ოზურგეთის მუნიციპალიტეტის საკრებულოს ბიუროს სხდომაზე სოფელ ლიხაურის მკვიდრმა ირმა გორდელაძემ პეტიციის შესახებ ისაუბრა.
“აიკრძალოს სოფელ ლიხაურში მდინარე აჭისწყლის აუზში ქვიშა–ხრეშის მოპოვება, _ ამ მოთხოვნით პეტიცია ოზურგეთის მუნიციპალიტეტის საკრებულოს ვებგვერდზე 5 სექტემბერს განთავსდა და საჭირო ხმები უკვე დააგროვა, რომ ადგილობრივმა ხელისუფლება ოფიციალურად დაიწყოს ამ საკითხზე ზრუნვა“, _ თქვა ირმა გორდელაძემ.
როგორც გორდელაძემ აღნიშნა, სოფლის მცხოვრებლები ყველაფერს აკეთებენ ლიხაურის უნიკალური ბუნების გადასარჩენად.
“სოფელი ლიხაური არის ტურისტული ზონა. ყველას მოგეხსენებათ, რომ აჭის წყალის ხეობა არის უნიკალური, ეს სიმდიდრე უნდა შევუნახოთ ჩვენ მომავალს და ქვეყანას. ტურისტებისთვის ეს ადგილი არის ერთ–ერთი მიმზიდველი, აქედან გამომდინარე, ლიხაურელებს სურთ, ეს სოფელი უფრო განვითარებული და წარმატებული იყოს. დიდია საშიშროება, რომ ეს უნიკალურობა, რაც აქვს აჭის ხეობას, დაეკარგოს და მოსახლეობას ეს ნამდვილად არ გვინდა, დარწმუნებული ვარ _ არც ხელისუფლების წარმომადგენლებს. მდინარე აჭისწყალი უზრუნველყოფს სოფელ ლიხაურსა და დაბა ანასეულს სასმელი და ტექნიკური წყლით. თუ კი ამ საკითხის მოგვარებაში დაგვეხმარებით, დიდი მადლობელი დაგრჩებით“, _ თქვა ბიუროს სხდომაზე ირმა გორდელაძემ.
პეტიციაში მოსახლეობა აჭის წყლის ხეობის რეკრეაციულ ზონად გამოცხადებას და მდინარიდან ინერტული მასალის გატანის აკრძალვას ითხოვს.
ოზურგეთის მუნიციპალიტეტის საკრებულოს თავმჯდომარის მოადგილის, გიორგი ღურჯუმელიძის თქმით, აღნიშნული საკითხი სიღრმისეულადაა შესასწავლელი, რადგან რეკრეაციულ ზონად გამოცხადებას ადგილობრივი ხელისუფლება არ იღებს და ეს მთავრობის დონეზე გადასაწყვეტი საკითხია, რაზეც გორდელაძემ უპასუხა, რომ მოსახლეობის მოთხოვნაა მდინარე აჭზე კარიერების გაუქმება.
“არც შეიძლება ამ მდინარეზე არსებობდეს კარიერები! თქვენთან იმიტომ მოვედით, რომ დაგვეხმაროთ და გამონახოთ ის გზა, რომელიც მისაღები იქნება ხალხისთვის”, _ თქვა ირმა გორდელაძემ.
საკრებულოს თავმჯდომარის, დავით დარჩიას თქმით, კომისია აუცილებლად შეისწავლის საკითხს და დეტალურად მიაწვდის პასუხს სოფელ ლიხაურის მცხოვრებლებს. ასევე, პეტიცია გაეგზავნება ოზურგეთის მუნიციპალიტეტის მერიას.
საკრებულოს დეპუტატის ლევან მგელაძის თქმით, ხალხის მოთხოვნა არის სამართლიანი და დროულად საჭიროებს განხილვას.
“მინდა დავაყენო საკითხი, რომ ყველა ის მდინარე შევისწავლოთ, სადაც არის კარიერები. არაერთ სოფელში არის ეს კარიერები და მოსახლეობა ხშრად აპროტესტებს. მათ არსებობას. მინდა ვთქვა, რომ კონტროლი არ არის, ვის რამდენი ქვა–ღორღი გააქვს და ეს არის მთავარი პრობლემა. განადგურების პირას არის მდინარეები და აუცილებლად მისახედია ეს საკითხი. სოფელ ნაგომარში მალე მდინარე ცენტრალურ გზაზე გამოვა და საშინელება მოხდება“, _ თქვა ლევან მგელაძემ.
ირმა გორდელაძემ ბიუროს სხდომაზე, ასევე, აღნიშნა, რომ წიაღისეულის სააგენტოდან ოფიციალური ინფორმაცია მიიღო, სადაც ნათქვამია, რომ ორი ინდმეწარმე დაჯარიმდა.
“კი, ბატონო, ასეა და აღარ მუშაობენ, მაგრამ კიდევ ოთხ ინდმეწარმეს აქვს აღებული აჭის წყალზე ქვა–ღორღის მოპოვების უფლება და არავინ იცის, როდის დაიწყებენ სამუშაოებს. სოფლის გადაწყვეტილება უცვლელია _ თუ დაიწყებს ეს ხალხი სამუშაოებს, ისევ გაგრძელდება აქციები და არ მივცეთ მათ მუშაობის დაწყების საშუალებას. პირდაპირ გეტყვით _ ბომბზე ვზივართ, რადგან არ ვიცით, როდის დაიწყებენ მუშაობას“, – აღნიშნა ირმა გორდელაძემ.
