ლანჩხუთში, ვადაჭკორიას ქუჩაზე მცხოვრები, სოციალურად დაუცველი ნესტან ტყეშელაშვილი-მამედოვი სოციალური ქსელის საშუალებით პატარა შვილისთვის დახმარებას ითხოვს.
„ვითხოვთ დახმარებას პატარა ალეკოსთვის. ჩვილ ბავშვს აქვს გულის პრობლემა და ქუთაისში ვართ დაბარებული მისი მდგომარეობის შესამოწმებლად, მაგრამ იმის სახსრები არა მაქვს, რომ წავიყვანო, თან სოციალურიც შემიჩერეს პატარა რომ დაემატა სიაში. გთხოვთ, დამეხმაროთ რამდენითაც შეძლებთ. ბოდიში, რომ გაწუხებთ“, _ წერს ნესტან ტყეშელაშვილი-მამედოვი და იქვე ბანკის საკუთარი ანგარიშის ნომერსაც უთითებს, რომელზეც პატარა ალეკოსთვის დახმარების გაწევის მსურველებს თანხის ჩარიცხვა შეუძლიათ _ GE80LB0211192355070000.
როგორც ნესტან ტყეშელაშვილის კომენტარებიდან ირკვევა, მან დახმარების თხოვნით უკვე მიმართა მუნიციპალიტეტის მერიას, თუმცა, უშედეგოდ: „რამდენჯერ მივმართე მერიას, მაგრამ არაფერი რეაგირება და დახმარება არ არი“.
მერიაში კი განმარტავენ, რომ კონკრეტულ საკითხთან დაკავშირებით მამედოვების ოჯახს მათთვის განცხადებით არ მიუმართავს.
„სხვა შემთხვევებში მუნიციპალიტეტი არაერთხელ დაეხმარა ნესტან ტყეშელაშვილსა და მის ოჯახს, თუმცა, კონკრეტულ შემთხვევაში მას ჩვენთვის ოფიციალურად არ მოუმართავს. მერიაში დახმარების თხოვნასთან დაკავშირებით განცხადება არ შემოსულა“, _ გვპასუხობენ მერიაში.
მამედოვების სოციალურად დაუცველ რვა სულიან ოჯახს, რომელთაგან ხუთი მცირეწლოვანია, საკმაოდ მძიმე პირობებში უწევს ცხოვრება.
მამადოვების ავარიული სახლი ორი ოთახისგან შედგება. ამ სახლის გარდა ეზოში ნახევრად დანგრეული კიდევ ერთი შენობაა, რომელსაც ოჯახის დიასახლისი სამზარეულოდ იყენებს. თუმცა, იმის გამო, რომ ზამთარში აქ წყალი დგება, ხშირად საჭმლის მომზადება ღია ცის ქვეშ უწევს.
მამედოვების პრობლემის თაობაზე „გურია ნიუსი“ გასული წლის შემოდგომაზეც წერდა. „საჭმლის ფულს არ ვითხოვთ, როგორღაც ვახერხებთ თვიდან-თვემდე თავის გატანას, უფროსებს კი გვიწევს ბევრი რამის დათმობა, მაგრამ ვცდილობთ, ბავშვებს მაინც არ მოვაკლოთ აუცილებელი და მათთვის საჭირო. ჩემი ოჯახის მთავარი პრობლემა საცხოვრებელი ფართია, არ მინდა ჩემი შვილები ნესტისგან დაავადმყოფდნენ და მუდმივად ქვეწარმავლების დაკბენის შიში მქონდეს. ნუთუ, არ შეიძლება, რაიმე საშუალება გამოინახოს და დაგვეხმარონ, ასე განწირულები ხომ არ უნდა ვიყოთ ქვეწარმავლების დასაკბენად?!“ _ ამბობდა მაშინ მრავალშვილიანი დედა, რომელსაც მძიმე ყოფით პირობებში უწევს მცირეწლოვანი შვილების აღზრდა.
ამ დროის განმავლობაში კი მამედოვების ოჯახში მხოლოდ ის შეიცვალა, რომ კიდევ ერთი ახალი წევრი შეემატათ, რომელსაც, როგორც სოციალურ ქსელში დედის, ნესტან ტყეშელაშვილი-მამადოვის მიერ გაკეთებული განცხადებიდან ირკვევა, ჯანმრთელობის პრობლემები აქვს, ოჯახს კი სოციალური შემწეობა შეუჩერდა ახალი წევრის შემატების გამო და ახლა ბავშვი რომ ექიმთან მიიყვანოს, გულისხმიერი ადამიანების იმედადაა.
„აღმომიჩინონ დახმარება წესიერი. აბა, ვნახოთ არჩევნებზე მომადგებიან კარებთან და ჩემი ოჯახიდან მოუნდებათ ხმების მიცემა, არავითარ შემთხვევაში თუ არ დამეხმარებიან. სახლი სტიქიისგან დაზიანებულია და ქვეწარმავლებითაა სავსე. რვა სული ვცხოვრობთ ერთ ოთახში და ისიც მენგრევა თავზე.
მერიაში გაცხადებას რომ დაწერ, მერე დრო დაჭირდება და ბავშვი 12 ივნისისთვის მყავს ჩასაყვანი კონსულტაციაზე. რამდენჯერ მივმართე მერიას, ხან ტელეფონის ნომრებს მაძლევენ, _ დაგეხმარებიანო. ვიყავი მისული მერიაში და გამომიშვეს, მიღება არაო.
სოციალურიც შემიჩერეს, პატარა სიაში რომ ჩავწერეთ, დეკლარაცია შეავსეს, არადა,
მაგის იმედი მქონდა ბავშვის წაყვანაზე. ამ დროში კორონა ვირუსი რომაა, შეჩერება კი არა, პირიქით, ხალხს დახმარება უნდა!“ _ ამბობს „გურია ნიუსთან“ საუბარში ნესტან ტყეშელაშვილი-მამედოვი.
