ჩოხატაურში ამ დილას განვითარებულ მოვლენებთან დაკავშირებით “გურია ნიუსი” ჩოხატაურის საკრებულოს წევრს “ნაციონალური მოძრაობიდან” ბაჩო ახალაძეს ესაუბრა.
როგორც ახალაძე ამბობს, მომხდარი დაპირისპირების შედეგად ოზურგეთის რაიონული ორგანიზაციის ერთიანი ნაციონალური მოძრაობის თავმჯდომარემ მძიმე დაზიანებები მიიღო.
ახალაძე აღნიშნავს, რომ ბრძოლა ნოდარ დუმბაძის სკვერის შესანარჩუნებლად გაგრძელდება.
“ჩოხატაურის ცენტრალურ ბაზარში მოსახლეობას ნოდარ დუმბაძის სკვერის გასხვისებასთან მიმართებაში ინფორმაციას ვაწვდიდით შესაბამისი ფლაერებით, რომ ნოდარ დუმბაძის სკვერი ჩოხატაურისთვის არის ძალიან მნიშვნელოვანი და სახელმწიფო ქონების გასხვისება რომ დაუშვებელია და ა.შ. ინფორმაციული შეხვედრა გვქონდა მოსახლეობასთან, რა დროსაც “ქართულ ოცნებასთან” დაახლოებულმა აქტივისტებმა და ზოგადად სხვადასხვა ადამიანებმა განახორციელეს ფიზიკური და სიტყვიერი შეურაცხყოფა საკრებულოს წევრებზე. მათ შორის ოზურგეთის “ნაციონალური მოძრაობის” რაიონული ორგანიზაციის თავმჯდომარემ დავით მჟავანაძემ მიიღო მძიმე დაზიანებები და ახლა უტარდება კლინიკაში შესაბამისი პროცედურები. საკრებულოს სხვა წევრებმაც მიიღეს დაზიანებები.
მომხდართან დაკავშირებით შემიძლია ვთქვა ის, რომ “ქართული ოცნება” უკვე წლებია ოპონენტებს ძალადობრივად უსწორდება. თუმცა ჩვენ ბოლომდე ვიბრძოლებთ, ჩოხატაურში ნოდარ დუმბაძის სკვერის შესანარჩუნებლად”,_ გვითხრა ახალაძემ.
ინფორმაციისთვის, ნოდარ დუმბაძის სკვერის ტერიტორია განუსხვისებელი ქონების სტატუსს კარგავს. 290 კვ.მ.-ის ფართობი სამხარაულის ექსპერტიზის ბიურომ 15 000 ლარად უკვე შეაფასა. აუქციონზე გატანის შემდეგ კი მას საქართველოს ბანკი შეიძენს, რომელმაც ბანკის ფილიალი წლის ბოლომდე უნდა ააშენოს და გახსნას. მერის, დავით შარაშიძის მტკიცებით კი, ნოდარ დუმბაძის სკვერის ტერიტორიას საფრთხე არ ემუქრება და შენობა ისე განთავსდება, რომ პარკი იერსახეს არ შეიცვლის.
ავტორი
