოველთვიურად 300,00 ლარს იღებს 2010 წლიდან, გასულ წელს კი 3600,00 ლარის შემოსავალი მიუღია;
გარდა ამისა, კობა გვენეტაძეს კიდევ ერთი საცხოვრებელი ფართი აქვს გაქირავებული, საიდანაც შემოსავლის სახით გასულ წელს 37800,00 დოლარი მიუღია. გვენეტაძის სახელზეა ასევე, 40800,00-დოლარიანი ქირავნობის ხელშეკრულება, რომლის ვადაც 2017 წლის 17 თებერვლიდან 2018 წლის 28 თებერვალს იწურება. თუმცა, შემოსავალი ჯერჯერობით მიღებული არ აქვს.
სესხები, ხელშეკრულებები, საჩუქრები
დეკლარაციაში ასევე აღნიშნულია, რომ 2016 წლის თებერვალში კობა გვენეტაძემ 12 500-დოლარიანი მანქანა მამას აჩუქა. ასევე, ამავე წელს გააჩუქა საქართველოს ბანკის ჯგუფის (BGEO GROUP PLC) 992 აქცია, რომლის ღირებულებაც დეკლარაციაში 64533,00 ლარია მითითებული, თუმცა ვის აჩუქა ის, აღნიშნული არ არის.
რაც შეეხება მის მეუღლეს, ირინე კოკაიას სს თელიანი ველის 50 აქცია 2016 წლის 3 მაისს გაუჩუქებია.
კობა გვენეტაძის სახელზე რამდენიმე სესხია; კერძოდ, 126390,00-დოლარიანი სახელფასო ავანსი 2015 წელს აუღია და 2016 წლის მაისში დაფარა, რისთვისაც საერთაშორისო სავალუტო ფონდს 126390,00 დოლარი გადაუხადა.
საკრედიტო ბარათით აღებული 25000,00-დოლარიანი სესხი 2015 წელს აუღია და გასულ წელს საკრედიტო კავშირისთვის (სსფ/მბ) 28330,45 დოლარი გადაუხდია;
საკრედიტო ბარათი AMEX-ით აღებული 25000,00-დოლარიანი სესხი კი, როგორც დეკლარაციაშია მითითებული გაუქმდა და ჩანაცვლდა CITI ბანკის საკრედიტო ბარათით, გასულ წელს კი ამისთვის 230,10 დოლარი აქვს გადახდილი, ხოლო CITI Bank-ს 2113,77 დოლარი გადაუხადა.
სხვა შემოსავლები და გასავლები
რაც შეეხება ოჯახის შემოსავლებსა და გასავლებს, დეკლარაციის მიხედვით, კობა გვენეტაძეს საპროცენტო სარგებელი და დივიდენდი სსფ/მბ საკრედიტო კავშირიდან 2037,61 დოლარი მიუღია; სსფ-ში მუშაობის დასრულების საბოლოო ანგარიშსწორება (წმინდა) შემოსავალი – 156399,24 დოლარი აქვს მითითებული; ხოლო მის მეუღლეს, ირინე კოკაიას მიმდინარე ანგარიშზე დარიცხული სარგებლიდან 6528,35-ლარის შემოსავალი აქვს მიღებული.
ოჯახს ასევე სოლიდური გასავლებიც ჰქონია. კერძოდ, გასულ წელს, კობა გვენეტაძეს ქონების გადასახადი (აშშ) 6508,10 დოლარი გადაუხდია. აშშ-ში სახლის დაზღვევისთვის კი – 1153,00 დოლარი; ასევე, გვენეტაძეს გადაუხდია უძრავი ქონების მართვის მომსახურეობის საკომისიო (აშშ) 3632,00 დოლარი და გადასახადების მომზადების საფასური (აშშ) – 775,00 დოლარი;
მარიამ ელიზაბეტ გვენეტაძის სწავლისთვის (ავტოტრანსპორტის ჩათვლით)13825,00 დოლარი, ხოლო საზაფხულო ბანაკის საფასური (აშშ) 5995,00 დოლარი აქვს გადახდილი; სოფიო ელენ გვენეტაძის სწავლის საფასური (ავტოტრანსპორტის ჩათვლით) კი – 16788,65 ლარი აქვთ გადახდილი;
ასევე, გვენეტაძეს აქვს გადახდილი დის შვილის სწავლის საფასური 4490,00-დოლარიც;
ბინის რემონტი გვენეტაძეს – 18848,00 ლარი დაუჯდა, ხოლო თავისი საკუთარი ავტომანქანის Lexus GX 460-ის განბაჟება 6704,64 ლარი;
კობა გვენეტაძე ოჯახის მოგზაურობის პაკეტში – 21207,12 ლარი, ავიაბილეთში- 995,66 დოლარი, სასტუმროში კი – 2768,53 დოლარი გადაუხდია.
1058,94-დოლარად შეუძენია MBAIR-ის ლეპტოპი; 897,82 -დოლარად კი – აიფონი.
ირინე კოკაიას საქართველოში არსებული ქონების გადასახადი 2576,00 ლარი აქვს გადახდილი, ხოლო სხვადასხვა საჭირობებისთვის, რომელიც დეკლარაციაში დაზუსტებული არ არის, 877,94 დოლარი გადაუხდია.
