ოზურგეთის სახელმიწფო თეატრმა ჩოხატაურელ მაყურებელს გიზო ჟორდანიას დადგმული სპექტაკლი _ “ბოშები” წარუდგინა. “ბოშებმა” ხელოვნების სასახლის სცენაზე ნამდვილი ცეცხლი დაანთეს და შესანიშნავი შესრულებით მაყურებლის აღფრთოვანება გამოიწვიეს.
დარბაზში დამსახურებული ტაში დიდი ხნის განმავლობაში ისმოდა:
_ კარგი სცენარი, კარგი შესრულება, კარგი კოსტიუმები, კარგი გაფორმება _ ყველაფერი ერთად იყო თავმოყრილი და ძალიან დიდი სიამოვნება მივიღეთ, _ აღნიშნეს “გურია ნიუსთან” საუბრისას მაყურებლებმა.
აღსანიშნავია, რომ „ბოშები“ გიზო ჟორდანიას უკანაკსნელი ნამუშევარია. სპექტაკლის პრემიერა გასულ წელს ოზურგეთის თეატრის ნოდარ დუმბაძის სახელობის საერთაშორისო ფესტივალზე შედგა, რითაც გაიხსნა კიდეც ფესტივალი.
წლევანდელი ტურნე, რომლის ფარგლებში ოზურგეთის სახელმწიფო თეატრი საქართველოს რეგიონების გარდა თურქეთსა და საბერძნეთსაც ეწვევა, გიზო ჟორდანიას ხსოვნას ეძღვნება.
თეატრის სამხატვრო ხელმძღვანელის, ვასო ჩიგოგიძის თქმით ეს თეატრის მხრიდან მადლიერების გამოხატვაც არის რეჟისორ გიზო ჟორდანიას ხსოვნისადმი:
„თბილისშიც, საერთაშორისო ფესტივალებზეც, საქართველოს ყველა კუთხეში ვითამაშებთ დუმბაძის „ბოშების“ ჟორდანიასეულ ინტერპრეტაციას. გიზო ჟორდანია იყო მშვენება ჩვენი ფესტივალის, რომელიც შარშან პირველად გაიმართა. ოზურგეთის თეატრში ორი თვის განმავლობაში ტარდებოდა ბატონი გიზოს რეპეტიციები, იგივე მასტერ კლასები, რომელსაც მსხიობებთან ერთად დირექცია, შემოქმედებით-ტექნიკური პერსონალი, ვისაც საშუალება ჰქონდა, ყველა სიამოვნებით ადევნებდა თვალს. თეატრი მადლობელია მისი თანადგომისა და მეგობრობის. მაესტროს დიდკაცობას, დიდ პროფესიონალიზმს და მისი ნათელი სულის ხსოვნას ვუძღვნით მის ბოლო პრემიერას.“ _ ამბობს ჩიგოგიძე.
ბატონი გიზო სპექტაკლის ანოტაციაში წერდა: „ როგორც ბოშები მოექცნენ გურულებს, ეს მათი ცხოვრების წესიდან არის გამომდინარე. სიმპათიურნი, ქარიზმატულნი, ნიჭიერებით დაჯილდოებულნი სხვაგვარად ვერ იქცევიან… ქურდობა თუ ტყუილი მათი საარსებო საშუალებაა.
ასეთებად გააჩინა ისინი მამაზეციერმა… გურულების პასუხი მათ ღალატზე, მაღალი ზნეობიდან გამომდინარე, მართლმადიდებლური, ზოგადქართულია. შემთხვევითი როდია დიდმა გალაქტიონმა გენიალური სტრიქონები რომ მიუძღვნა ქართული მოდგმის ამ იშვიათ წარმომადგენლებს.
P.S. ოზურგეთი კი ის ქალაქია და მისი დრამატული თეატრი ის განსაკუთრებული ერთეულია, სადაც შემოქმედებითი ცხოვრება მაღალი იდეალებით სუნთქავს.“
სპექტაკლის სცენოგრაფია ლომგულ მურუსიძე, მუსიკალური გაფორმება ცნობილ კომპოზიტორს გომარ სიხარულიძეს ეკუთვნის. სპექტაკლში ოზურგეთის თეატრის დასის თითქმის მთელი შემადგენლობა მონაწილეობს. იგი აერთიანებს თეატრის ოთხივე თაობას.
გიზო ჟორდანიას დადგმა გაჯერებულია მუსიკალური ფოლკლორითა და ნოდარ დუმბაძის მახვილგონივრული იუმორით.
